शेयरमा नेगेटिभ सर्किट, ८० अंकले घट्यो नेप्से

A+ A A-

लगातार २ दिनसम्म लागानीकर्तालाई हौस्याएको शेयर बजारले चौथो दिन पनि निरन्तरता दिन सकेन । बुधबार तीन पटकसम्म पोजिटिभ सर्किट लागेर बन्दै गर्नुपर्ने स्थिति निम्तिएको शेयर बजारमा भोलिपल्टै नेगेटिभ सर्किट लागेर बन्द गर्नुपर्‍याे ।

बिहीबार शेयर बजार खुलेको १ घण्टा ४० मिनेटमा नै नेप्से परिसूचक ८०.४ अंकले घटेर १२५६.११ अंकमा सर्किट लागेर कारोबार बन्द भएको हो ।

कारोबार सुरु भएको चौथो दिन शेयर किनबेचमा सहभागी भएका कम्पनीको संख्या बढे पनि अधिकांश कम्पनीले गुमाएका छन् ।

१ सय ४५ कम्पनीको १० लाख ६१ हजार ८ सय ९० कित्ता शेयर ८ हजार ४ सय ९ पटक किनबेच हुँदा ४७ अर्ब ६६ करोड ५४ लाख ९ सय ७१ रुपैयाँको कारोबार भयो ।

कारोबार सुरु भएको ३ मिनेटमै १८ अंकले बजार बढ्दा आज पनि बजार हरियाली हुने आँकलन गरिएको थियो । तर तीन मिनेट सकिन नपाउँदै बजार निरन्तर ओरालो लाग्यो । ओरालो लागेसँगै नेगेटिभ सर्किट ब्रेक लागेर बिहीबारको कारोबार बन्द भयो ।

८० अंकले बजार घट्दा म्युचुअल फण्डबाहेक सबै समूहका परिसूचक राताम्मे बनेका छन् । सबैभन्दा धेरै बैंकिङ क्षेत्रको सूचक घटेको छ । म्युचुअल फण्डको भने ०.१ प्रतिशतले बढेको छ ।

आज कमाउनेभन्दा गुमाउनेको संख्या धेरै छ । घट्ने प्रतिस्पर्धामा नै उत्रिएजस्तो देखिन्छ । सबैभन्दा धेरै सोल्टी होटलको शेयर मूल्य घटेको छ । सोल्टी होटलको शेयर मूल्य १० प्रतिशतले घटेको हो । त्यस्तै, अन्य तीन कम्पनीको पनि ९ प्रतिशतभन्दा बढीले शेयर मूल्य घटेको छ ।

सबै राताम्मे भएको अवस्थामा स्वाभिमान लघुवित्त वित्तीय संस्थामा पनि हरियाली छायो । यसले ८.०७ प्रतिशतले शेयर मूल्य वृद्धि गर्न सफल भयो ।

यसअगाडि बुधबार तेस्रो पटकसम्म पोजिटिभ सर्किट लाग्दा ७५.७७ अंकको वृद्धि भई १३३६.५२ अंकमा शेयरबजारको कारोबार बन्द भएको थियो । ६.१ प्रतिशतले कारोबार बढ्दा १ सय ३५ कम्पनीको ११ लाख १ हजार २ कित्ता शेयर ३ हजार ८ सय ९० पटक खरिदबिक्री भएर ४० लाख ७३ लाख ५२ हजार २ सय ४७ रुपैयाँको कारोबार भएको थियो ।

प्रकाशित मिति: बिहीबार, असार १८, २०७७ १३:२०