बझाङमा सेती नदीमा खसेर १ जना वेपत्ता

A+ A A-

जिल्लाको छबिस पाथिभेरा गाउँपालिकाको किनाल्ना भीरबाट १ जना सेती नदीमा खसेको आशंका गरिएको छ ।

मंगलरबार राति छबिस पाथिभेरा गाउँपालिका-१ जयपृथ्वी राजमार्ग अन्तर्गत भाँडेबजार र मौरीबगरको बीच भागमा रहेको किनाल्ना भस्रबाट ३२ वर्षीय गिट्टी ठेकेदार प्रतापसिंह कुलमगर मोटरसाइकलसहित खसेको आशंका गरिएको हो ।

मंगलबार राति ११ बजेतिर दुर्गाथलीबाट चैनपुर आउने क्रममा उनी डौठेल्ना घुम्तीबाट मोटरसाइकलसहित सेती नदीमा खसेको हुनसक्ने जिल्ला प्रहरी कार्यालयका प्रहरी निरीक्षक तथा सूचना अधिकारी लोकेन्द्रसिंह कार्कीले बताए ।

चैनपुरमा रहेकी श्रीमतिसँग राति १०ः३० मा कुराकानी भएको र श्रीमतिले राति नआउन आग्रह गरेपनि चैनपुरतर्फ आउँदै गर्दा सडकबाट नदीमा खसेको अनुमान गरिएको प्रहरीले जनाएको छ ।

बेपत्ता कुलमगरको घर रोल्पा लुडारी गाउँपालिका-७ मा रहेको प्रहरीले जनाएको छ । मंगलबार राति मोटरसाइकल खस्दा थलारा गाउँपालिका तर्फका राउलीका बासिन्दाले उज्यालोसहित ११ बजे सेती नदीमा खसेको प्रहरीसमक्ष बयान दिएका छन् ।

नदीमा खसेका भनिएका कुलमगरको सडकबाट केही तल चप्पल, मोबाइल र केही पैसा भेटिएको जिल्ला प्रहरी कार्यालय बझाङले जनाएको छ ।

बुधबार दिनभर बेपत्ता भएका कुलमगरको खोजीमा स्थानीय, आफन्त र प्रहरी खटिए पनि मोटरसाइकल र बेपत्ता कुलमगर नभेटिएको र खोजी कार्य जारी रहेको प्रहरीको भनाई छ ।
सेती नदीको वहाब बढी भएकाले घटनाबारे यथार्थ विवरण आउन नसकेको प्रहरीले जनाएको छ ।

एकै स्थानीय तहमा थपिए १८ संक्रमित

बझाङमा बुधबार थप १८ जनामा कोरोना संक्रमण पुष्टि भएको छ । बित्थडचिर गाउँपालिकाका ४ महिला र १४ पुरुषमा संक्रमण पुष्टि भएको हो । योसँगै बझाङ जिल्लाभित्रै संक्रमितको संख्या ९० जना पुगेको छ ।
यस्तै, बुधबार २० जना कोरोनालाई जितेर घर फर्किएका छन् । संक्रमण मुक्त हुनेमा १९ जना बुंगल नगरपालिकाका र १ जना खप्तडछान्ना गाउँपालिकाका रहेका स्वास्थ्य कार्यालय बझाङले जनाएको छ ।
योसँगै बझाङमा कोरोना मुक्त हुनेको संख्या २४ पुगेको छ । जसमा बुंगल नगरपालिकाका १९, वित्थडचिरका ३ र खप्तडछान्ना गाउँपालिकाका २ जना रहेका छन् ।

प्रकाशित मिति: बिहीबार, असार १८, २०७७ ०८:४५