सरिता गिरीलाई स्पष्टीकरण, भन्छिन् : जवाफ लेख्दै छु

A+ A A-

नेपालको निशान छाप संशाेधन प्रस्ताव खारेजीको प्रस्ताव दर्ता गरेको र संशाेधनको पक्षमा मतदान नगरेको भन्दै समाजवादी पार्टीले सांसद सरिता गिरीलाई स्पष्टीकरण सोधेको छ ।

गत ११ असारमा पत्र बुझेकी सांसद गिरीलाई ७ दिनभित्रमा जवाफ दिन निर्देशन दिएपछि गिरीले जवाफ लेखिरहेकी छन् । उनलाई पार्टीले १९ असारभित्रमा स्पष्टीकरण बुझाउनुपर्ने भन्दै समयसीमा तोकिदिएको छ ।

‘पार्टीले सोधेको स्पष्टीकरणको पत्र मैले ११ गते बुझेँ, अहिले म त्यसको जवाफ लेखिरहेकी छु’, गिरीले शिलापत्रसँग भनिन् । गत ३१ जेठमा निशान छाप परिवर्तनका लागि भएको संविधान संशाेधनमा मत नहाली संशाेधनविरुद्ध अभिव्यक्ति दिएपछि समाजवादी पार्टीले गिरीसँग स्पष्टीकरण सोधेको हो ।

यसअघि संशाेधन प्रस्तावविरुद्ध संशाेधन दर्ता गराएपछि पार्टीको संसदीय दलले फिर्ता लिन निर्देशन दिँदै कारबाहीको चेतावनी दिएको थियो ।

संसदमा सर्वसम्मत रूपमा निशान छाप परिवर्तन भएको दिन सांसद गिरीले पार्टीको निर्देशनविपरीत प्रतिनिधिसभाका सभामुख अग्निप्रसाद सापकोटासँग समय माग गरेकी थिइन् । तर, सभामुख सापकोटाले बोल्न नदिएपछि संसद भवन छाडेर निस्केपछि उनी विवादित बनेकी थिइन् ।

सरकारले निशान छाप परिवर्तन गर्नका लागि संविधान संशाेधनको प्रस्ताव गरेपछि समाजवादीकी सांसद गिरीले त्यसमा संशाेधनको प्रस्ताव दर्ता गराएकी थिइन् । ‘स्रोत र प्रमाण नखुलाएकाले विधेयकको दफा (२) हटाउनुपर्ने’ भन्दै २८ जेठमा उनले संविधान संशाेधनको प्रस्तावमाथि संशाेधन दर्ता गरेकी थिइन् ।

पार्टीको नीतिविपरीत संशाेधन हालेको भन्दै समाजवादीका प्रमुख सचेतक उमाशंकर अरगरियाले संशाेधन फिर्ता लिन निर्देशन दिएका थिए । निर्देशनमा प्रस्ताव फिर्ता नलिए कारबाही गर्ने चेतावनी पनि थियो ।

‘उपरोक्त सबन्धमा संघीय संसदमा दर्ता भएको नेपालको संविधानको दोस्रो संशाेधनमा तपाईंले संसदीय दलको निर्देशनविना मिति २०७७ जेठ २८ गते संशाेधन हालेको हुँदा उक्त संशाेधन तुरुन्त फिर्ता लिनुहुन निर्देशन गरिन्छ,’ प्रमुख सचेतक अरगरियाले गिरीलाई दिएको निर्देशनमा भनिएको थियो, ‘साथै, निर्देशन पालना नगरेमा तपाईंमाथि कारबाही गर्न पार्टी बाध्य हुने ब्यहोरा जानकारी गराइन्छ ।’

तर, पार्टीले दिएको निर्देशन अस्वीकार गरी संशाेधन फिर्ता नलिएपछि सभामुख सापकोटाले प्रतिनिधिसभा नियमावलीअनुसार अस्वीकार गरिदिएका थिए ।

प्रस्ताव अस्वीकार भएपछि गिरीले संशाेधनको पक्ष वा विपक्षमा मतदान नगरी संसदबाट बाहिरिएकी थिइन् ।

समाजवादी पार्टीका प्रचार विभाग उपप्रमुख विश्वदीप पाण्डेले ट्वीट गर्दै भनेका थिए, ‘सरिताजीले हिजो दर्ता गरेको संशाेधन फिर्ता लिनु भएन भने पार्टीले उहाँलाई सांसद पदबाट मात्र होइन, पार्टीको साधारण सदस्यसमेत नरहने गरी निष्कासन गर्नेछ, जसपाको स्पष्ट कुरा यही हो ।’

समाजवादीको ८ असारमा बसेको पदाधिकारी बैठकले गिरीलाई स्पष्टीकरण सोध्ने निर्णय गरेपछि गिरीले ११ गते पत्र बुझेकी हुन् । उनको जवाफ चित्तबुझ्दो भएन भने उनको सांसद पद खारेजीदेखि पार्टी निष्कासनसम्म हुने समाजवादीका एक नेताले जानकारी दिए ।

प्रकाशित मिति: सोमबार, असार १५, २०७७ १३:३९