प्रदेश १ मा शनिबार थप १४ जनामा कोरोना पुष्टि, इलाममा फेरि थपिए ५ संक्रमित

A+ A A-

प्रदेश-१ मा शनिबार १४ जनामा कोरोना संक्रमण पुष्टि भएको छ । प्रदेश १ सामाजिक विकास मन्त्रालयका अनुसार शनिबार मोरङको बूढीगंगा गाउँपालिकाका १ महिला र १ पुरुषमा कोरोना संक्रमण पुष्टि भएको छ ।

त्यसैगरी उदयुरको त्रियुगा नगरपालिकाका ३ महिला ४ पुरुष र इलामको सुर्योदय नगरपालिकाका ५ जना पुरुषमा कोरोना संक्रमण पुष्टि भएको सामाजिक विकास मन्त्रालयले जनाएको छ ।

शनिबार पुष्टि भएकासँगै प्रदेश १ मा कुल कोरोना संक्रमितको संख्या ५ सय ३३ पुगेको छ । प्रदेश १ को झापा जिल्लामा हालसम्म सवैभन्दा बढी २ सय १५ जनामा कोरोना संक्रमण पुष्टि भएको छ ।

त्यसैगरी, मोरङमा १ सय ३५, सुनसरीमा ८५, धनकुटामा ८, भोजपुरमा ६, खोटाङमा ४, उदयपुरमा ५९, सोलुखुम्बु र ओखलढुंगामा १/१, संखुवासभामा २, इलाममा ७ , तेह्रथुम र पाँचथरमा ३/३, र ताप्लेजुङमा ४ जनामा कोरोना संक्रमण पुष्टि भएको छ ।

कोरोना जितेर घर फर्किनेको संख्या वृद्धि भएसँगै प्रदेश-१ क्रमशः कोरोनामुक्त हुँदै गएको छ । प्रदेशका धनकुटा, भोजपुर, खोटाङ, सोलुखुम्बु, संखुवासभा, तेह्रथुम र ताप्लेजुङ जिल्ला कोरोनामुक्त भएको छ । संक्रमित कोरोना जितेर डिस्चार्ज भएसँगै ती जिल्ला कोरोना मुक्त भएका हुन् ।

प्रदेशमा शनिबारसम्म कोरोना पुष्टि भएका मध्ये ३ सय ७७ जना कोरोनामुक्त भएर घर फर्किएका छन् । प्रदेश-१ अन्तर्गत झापा जिल्लामा संक्रमण पुष्टि भएकामध्ये १ सय ६५, मोरङका ८३, सुनसरी ५६, धनकुटा ८, भोजपुर ६, खोटाङ ४, उदयपुर ४१ सोलुखुम्बु १, संखुवासभा २, तेह्रथुम ३, इलाम २, पाँचथर २ र ताप्लेजुङका ४ जना कोरोना जितेर घर फर्किएको मन्त्रालयले जनाएको छ ।

प्रदेश १ मा शनिबार पुष्टि भएकासँगै १ सय ४२ जना उपचाररत रहेका छन् । आज पुष्टि भएकाहरूको उपचारको व्यवस्थापन कार्य भइरहेको जनाइएको छ । प्रदेश १ मा हालसम्म २२ हजार १ सय ७३ जनाको नमुना संकलन तथा पीसीआर परीक्षण गरिएको छ । त्यसमध्ये २० हजार ९ सय ८९ जनाको रिपोर्ट नेगेटिभ आएको मुख्यमन्त्री कार्यालयले जनाएको छ ।

प्रकाशित मिति: शनिबार, असार १३, २०७७ १७:५०