डडेल्धुरामा आजदेखि पीसीआर मेसिन सञ्चालनमा

A+ A A-

नागरिकस्तरबाट चन्दा संकलन र उद्योग वाणिज्य तथा आपूर्तिमन्त्री लेखराज भट्टको सहयोगमा खरिद गरिएको पीसीआर मेसिन डडेल्धुरामा आजबाट सञ्चालनमा आउने भएको छ ।

ह्युमानिटी फाउण्डेसन नेपाल र सुदूरपश्चिम समाज अमेरिकाद्धारा चन्दा संकलन गरी खरिद गरिएको मेसिन डडेल्धुरा अस्पतालमा आजदेखि सञ्चालनमा आउन लागेको हो ।

धनगढी प्रयोगशालामा परीक्षण गरिएका स्वाबका नमुनाको पुनः परीक्षण भइरहेको र प्रयोगशाला बिहीबारबाट औपचारिक रूपमा सञ्चालनमा आउने अस्पतालका अध्यक्ष करुणाकर ओझाले जानकारी दिए ।

अस्पतालका प्रयोगशाला प्रमुख ईश्वरी भुसाल, धनगढीस्थित सेती प्रादेशिक अस्पतालका प्रयोगशालाका इञ्चार्ज रमेश शाही र काठमाडौंबाट आएका इञ्जिनियर सहितको टोलीले पीसीआर मेसिनको गुणस्तर परीक्षण गरिहेको अध्यक्ष ओझाले बताए ।

धनगढीस्थित सेती प्रादेशिक अस्पतालका प्रयोगशालाका इञ्चार्ज शाहीले मेसिनको भ्यालिडेसन भइरहेको बताए । ‘धनगढीमा परीक्षण गरिएका स्वाबको पुनः परीक्षण पछि डडेल्धुरामा संकलित स्वाब परीक्षण गरिनेछ,’ उनले भने, ‘डडेल्धुरामा परीक्षण गरिएका स्वाबको नमुनालाई धनगढीस्थित प्रयोगशाला पुनः परीक्षण गरिने छ ।’

आजदेखि प्रयोगशाला पूर्णरूपमा सञ्चालनमा आउने उनले जानकारी दिए । पीसीआर मेसिन सञ्चालनमा आएको खवरले अत्यन्त उत्साहित भएको ह्युमानिटी फाउण्डेसनका अध्यक्ष श्याम तायलले बताए ।

पीसीआर मेसिनको अभावमा सुदूरपश्चिमका पहाडी जिल्लाका बासिन्दा परीक्षणबाट बञ्चित भइरहेका बेला ह्युमानिटी फाउण्डेसनले सुदूरपश्चिम समाज अमेरिकाको सहकार्य डडेल्धुरामा पीसीआर मेसिन स्थापनाका लागि सहयोग संकलन अभियान सुरु गरेको थियो ।

यो अभियानमा विश्वका बिभिन्न मुलुकमा रहेका सुदूरपश्चिमेली अगुवा र सुदूरपश्चिम समाजहरूले साथ दिएका थिए ।

करिब ९६ लाख रुपैयाँमा स्थापना भएको यो मेसिनले एक सिफ्टमा ९६ जना र एक दिनमा ३ सय ८४ जनाको स्वाबको नमुना परीक्षण गर्ने बताइएको छ । मेसिनको सम्पूर्ण खर्च ह्युमानिटी फाउण्डेसनले ब्यहोर्ने बताइएको छ ।

प्रकाशित मिति: बिहीबार, असार १८, २०७७ ११:१६