जिल्ला प्रवेश गर्नेहरू अनिवार्य रूपले १४ दिन क्वारेन्टाइन बस्नुपर्ने

A+ A A-

जिल्ला प्रशासन कार्यालय धनुषाले बाहिरबाट आई जिल्ला प्रवेश गर्नेहरूलाई अनिवार्य रूपले १४ दिनसम्म क्वारेन्टाइनमा राख्ने भएको छ ।

कोरोना भाइरस नियन्त्रण, रोकथाम र उपचारलाई मुलुकभर प्रभावकारी बनाउने उद्देश्यले जिल्ला प्रवेश गर्ने व्यक्तिलाई क्वारेन्टाइनमा राख्ने निर्णय गरिएको धनुषाका प्रमुख जिल्ला अधिकारी कोषहरि निरौलाले बताए ।

कोरोना संक्रमितको संख्या बढिरहेका बेला यस जिल्लामा थप संक्रमण भित्रिन नदिन यस्तो कडाइ गरिएको उनको भनाइ छ । कोरोनाको बढ्दो संक्रमण भएका जनकपुरलगायत काठमाडौं, पोखरा, विराटनगर, नेपालगञ्ज, बुटवल, भैरहवा, वीरगञ्ज, धनगढी जस्ता बढी जनघनत्व भएका शहर तथा जिल्ला सदरमुकामहरूमा आवतजावत गर्दा अनिवार्य रूपमा १४ दिन स्थानीय तहका क्वारेन्टाइन अथवा होम क्वारेन्टाइनमा बस्ने व्यवस्था भएपछि मात्र आवागमनको अनुमति दिनेगरी व्यवस्था मिलाउन गृह मन्त्रालयले निर्देशन दिएको जिल्ला प्रशासन कार्यालय धनुषाका सूचना अधिकारीसमेत रहेका प्रशासकीय अधिकृत गणेश मिश्रले बताए ।

कोरोना भाइरसको विश्वभर महामारी फैलिएसँगै यस जिल्लामा २ हजार १ सय १५ बेड क्षमताका ५२ वटा क्वारेन्टाइन निर्माण गरिएको छ । यस जिल्लामा अहिले ६ सय ३८ जना क्वारेन्टाइनमा र ४ सय जना होम क्वारेन्टाइनमा छन् भने १ सय ४५ बेड क्षमताको आइसोलेसनमा ८१ जनालाई राखिएको छ ।

प्रदेश २ मा संक्रमितको संख्या ३ हजार ४ सय ३९ पुगेको छ । संक्रमितमध्ये ३ हजार २ सय २८ पुरुष र २ सय ११ जना महिला रहेको प्रदेश स्वास्थ्य निर्देशनालयका वरिष्ठ जनस्वास्थ्य प्रशासक विजयकुमार झाले जानकारी दिएका छन् ।

प्रदेशभर मंगलबारसम्म ४३ हजार ४६ जनाको स्वाब सङ्कलन गरिएकामा ३ हजार ४ सय ३९ जना संक्रमित भएका छन् भने ३६ हजार २ सय ६७ जनाको रिपोर्ट नेगेटिभ आएको छ । त्यस्तै, सप्तरीमा ३ सय ६६, सिरहामा ५ सय १७, धनुषामा ३ सय ६७, महोत्तरीमा ५ सय ८२, सर्लाहीमा २ सय ५०, रौतहटमा ६ सय ६३, बारामा १ सय ३९ र पर्सामा ४ सय ५६ जना गरी कुल ३ हजार ३ सय ४० जनाको रिपोर्ट आउन बाँकी रहेको सामाजिक विकास मन्त्रालयले जनाएको छ ।

प्रदेश २ का आठवटै जिल्लाका विभिन्न ठाउँहरूमा निर्माण गरिएका ३१ हजार ८ सय १६ बेड क्षमताका ४ सय ५५ वटा क्वारेन्टाइनमा अहिले ६ हजार ६ सय ४४ जनालाई राखिएको छ भने १६ हजार ४ सय १८ जनालाई होम क्वारेन्टाइनमा पठाइएको छ ।

प्रदेशका आठवटै जिल्लाका विभिन्न ठाउँहरूमा सञ्चालनमा रहेका १ हजार ७ सय ९६ बेड क्षमताका आइसोलेसनमा ८ सय ४ जना बिरामीलाई भर्ना गरिएको वरिष्ठ जनस्वास्थ्य प्रशासक झाले जानकारी दिए ।

प्रदेश २ मा सबैभन्दा बढी रौतहट जिल्लामा १ हजार २ सय ७ जनाको रिपोर्ट पोजिटिभ आएको छ । त्यस्तै, सर्लाहीमा ६ सय २४, महोत्तरीमा ६ सय २१, धनुषामा ३ सय ५२, सप्तरीमा १ सय ९४, सिरहामा १ सय ७१, पर्सामा १ सय ५९ र बारामा १ सय ११ जना व्यक्तिमा कोरोना संक्रमण पुष्टि भएको हो । यससँगै हालसम्म यस प्रदेशमा सप्तरीका १ सय ४, सिरहाका ६२, धनुषाका २ सय ५६, महोत्तरीका १ सय ५४, सर्लाहीका ४ सय ७८, रौतहटका ४ सय २, बाराका ९८ र पर्साका १ सय ७१ जना गरी १ हजार ७ सय २५ जना संक्रमितहरू डिस्चार्ज भई आआफ्नो घर फर्किसकेका छन् ।

प्रदेश २ मा हालसम्म रौतहट, बारा र पर्साका १-१ जना गरी ३ जनाको कोरोना संक्रमणका कारण मृत्यु भइसकेको छ ।

प्रकाशित मिति: बुधबार, असार १७, २०७७ १६:०४