प्रदेश १ मा डीएपी मलको अभाव नहुने

A+ A A-

पूर्व क्षेत्रमा किसानलाई वर्षे धानबाली लगाउन प्रारम्भमा चाहिने रासायनिक मल डीएपीको अभाव नरहेको बताइएको छ ।

प्रदेश १ का १४ जिल्ला तथा प्रदेश २ का सिरहा र सप्तरीका किसानलाई साल्ट ट्रेडिङ र कृषि सामग्री संस्थान कार्यालय विराटनगरले उपलब्ध गराउँदै आएको रासायनिक मलमध्ये साल्ट ट्रेडिङ कार्यालय विराटनगरमा अहिले १९ हजार ८ सय २० बोरा डीएपी मौज्दात रहेको कार्यालय प्रमुख राधेश्याम चौधरीले जानकारी दिए ।

उनका अनुसार किसानले मागे जति डीएपी मल उपलब्ध गराइएको छ । केही दिनभित्र थप एक लाख बोरा डीएपी आउने भएकाले किसानलाई यो मलको अभाव हुँदैन ।

डीएपी मल किसानले धान रोप्ने समयमा खेत तयार गर्दा हाल्ने मल हो । यसको प्रतिबोरा मूल्य २ हजार १ सय ५० निर्धारण गरिएको भए पनि किसानले केही छुट हुने व्यवस्था पनि गरिएको छ ।

यसैगरी, किसानलाई आवश्यक पर्ने एसएसपी मल पनि १२ हजार ३ सय ४ बोरा मौज्दात रहेको प्रमुख चौधरीले बताए ।

रासायनिक मल उपलब्ध गराउने कृषि सामग्री संस्थान विराटनगरमा डीएपी मल १ सय ७९ मेट्रिक टन, पोटास १ सय ४२ मेट्रिक टन र कृषि चुन ३ दशमलव ६ सय ५० मेट्रिक टन मौज्दात रहेको बताइएको छ ।

संस्थानका कर्मचारी नवरत्न सुवेदीले कार्यालयका लागि २ हजार ५ सय मेट्रिक टन डीएपी केही दिनभित्र प्राप्त हुने र थप २ हजार मेट्रिक टन आउने भएकाले किसानलाई अभाव नहुने जानकारी दिए ।

कार्यालयले पूर्व क्षेत्रमा मोरङको विराटनगर, इलाम, झापाको बिर्तामोड, धनकुटा, सुनसरीको इटहरी, सप्तरीको राजविराज, सिरहाको लहान र उदयपुरको गाईघाट कार्यालयबाट सेवा प्रदान गर्दै आएको छ ।

यस्तै, कृषि सामग्री संस्थान विराटनगरमा मलखाद भण्डारण गर्ने दुई ठूला गोदाम वर्षातका कारणले पानी प्रवेश गरी नष्ट हुने भएकाले स्तरोन्नति गर्ने काम तीव्र गतिमा भइरहेको छ ।

धरान –विराटनगरको छ लेनको सडक निर्माण भइरहेको र साविकमा निर्माण भएको गोदाम सडकभन्दा गहिरो पर्न गएकाले चौरमा पानी जम्ने समस्या पनि निर्माण सम्पन्न भएपछि समाधान हुने जनाइएको छ । रासस

प्रकाशित मिति: बिहीबार, असार ११, २०७७ ११:४९