लद्दाख क्षेत्रमा फेरि हलचल

A+ A A-

भारत-चीनबीचको सीमामा देखिएको तनाव कम हुने स्थिति देखिएको छैन । देपसाङ क्षेत्रमा चिनियाँ सैनिकको हलचल बढेसँगै तनावको स्थिति मत्थर नहुने देखिएको हो ।

भारतीय सञ्चारमाध्यमका अनुसार चीनको पूर्व लद्दाखको दौलत बेग ओल्डी (डीबीओ) विमानस्थलभन्दा ३० किलोमिटर दूरीमा रहेको देपसाङबाट २१ किलोमिटर परसम्म ठूलो संख्यामा सेना परिचालन गरिएको छ । यो क्याम्पमा सैन्य सवारीसाधनका साथै तोप पनि पुर्‍याइएको छ ।

चीनले यस क्षेत्रमा पेट्रोलिङ प्वाइन्ट १० दिख १३ का बीच भारतीय सेनालाई समस्या निम्त्याउन चाहेको बताइएको छ ।

यो काराकोरमछेउछाउको क्षेत्र नियन्त्रणमा लिन चाहेको भारतको बुझाइ छ, ताकि उसलाई पाकिस्तान जाने सडकका लागि ठाउँ उपलब्ध होस् । भारतले भने यो प्रोजेक्ट निर्माणलाई रोक लगाएको छ । यसअघिदेखि नै चीन र भारतबीच गलवान उपत्यका, प्याङ्गोग सो र हट स्प्रिङ्ग्स क्षेत्रमा तनाव जारी छ ।

लद्दाखको गलवान उपत्यकामा १० दिनअघि भारती र चिनिया सैनिकबीच भएको हिंस्रक झडपपछि स्याटेलाइट इमेजमार्फत नयाँ खुलास भएको भारतीय सञ्चारमाध्यमले दाबी गरेका छन् । हाई रेजोल्यूसन इमेजमा गलवान नदीको वरपरको लाइन अफ एक्चुअल कन्ट्रोल (एलएसी)को दुवैतर्फ चिनियाँ सेनाले निर्माण गरेका भौतिक संरचना र क्याम्पका सफा दृश्य देखिएका छन् ।

रिटायर्ड मेजर जनरल रमेश पधीले स्याटेलाइट इमेजका बारेमा बोल्दै गलवान उपत्यकामा चीनले योजनाका साथ सेनाका सवारीसाधन र अन्य बन्दोबस्तीका सामान जम्मा गरेको बताए । लामो समयसम्म त्यहाँ डटेर बस्न सकियोस् भन्ने उद्देश्यले नै चीनले यस्तो गरेको उनको भनाइ छ ।

हाई रेजोल्यूसन स्याटेलाइट इमेज गलवान उपत्यकामा पेट्रोल प्वाइन्ट-१४ को हो । २२ मईका दिन लिएको एक इमेजमा गलवानमा एलएसीको नजिकै एउटा मात्रै टेन्ट देखिन्छ । तर, त्यसपछिको अर्को इमेजमा एलएसीमा पाँच चिनियाँ सेना र निर्माण कार्य गर्दै गरेको देखिएको छ । १५ जूनमा भएको हिंस्रक झडपपछि यो क्रम एकाएक बढेको छ । यही १६ जूनमा लिएको अर्को इमेजमा बुल्डोज पनि देखिएको भारतीय सञ्चारमाध्यमले जनाएका छन् ।

गलवान उपत्यकामा चीन र भारतीय सैनिकबीच १५ जूनको रात हिंस्रक झडप भएको थियो । जसमा २० सैनिकको मृत्यु भएको थियो । यसमा चीनतर्फका ४० सैनिक मारिएको दाबी गरिएको छ । आक्रमणअघि उक्त ठाउँ र आसपासका क्षेत्रमा चीनले आवश्यक सामग्री जुटाइसकेको भारतीय सञ्चारमाध्यमले उल्लेख गरेका छन् ।

प्रकाशित मिति: बिहीबार, असार ११, २०७७ १३:५३