यातायात कार्यालयमा सेवाग्राहीको बढ्दो भीड, छैन सुरक्षा सतर्कता

A+ A A-

सरकारले कोभिड-१९ सङ्क्रमण रोकथाम तथा नियन्त्रणका लागि भीडभाडमा रोक लगाएको छ । तर, ललितपुरको एकान्तकुनास्थित यातायात व्यवस्था कार्यालयमा यो नियम लागू भएको देखिएको छैन । कार्यालय हाताभित्र सवारी चालक अनुमति पत्र लिन र नवीकरण गर्न लाइनमा उभिनेहरूको बिहीबार ठूलो भीड देखिन्थ्यो ।

विश्व स्वास्थ्य सङ्गठनले भनेको न्यूनतम सामाजिक दूरी त के, कसैलाई नछोई कार्यालय भित्र पस्न मुश्किल पर्ने देखिन्थ्यो । हुन त कार्यालयभित्र प्रवेश गर्नेवित्तिकै सुरक्षा गार्ड स्यानिटाइजर लिएर बसेका त छन् तर बढ्दो भीडका कारण सबै हातमा स्यानिटाइजर लगाउन सम्भव देखिएको थिएन ।

सामाजिक दूरी कायम गराउनका लागि त्यहाँ रेखाङ्कन पनि गरिएको छ । तर, कसैले दूरी कायम गरेका छैनन् । अलिकति खाली ठाउँ राखे अर्कोले पालो मिच्ला भन्ने पीर सेवाग्राहीमा देखिन्थ्यो । अधिकांश सेवाग्राहीले नाक र मुख छोप्ने गरी मास्क झुन्ड्याएका थिए । तर, सामाजिक दूरी कसैले कायम गरेका थिएनन् । कसैलाई कोरोना भएको रहेछ भने अरुलाई सर्न पनि सक्छ ।

सेवाग्राहीको गुनासो

चालक अनुमतिपत्रका लागि झण्डै डेढ वर्ष पहिले लिएको परीक्षामा पास भएका धापाखेलका सुमन महर्जन बिहिबार चालक अनुमतिपत्र लिनका लागि एकान्तकुनास्थित यातायात व्यवस्था कार्यालय पुगे । झण्डै २ बजे पुगेका उनी लाम बस्दाबस्दै पालो नआएपछि रित्तो हात फर्कनु परेको बताए । चालक अनुमतिपत्रका लागि कार्यालयले लिएको परीक्षा पास गरेपछि उहाँ यस अघि नै तीन पटक कार्यालय पुगेका थिए । अनुमतिपत्र नआएको जवाफ पाएपछि यसअघि आफू तीन पटक कार्यालय पुगेर फर्किएको उनले बताए । यस पटक भने धेरै अनुमतिपत्र छापिसकेको भन्ने समाचार सुनेर आएको उनले बताए ।

त्यस्तै, चालक अनमतिपत्र नवीकरणका लागि कार्यालय पुग्नुभएकी सीमा भण्डारी काम नै नबनेपछि फर्किएका थिए । अनुमतिपत्र लिन जाँदा कार्यालयमा देखिएको भीडका कारण अनुमतिपत्र नलिई फर्किएको उनले बताए । सरकारले सबैतिर सामाजिक दूरी कायम गर्न भनेपनि यातायात कार्यालयमा त्यसको पालना नभएको उनले बताए ।

सरकारले असारको १ गतेबाट सबै सरकारी कार्यालय खुलाएसँगै यातायात कार्यालयमा सेवाग्राहीको भीड बढेको हो । अनुमतिपत्र नयाँ वा नवीकरण गर्न आउनेको सङ्ख्या बढिरहेको छ । सेवाग्राहीको भीडका कारण एकातिर सङ्क्रमणको जोखिम बढेको छ भने अर्कातिर कतिपय सेवाग्राही काम नगरी घर फर्कन बाध्य भएका छन् । सेवाग्राहीको अत्याधिक भीडभाडका कारण प्रहरीलाई भीड नियन्त्रण गर्न हम्मेहम्मे परेको छ ।

दैनिक झण्डै ४ सय नयाँ चालक अनुमतिपत्र वितरण भइरहेको यातायात व्यवस्था कार्यालय, चालक अनुमतिपत्रले जनाएको छ ।

त्यस्तै, चालक अनुमतिपत्र नवीकरण गर्न आउनेको सङ्ख्या झण्डै दुई सयको हाराहारीमा छ । त्योभन्दा बढी सेवाग्राही आएपनि फर्किने गरेको कार्यालयको प्रमुख समरबहादुर कार्कीले बताए । कार्यालयसँग यति नै सेवाग्राही फर्किए भन्ने यकिन तथ्याङ्क नभएपनि धेरै सेवाग्राही उसै फर्किएको देखिन्छ । राजस्व बैङ्कमा बुझाउनुपर्ने भएकाले २ बजेपछि आउने सेवाग्राहीको काम गर्न नसकिने उनले बताए । कार्यालयमा नयाँ अनुमतिपत्र लिने र नवीकरणका लागि आउनेहरुको भीड दुबै शाखामा भएको उनले बताए ।

कार्यालयले कोभिड-१९ को जोखिम कम गरेर सेवा दिनका लागि तयारी गरेको छ । कार्यालय हाताभित्र प्रवेश गर्दा ज्वरो नाप्ने र स्यानिटाइजरको प्रयोग गर्नेलगायतका व्यवस्था मिलाइएको छ । गोलो घेरा बनाएर सेवाग्राहीबीच सामाजिक दूरी कायम गर्ने व्यवस्था मिलाइएको छ । त्यसको पालना भने गर्न नसकिएको प्रमुख कार्कीले बताए ।

कार्यालय परिसरमा ४ जना प्रहरी खटिएको भएपनि उनीहरूलाई भीड नियन्त्रण गर्न हम्मेहम्मे परेको छ । उनले भने, ‘सेवाग्राही आफैँ सचेत नभएकाले हामीलाई बुझाउन गाहे भइरहेको छ ।’ रासस

प्रकाशित मिति: शुक्रबार, असार १२, २०७७ १९:५६