भारत र बेलायतका गोर्खा रेजिमेन्ट सन्तानलाई पनि नागरिकता

A+ A A-

जनता समाजवादी पार्टीले गोरखा भर्ती हुँदै भारत र बेलायत पुगेका नेपालीका सन्तानलाई नागरिकता दिनुपर्ने नयाँ माग अघि सारेको छ ।

वैवाहिक अंगीकृतलाई ७ वर्षपछि मात्र नागरिकता दिलाउने निर्णयको विरोधमा आयोजित कार्यक्रममार्फत् गोर्खा भर्तीमा गएकाका सन्तानलाई वंशजको नागरिकता दिलाउन माग गरेका हुन् ।

‘नेपाल-भारत-बेलायतबीच राज्यस्तरको सहमतिअनुसार नेपालीहरू भारत र बेलायत पुगेका हुन् तर तिनका सन्तानले नागरिकता पाउन सकेका छैनन्’, सजपा नेता शरदसिंह भण्डारीले शिलापत्रसँग भने, ‘गोर्खा भर्तीबाट बेलायत र भारत पुगे पनि त्यो राज्यस्तरीय सहमति भएकाले उनका सन्तानले नेपाली नागरिकता पाउनुपर्छ ।’

सन १९४७ मा भारतबाट बेलायत फर्किंदा भारतमा १२ वटा गोर्खा रेजिन्मेन्ट रहेको र बेलायतले त्यसमध्ये ६ वटा आफूसँग लगेको र ४ वटा भारतमा छाडेको उल्लेख गर्दै भण्डारीले त्यसमा संलग्न नेपालीका सन्तानलाई नेपाली नागरिकता दिलाउनुपर्ने जनाए ।

‘गोर्खा भर्तीमा गएकाहरूले त्यहीँ सन्तान जन्माए, उतैको नागरिकता लिए, यताको पाउन सकेनन्’, भण्डारीले भने, ‘जस्तो: एनआरएन आफ्नै खुसीले गएका हुन् तर गोर्खा भर्ती राज्यस्तरका सम्झौताबाट गएका हुनाले उनीहरूका सन्तानले नेपाली नागरिकता पाउनुपर्ने हाम्रो माग हो ।’

उनका अनुसार बेलायतका ६ र भारतका ४ गोर्खा रेजिन्मेन्टमा गएका सन्तानले नेपाली नागरिकता दिलाउनुपर्ने जसपाले औपचारिक निर्णय गरेर प्रदर्शनमा उत्रिएको हो ।

गोर्खा भर्तीको क्रममा भारत, बेलायत, ब्रुनाई, सिंगापुरलगायतका देशमा बसेका नेपालीहरूका सन्तान उतै जन्मिएर उतै नागरिकता लिने गरेकाले नेपाली नागरिकता प्राप्त गर्नबाट बञ्चित भएको भन्दै जसपा पहिलो पटक प्रदर्शनमा उत्रिएको हो ।

उता, नेपाली नागरिकसँग विवाह गर्ने विदेशी महिलाले ७ वर्षपछि मात्र नागरिकता पाउने नयाँ प्रावधानको विरोधमा उत्रिएको जनता समाजवादी पार्टीले नेपाली महिलासँग विवाह गर्ने पुरुषलाई पनि नागरिकता दिनुपर्ने माग पनि अघि सारेको छ ।