सुदूरपश्चिममा भयावह बन्दै कोरोना, प्रदेश राजधानीमै बढी लापरबाही

फाइल तस्वीर

A+ A A-

सुदूरपश्चिम प्रदेशमा कोरोना भाइरस (कोभिड-१९) सङ्क्रमण भयावह बन्दै गएको छ । हालसम्म सङ्क्रमितको सङ्ख्या १६ सय नाघी सकेको छ । क्वारेनटाइनमा नागरिकको सङ्ख्या घटे पनि सङ्क्रमण भने फैलिने क्रम बढिरहेको छ ।

तर, परीक्षण निकै सुस्त गतिमा छ । प्रदेशमा दैनिक रूपमा २ सय ५० देखि ३ सयसम्म मात्रै परीक्षण भइरहेको छ । प्रदेशमा परीक्षणको गति बढाउन नसकिँदा सङ्कलित स्वाब परीक्षणका लागि काठमाडौं पठाइँदै छ ।

संक्रमितको संख्या दिनदिनै बढ्दै गए पनि सबैभन्दा बढी चहलपहल भइरहने प्रदेशका राजधानी धनगढीमा सबैभन्दा बढी लापरबाही देखिन्छ । १३ स्थानीय तह रहेको कैलालीका २ स्थानीय तह मात्रै सिल गरिएको छ भने अन्यमा चरम लापरबाही देखिएको छ ।

सङ्क्रमितको सङ्ख्या दिनप्रतिदिन बढ्दै गएसँगै समुदायस्तरमा त्रास पनि बढेको छ । तर, प्रदेशमै सबैभन्दा बढी सङ्क्रमित रहेको जिल्ला कैलालीमा भने निकै लापरबाही देखिन्छ ।

कैलालीको गोदावरी र गौरीगंगा नगरपालिका सिल गरिएको छ भने अन्य स्थानीय तहमा भने लापरबाही बढ्दो प्रदेशको एक मात्र उपमहानगरपालिका धनगढीमा पनि कोरोनासम्बन्धी आवश्यक सावधानी अपनाइएको छैन । धनगढी उपमहानगरपालिकाका नगर प्रमुख नृप बहादुर वडले धनगढी सिल गर्ने विषयमा छलफल भइरहेको बताए ।

अहिले नागरिकलाई सावधानी अपनाउन आग्रह गरिए पनि लापरबाही देखिएकाले अब धनगढी सिल नै गर्नुपर्ने आवश्यकता देखिएको उनले बताए ।

सुदूरपश्चिम प्रदेशमा कोरोना सङ्क्रमणकै कारण ५ जनाले ज्यान गुमाएका छन् । जसमध्ये ३ जना कैलालीकै छन् । सङ्क्रमित पनि ज्यादा यहीँ जिल्लामा छन् । तर, सरकारले लकडाउन फितलो बनाएसँगै लापरबाही निकै बढेको छ ।

बजारमा सामाजिक दूरी र सुरक्षाका साधन मास्क, सेनिटाइजरको बेवास्ता गर्दै नागरिक जथाभाबी हुइँकिरहेका छन् । धनगढीकै छिमेकी स्थानीय तह गोदावरी र गौरीगंगामा गरिएको सिलका कारण अत्यावश्यक खाद्यान्नका वस्तु किन्न पनि समस्या छ, भने यता धनगढी उपमहानगरपालिकामा होटर र रक्सीका पसलले समेत निर्वात रूपमा सञ्चालन भइरहेको छन् ।

कैलालीका प्रमुख जिल्ला अधिकारी यज्ञराज बोहराले अहिले जिल्ला नै लकडाउन गर्ने बेला नआइसकेको बताए । नागरिकले आफैँले सावधानी अपनाउनुपर्ने उनको भनाइ छ ।

प्रदेशको राजधानी धनगढीमा यतिसम्म लापरबाही छ की ? यहाँका टोल टोलमा, चोक चोकमा विनासावधानी मानिसहरू जम्मा भएर भीडभाड बढाइरहेका हुन्छन् । त्यति मात्रै हैन जोखिमकै बीच पूर्ण रूपमा सञ्चालनमा आएको बजार क्षेत्रमा त सर्वसाधारण निकै चाप छ ।

प्रकाशित मिति: शुक्रबार, असार १२, २०७७ १३:१६