नारायणी र राप्ती नदी तटबन्धका लागि ५० अर्ब माग

A+ A A-

नारायणी नदी व्यवस्थापन आयोजनाले नारायणी र राप्ती नदी तटबन्धका लागि ५० अर्ब रुपैयाँ माग गरेको छ । सो आयोजनाले ती दुवै नदीको विस्तृत आयोजना प्रतिवेदन तयार गरी सिँचाइ विभागमा पेस गरेको छ ।

आयोजनाका सूचना अधिकारी सिनियर डिभिजनल इञ्जिनियर हरिबहादुर थापाका अनुसार ती दुवै नदीमा तटबन्ध र त्यसमाथि ग्राबेल बाटो हुनेछ ।

आयोजनाले तयार गरेको प्रतिवेदनमा नारायणी नदीको नवलपरासीतर्फ ६३ किलो मिटर तटबन्ध निर्माण गरिनेछ । यसअघि तटबन्ध गरिएको १० किलोमिटर क्षेत्रलाई मर्मत सम्भार गरिनेछ । उनका अनुसार नारायणीको चितवनतर्फ ५० किलोमिटर तटबन्ध गरिनेछ ।

पहिले निर्माण भएको १३ किलोमिटर भागलाई मर्मत गरिनेछ । राप्तीमा चितवन र मकवानपुर क्षेत्रको १ सय ५ किलोमिटर मध्ये स्वीस परियोजनाले पूर्वी चितवनमा गरेको तटबन्धको बाहेकको भूभाग तटबन्ध गरिनेछ ।

तटबन्धको माथि डिलमा ६ मिटर फराकिलो ग्राबेल सडक हुने उनले जानकारी दिए ।

नदीतर्फ ग्याबिन जालिबाट संरक्षण गरिनेछ । उनले विभागमा प्रतिवेदनको विषयमा छलफलपछि स्वीकृत भएसँगै गुरुयोजना निर्माणमा लाग्ने बताए ।

तटबन्धनमा ठूलो खर्च लाग्ने भएकाले दाता र ऋणको खोजी गरिँदै छ । राप्ती र नारायणीको चितवनतर्फको भागमा लगानी गर्न एसियन डेभलोपमेण्ट बैंकले चासो देखाएको उनले जानकारी दिए ।

सो बैंकका प्रतिनिधिहरुले स्थलगत अध्ययन गरिसकेका छन् ।

विसं २०६६ मा जनताको तटबन्धन नामक आयोजनामार्फत नारायणी नदीमा तटबन्धन थालिएको हो । पछि सोही आयोजनाको नाम परिवर्तन भएर नारायणी नदी व्यवस्थापन आयोजना भएको हो ।