साझासँग ३ अर्ब फिर्ता लिएको ५ महिनापछि सरकारले अघि बढायाे विद्युतीय बस खरिद प्रक्रिया

साझासँग ३ अर्ब फिर्ता लिएको ५ महिनापछि सरकारले अघि बढायाे विद्युतीय बस खरिद प्रक्रिया

A+ A A-

सरकारले विद्युतीय बस किन्ने प्रक्रिया अघि बढाएको छ । साझा यातायातलाई दिएको ३ अर्ब फिर्ता लिएको ५ महिनापछि सरकारले विद्युतीय बस खरिद प्रक्रिया अघि बढाएको हो ।

यसका लागि उत्पादक र आपूर्तिकर्ता कम्पनीसँग बससम्बन्धी विस्तृत विवरण माग गरिएको भौतिक पूर्वाधार तथा यातायात मन्त्रालयका सहसचिव एवं विद्युतीय बस खरिदका लागि गठित समितिका संयोजक प्रमिला बज्राचार्यले जानकारी दिइन् ।

उनका अनुसार ब्याट्रीबाट चल्ने विद्युतीय बस उत्पादन गर्ने विभिन्न अन्तर्राष्ट्रिय कम्पनीसँग बस उत्पादनबारे विस्तृत विवरणसहितको जानकारी लिइएका हो । ‘अहिले बजारमा कस्ता विद्युतीय बस उपलब्ध छन्, तीमध्ये नेपालको भौगोलिक परिवेशमा कस्तो बस उपयुक्त हुन सक्छ, यिनै विवरण बस उत्पादन कम्पनीसँग माग गरिएको छ’, उनले भनिन् ।

उत्पादक र आपूर्तिकर्तासँग मन्त्रालयले आगामी १ जुलाईसम्म प्राप्त हुने गरी आफूसँग उपलब्ध विद्युतीय बसबारे विस्तृत जानकारी माग गरेको छ । विवरण प्राप्त भएपछि उपयुक्त स्पेसिफिकेसन बनाएर विद्युतीय बस खरिद गर्ने योजना मन्त्रालयको छ ।

संयोजक बज्राचार्यले काठमाडौं उपत्यकासहित मुलुकका अन्य भूभागमा विद्युतीय बस सञ्चालन गर्ने योजनाअनुसार मन्त्रालयले खरिद प्रक्रिया अघि बढाएको बताइन् ।

नेपालमा विद्युतीय बस खरिदका लागि मन्त्रालयले मापदण्डसँग मेल खाएका बस निर्माण कम्पनीसँग थप प्रक्रिया अगाडि बढाइने उनले जानकारी दिइन् ।

विवरणसँगै बसको आकार, लम्बाइ, चौडाइ, सिट क्षमता, बसको खरिद मूल्य, मर्मतसम्भार खर्च, ब्याट्रीकको क्षमता, नेपालमा उक्त बसको स्पेयर पार्ट्सको उपलब्धताको अवस्थालगायत विषयमा विवरण माग गरिएको छ ।
विद्युतीय बसको प्रभावकारी सञ्चालनपछि बढ्दो प्रदूषण न्यूनीकरण हुने अपेक्षा गरिएको छ ।

प्रकाशित मिति: सोमबार, असार १५, २०७७ ०७:३०