सुदूरपश्चिममा थप २२८ जनामा कोरोना पुष्टि, संक्रमितको संख्या २ हजार नाघ्यो

A+ A A-

सुदूरपश्चिममा थप २ सय २८ जनामा कोरोना पुष्टि भएको छ । राष्ट्रिय जनस्वास्थ्य प्रयोगशाला काठमाडौं, शिक्षण अस्पताल काठमाडौं, धनगढी प्रयोगशाला र वीर अस्पतालको प्रयोगशालामा भएको परीक्षणमा शनिबार २ सय २८ जनामा कोरोना पुष्टि भएको हो ।

स्वास्थ्य तथा जनसङख्या मन्त्रालयका अनुसार बाजुराका ८६ जना, डोटीका ६१ जना, कैलालीका २५ जना, बैतडी २४, अछामका १३, डडेल्धुराका ८ जना, बझाङका ८ र कञ्चनपुरका ३ जनामा कोरोना पुष्टि भएको हो ।

राष्ट्रिय जनस्वास्थ्य प्रयोगशालामा भएको परीक्षणमा डोटीका १५ महिला र ३१ पुरुष गरी ४६ जना, बैतडीका ६ महिला र १८ पुरुष गरी २४ जना, कैलालीका २ महिला र ६ पुरुष गरी ८ जना, डडेल्धुराका २ महिला र ६ पुरुष गरी ८ जना, बाजुराका १ महिला र ३ पुरुष गरी ४ जना, कञ्चनपुरका ३ पुरुष, अछामका १ महिला र १२ पुरुष गरी १३ जना र बझाङका ४ पुरुषमा कोरोना पुष्टि भएको मन्त्रालयका प्रवक्ता डा. जागेश्वर गौतमले बताए ।

उनका अनुसार शिक्षण अस्पताल काठमाडौंमा गरिएको परीक्षणमा बाजुराका ३२ महिला र ५० पुरुष गरी ८२ जनामा कोरोना पुष्टि भएको छ भने विर अस्पतालको प्रयोगशालामा बझाङका १ महिला र ३ पुरुष गरी ४ जनामा संक्रमण पुष्टि भएको छ । सोही प्रयोगशालामा डोटीका २ पुरुषमा पनि कोरोना पुष्टि भएको छ ।

धनगढी प्रयोगशालामा भएको परीक्षणमा कैलालीका १७ र डोटीका १३ जनामा कोरोना पुष्टि भएको छ । कैलालीको लम्कीचुहा नगरपालिकामा १४ र कैलालीकै स्थानीय तह नखुलेका २ र भजनीमा १ जनामा कोरोना पुष्टि भएको सेती प्रादेशिक अस्पतालका सूचना अधिकारी दिलीप कुमार श्रेष्ठले बताए ।

डोटीका ७ जनाको स्थानीय तह खुलेको छैन् भने शिखर नगरपालिका ६ जनामा कोरोना पुष्टि भएको छ । ३० जना संक्रमितमध्ये १३ जना महिला र १७ जना पुरुष रहेका छन् ।

योसँगै सुदूरपश्चिम प्रदेशमा कोरोना संक्रमितको सङख्या २ हजार १ सय १४ पुगेको छ । अहिलेसम्म सबैभन्दा बढी कैलालीका ५ सय ७४ जनामा कोरोना पुष्टि भएको छ । पुष्टि भएका ६ जनाको मृत्यु भइसकेको छ भन २ सय ४४ जना विभिन्न अस्पतालबाट डिस्चार्ज भएका छन् ।

प्रकाशित मिति: शनिबार, असार १३, २०७७ १८:२१