सुदूरपश्चिममा थप ११८ जनामा कोरोना पुष्टि, संक्रमितको सङ्ख्या १ हजार ६६७ पुग्यो

सुदूरपश्चिममा थप ११८ जनामा कोरोना पुष्टि, संक्रमितको सङ्ख्या १ हजार ६६७ पुग्यो

A+ A A-

सुदूरपश्चिममा थप १ सय १८ जनामा कोरोना पुष्टि भएको छ । राष्ट्रिय जनस्वास्थ्य प्रयोगशाला काठमाडौं, प्रादेशिक अस्पताल सुर्खेतको प्रयोगशाला र कर्णाली स्वास्थ्य विज्ञान प्रतिष्ठानको प्रयोगशालामा गरी आज १ सय १८ जनामा कोरोना पुष्टि भएको स्वास्थ्य तथा जनसङख्या मन्त्रालयले जनाएको छ ।

बिहीबार सबैभन्दा बढी कञ्चनपुरमा ६० जना, बझाङमा १८ जना, अछामका १३ जना, डडेल्धुराका १२ जना, बाजुराका ८ जना, कैलाली र बैतडीका ३/३ जना र दार्चुलाका १ जनामा कोरोना पुष्टि भएको मन्त्रालयले जनाएको छ ।

मन्त्रालयका प्रवक्ता डा. जागेश्वर गौतमका अनुसार राष्ट्रिय जनस्वास्थ्य प्रयोगशालामा भएको परीक्षणमा कञ्चनपुरका ११ महिला र ४८ पुरुष गरी ५९ जना, अछामका ४ महिला र ९ पुरुष गरी १३ जना, बैतडीका १ पुरुष, बझाङका ३ महिला र १३ पुरुष गरी १६ जना, बाजुराका २ महिला र २ पुरुष गरी ४ जना, डडेल्धुराका १ महिला र ११ पुरुष गरी १२ जना र कैलालीका २ पुरुषमा कोरोना पुष्टि भएको छ ।

यस्तै, सुर्खेत प्रादेशिक अस्पतालको प्रयोगशाला भएको परीक्षणमा बझाङका २ जना, बैतडी, दार्चुला र कैलालीका १/१ जनामा कोरोना पुष्टि भएको छ । कर्णाली स्वास्थ्य विज्ञान प्रतिष्ठान प्रयोगशालामा जुम्लामा भएको परीक्षणमा बाजुराका ४ पुरुष, बैतडी र कञ्चनपुरका १/१ पुरुषमा कोरोना पुष्टि भएको प्रवक्ता गौतमले बताए।

योसँगै सुदूरपश्चिम प्रदेशमा कोरोना संक्रमितको सङ्ख्या १ हजार ६ सय ६७ पुगेको छ । अहिलेसम्म सबैभन्दा बढी कैलालीका ५ सय ११ जनामा कोरोना पुष्टि भएको छ । डोटीमा २ सय ९ डडेल्धुरामा २ सय १७, कञ्चनपुरमा २ सय ५४, बैतडीमा १ सय ६३, अछामका १ सय २५, बाजुराका १ सय ८, बझाङमा ६२ र दार्चुलामा १३ जनामा कोरोना पुष्टि भएको छ । पुष्टि भएका ५ जनाको मृत्यु भइसकेको छ भने १ सय ७६ जना निको भएर घर फर्किसकेका छन् ।

धनगढीमा रहेको प्रयोगशालमा भने पछिल्लो २४ घण्टामा भएको परीक्षणमा सबैको रिपोर्ट नेगेटिभ आएको छ । सेती प्रादेशिक अस्पतालका सूचना अधिकारी दिलीप कुमार श्रेष्ठले पछिल्लो २४ घण्टामा १ सय ८३ जनाको कोरोना परीक्षण भएकोमा कसैमा पनि संक्रमण पुष्टि नभएको बताए ।

प्रकाशित मिति: बिहीबार, असार ११, २०७७ १७:२१