कसले हटाउन खोज्यो प्रधानमन्त्री ओलीलाई ?

A+ A A-

‘अहिले हाम्रो मुलुकमा विचित्रको स्थिति छ । विदेशीले यसो गर, उसो गर भन्छन् । म भन्छु– हाम्रा मित्रहरूले मित्रको स्थानमा बसेर हामीसँग व्यवहार गरून् । छौँडा खेलाएर रातदिन दुःख दिने होइन । अत्यन्तै बेठीक तरिका हो यो’, आफ्नो पहिलो कार्यकाल सम्हालिरहेका बेला १५ साउन २०७३ मा प्रधानमन्त्री केपी शर्मा ओलीले एउटा कार्यक्रममा भनेका थिए, ‘सरकार सचेत जनताको घेरामा हुनेछ । सरकार चल्ने त नेपालमै हो । बाहिर गएर सरकार चल्ने त होइन होला नि ! नयाँ पिँढी यसरी जागेको छ, तलमाथि गर्न सकिने सम्भावना छैन ।’

चीनसँग भएका विभिन्न सम्झौतालाई लिएर भारत चिढिएको, विपक्षी र सत्ता साझेदार दल माओवादी केन्द्रले अप्ठेरो पारेका बेला प्रधानमन्त्री ओलीले यस्तो गुनासो गरेका थिए । राजीनामा गर्न उनीमाथि दबाब बढ्दै जाँदा उनले भारतकै इशारामा आफूमाथि षड्यन्त्र भइरहेको बताएका थिए । राजीनामापछि संसदमा उनले भनेका थिए, ‘भारतले मलाई रातदिन छौंडा खेलाएर दुःख दिएको छ, अब बन्ने प्रधानमन्त्रीले पनि यो कुरा बुझून् ।’

आइतबार प्रधानमन्त्री ओलीले यस्तै खालको अभिव्यक्ति दिएकाले माथि पुरानो प्रसङ्ग उप्काइएको हो । बालुवाटारमा मदन भण्डारी फाउन्डेसनले आयोजना गरेको कार्यक्रममा प्रधानमन्त्री ओलीले आफूलाई हटाउन शक्तिसमूह सक्रिय भएको बताएका छन् । दूतावास र होटलमा गतिविधि बढेको उनको भनाइ छ । आफ्नै पार्टीभित्र ‘रेलिगेसन’ मा परेका ओलीको इशारा भारततिर छ ।

ओली अभिव्यक्तिले केही प्रश्न जरुर उब्जाएको छ । दुईतिहाइनजिक मतको बलमा उभिएको सरकारको प्रमुखले एउटा सामान्य कार्यक्रममा गएर यति विघ्न दुःखपुकारा गर्नुलाई सामान्य मान्न सकिएला ?, के ओली नेतृत्वको सरकार ढाल्न भारत सक्रिय छ ? भारतले अझै नेपालमा सरकार ढाल्न सक्छ ? अरु पार्टीले साथ नै नदिए पनि ओलीलाई प्रधानमन्त्रीमा टिकाउन नेकपाकै सांसद काफी छन्, त्यसो भए उनलाई कसले हटाउने ? र किन ? कि प्रधानमन्त्री ओली महामारीका बीच सरकारका तर्फबाट भए/गरेका कमीकमजोरीबाट जनताको ध्यान मोड्न यसो भनिरहेका छन् ? वा ‘राष्ट्रवादको वाण’ फ्याँकेर विरोधी र आलोचकलाई कमजोर बनाउन चाहन्छन् ?

सत्तारूढ नेपाल कम्युनिस्ट पार्टी लामो समययता अन्तरकलहमा छ । विवाद र असन्तुष्टिमा खासगरी प्रधानमन्त्रीसमेत रहेका पार्टी अध्यक्ष ओली नै परिक्षिप्त छन् ।

यस्तै विवादका बीच गत वैशाखकाे दोस्रो साता नेकपाकै नेताहरूले प्रधानमन्त्री पदबाट राजीनामा गर्न उनलाई चर्को दबाब दिएका थिए । त्यतिबेला उपाध्यक्ष वामदेव गौतमलाई प्रधानमन्त्री बनाउने प्रस्ताव राखेर ओली उम्किए ।

अहिले फेरि पार्टीभित्रबाट ओलीलाई राजीनामा गर्न चर्को दबाब पर्न थालेको बताइन्छ । नेकपाका कतिपय असन्तुष्ट नेता भन्छन्, ‘आलोचना हुन्छ भनेर ओली स्थायी कमिटी बैठक छलिरहेका छन् ।’

अर्कातिर मुलुक कोरोना महामारीले आक्रान्त छ । जनस्तरबाट गुनासैगुनासा आइरहेका छन् । जनस्वास्थ्यलाई लिएर प्रभावकारी काम गर्न नसकेको भन्दै सरकारको आलोचना भइरहेको छ । यही बेला स्वास्थ्य सामाग्री खरिद गर्दा भ्रष्टाचार भएको कुरा बाहिर आएको छ । एमसीसीबारे पनि प्रश्न यथावत् छ । कतिपय मन्त्रीहरूको कामकारबाही र भूमिकामाथि चौतर्फी प्रश्न उठिरहेको छ ।

तर, ओली यी सबै समस्याभन्दा कुर्सी धरापमा परेको विषयले बढी सुर्ताएका देखिन्छन् । त्यसैले उनले विगतकै जस्तो ‘फर्मुला’ अपनाउन थालेका नेकपाकै कतिपय नेताको अड्कल छ । एक स्थायी कमिटी सदस्य प्रश्न गर्छन्, ‘होइन भने ओली सरकारमाथि उठेका यावत् प्रश्नको जवाफ दिन छाडेर गथासोमै किन सीमित बनिरहनुभएको छ उहाँ ?’,

पार्टी र सरकार सञ्चालनका क्रममा भएका कमजोरी, जनस्तरबाट प्रकट भइरहेका असन्तुष्टि, जनताको सुरक्षा तथा समृद्धिको विषयमा बोल्नुपर्ने प्रधानमन्त्रीले सरकार ढाल्ने षड्यन्त्र भइरहेको भनी उम्किन खोजेको बुझाइ राजनीतिक विश्लेषकहरूको छ ।

विश्लेषक डा. ऋषिराज बराल प्रधानमन्त्रीको अभिव्यक्तिले उनलाई कुर्सीभन्दा अरु कुनै कुराको चिन्ता नरहेको भन्ने कुरा झल्काएको बताउँछन् । उनी भन्छन्, ‘आफू दबाबमा परेपछि अरुलाई दोष लगाएर समस्याबाट उम्किने प्रयास गर्ने ओलीको पुरानै बानी हो’, डा. बराल भन्छन्, ‘नेपाली जनताका कैयन् समस्या, मुलुकको आवश्यकताका विषयमा भन्दा उहाँलाई आफ्नो कुर्सीको चिन्ता बढी रहेछ ।’

नयाँ नक्सा जारी गर्ने निर्णयको सम्पूर्ण जस आफूले लिनुका साथै यसैमा गर्व गरी अन्य सम्पूर्ण विषय ‘डाइभर्ट’ गर्ने प्रयास पनि ओली अभिव्यक्तिमा झल्किएको बरालको बुझाइ छ ।

राजनीतिक विश्लेषक खगेन्द्र प्रसाईं मुलुकको प्रधानमन्त्रीले अत्यन्तै हल्का र अपरिपक्व टिप्पणी गरेको बताउँछन् । ‘काम कुरा एकातिर छ, कुम्लो बोकी थिमीतिर भनेजस्तो भयो । मुलुक र आमनागरिकको आवश्यकता के छ, उनीहरू किन गुनासो गरिरहेका छन्, पार्टीभित्र के चलिरहेको छ, सबै कुरालाई कसरी व्यवस्थापन गर्ने, कहाँ कस्तो नीतिगत सुधारको खाँचो छ भन्नेजस्ता कुरा बेवास्ता गरी प्रधानमन्त्रीजस्तो व्यक्तिले मेरो कुर्सी खोस्न लागे भनेर रुवाबासी गर्नु अति नै अशोभनीय कुरा हो’, प्रसाईं भन्छन् ।

ओलीले भनेका छन्, ‘अहिले केपी ओलीलाई हटाउनुपर्छ भनेर खुला दौडधुप भएका छन् । भित्रभित्र यस्तो अपराध गर्ने मान्छेलाई राख्नु हुन्न भन्न थालिएको छ । नक्सा छापेकोलाई अपराध भनेका छन् । मलाई हटाउन होटलहरूमा गतिविधि भएका छन् । राजदूतावासमा सक्रियता बढेको छ ।’

ओलीको यो भनाइले प्रश्न अरु पनि जन्माउँछ, प्रधानमन्त्री ओलीले आफूविरुद्ध दूतावासले षड्यन्त्र गरेको कसरी थाहा पाए त ? थाहा पाएपछि प्रधामन्त्रीले अनौपचारिक टिप्पणी गर्दै हिँड्ने कि राजदूतलाई बोलाएर सोध्ने ? उनले पाएको सूचना सही हो भने दूतावासले सरकारविरुद्ध गतिविधि गर्न मिल्छ ?

कूटनीतिज्ञ डा. दिनेश भट्टराई कुनै पनि राजदूतावासले सरकारविरुद्ध गतिविधि गर्न नसक्ने बताउँछन् । ‘कुनै देशका राजदूतले सरकारविरुद्ध गतिविधि गरेको कुरा थाहा भएमा प्रधानमन्त्रीले तत्काल सम्बन्धित राजदूतलाई बोलाएर प्रश्न सोध्न सक्छन्’, उनी भन्छन् ।

राजनीतिक विश्लेषक प्रसाईं यस्तो गहन विषयमा प्रधानमन्त्रीले हल्का टिप्पणी गर्नुलाई अपरिपक्वता र हताश मानसिकताको उपज ठान्छन् । ‘कसैलाई आरोप लगाइरहँदा प्रधानमन्त्री आफ्नो हैसियत र मर्यादाको ख्याल गर्नुपर्छ कि पर्दैन ? राजकीय हिसाबले प्रधानमन्त्रीको अभिव्यक्ति जायज होइन,’ उनी भन्छन् ।

प्रकाशित मिति: सोमबार, असार १५, २०७७ १२:५१