कोरोना संक्रमित बढेपछि सुदूरपश्चिमका स्थानीय धमाधम सिल

A+ A A-

सुदूरपश्चिममा कोरोना संक्रमितको संख्या दिनहुँ बढ्न थालेपछि जनस्तरमा संक्रमण फैलिने खतरा बढेको छ । यही जोखिमलाई मध्यनजर गर्दै यहाँका धेरै स्थानीय तह कोरोनाबाट बढी प्रभावित क्षेत्रलाई सिल गर्न थालेका छन् ।

भारतबाट आएर क्वारेन्टाइनमा बसेकाहरूको स्वाब संकलन गरेको ३ हप्ता हुँदासमेत रिपोर्ट नआएपछि घर पठाएका व्यक्तिमा कोरोना पोजिटिभ देखिन थालेपछि यहाँका स्थानीय तहले प्रभावित क्षेत्रलाई सिल गर्न थालेका हुन् ।

लकडाउनकै बीच भारतबाट फर्किएर १४ दिन क्वारेन्टाइन बसाइपछि पीसीआर परीक्षण रिपोर्ट नआउँदै घर पठाउँदा धेरै व्यक्तिमा कोरोना पोजिटिभ देखिएको छ । प्रदेश स्वास्थ्य निर्देशनालयले २९ जेठ १४ दिन क्वारेन्टानमा बसेकालाई लक्षण नदेखिए घर पठाउन स्थानीय तहलाई निर्देशन दिएको थियो ।

सोही निर्देशनअनुसार प्रदेशका ९ जिल्लामा रहेका ३५ हजारभन्दा बढीलाई घर पठाइएको छ । सुदूरपश्चिम प्रदेशका विभिन्न जिल्लामा गरी क्वारेन्टाइनबाट घर पठाइएका २ सय ५० भन्दा बढीमा कोरोना संक्रमण पुष्टि भएको छ ।

कैलालीका विभिन्न स्थानीय तहमा १ सय ३५, डडेल्धुराको गन्यापधुरा गाउँपालिकाका ५८, डोटीको शिखर नगरपालिकाका १५, बैतडीको शिवनाथ गाउँपालिकाका १७, कञ्चनपुरको लालझाडी गाउँपालिकाका १४ जनामा घर गएपछि कोरोना संक्रमण पुष्टि भएको हो ।

कोरोना संक्रमितलाई रिपोर्ट नआउँदै घर पठाउँदा समुदायमा संक्रमणको त्रास बढेपछि स्थानीय सरकारले पालिकाहरू नै सिल गर्न थालेका छन् । रिपोर्ट नआउँदै १ हप्ता घरमा अलग बस्न आग्रह गर्दै पठाए पनि अधिकांश व्यक्ति समुदायमा घुलमिल भएकाले गाउँमा त्रास फैलिएको स्थानीय बताउँछन् ।

डडेल्धुरामा दिनहुँ कोरोना संक्रमितको संख्या बढ्दै गएपछि जिल्लालाई सिल गरिएको छ । जिल्लालाई ५ असारदेखि लागू हुने गरी सिल गरिएको हो । अर्को सूचना जारी नहुन्जेलसम्म जिल्लालाई सिल गरिएको प्रहरी नायब उपरीक्षक दधिराम न्यौपानेले बताए ।

जिल्ला सुरक्षा समितिको निर्णयअनुसार अहिले यहाँका बजार सुनसान छन् । सरकारी कार्यालय भने खुला नै छन् । अत्यावश्यकबाहेक सेवा बन्द गरिएको जिल्ला प्रशासन कार्यालय डडेल्धुराका प्रशासकीय अधिकृत गणेशदत्त ओझाले बताए ।

स्थानीय प्रशासनले जिल्ला सिल गरेपछि थप कडाइ गर्न पालिकाहरूले पनि सिल गर्न थालेका छन् । २ नगरपालिका र ५ गाउँपालिका रहेको डडेल्धुरामा कोरोना संक्रमितको संख्या दिनहुँ बढिरहेको छ ।

संक्रमितको संख्या बढेसँगै यहाँका ३ स्थानीय तहले पालिकालाई नै पूर्ण रूपमा सिल गरेका छन् । जिल्ला सदरमुकामको अमरगढी नगरपालिकाले नगरक्षेत्रलाई सिल गरेको छ । आइतबारदेखि लागू हुने गरी अनिश्चितकाल रूपमा नगर क्षेत्रलाई सिल गरिएको नगरप्रमुख विशेश्वरप्रसाद ओझाले जानकारी दिए ।

डडेल्धुराको परशुराम नगरपालिका क्षेत्रसमेत आइतबारदेखि सिल गरिएको छ । ७ देखि ११ असारसम्म अत्यावश्यक सेवाबाहेक नगरपालिका क्षेत्रका सम्पूर्ण बजार सिल गरिएको नगर प्रमुख भीमबहादुर साउँदले जानकारी दिए । स्थानीय बजार, आवतजावत, एक टोलबाट अर्को टोलसमेत आवतजावत बन्द गर्ने गरी सिल गरिएको उनले बताए ।

यसअघि डडेल्धुराको गन्यापधुरा गाउँपालिकामा कोरोना संक्रमितको संख्या बढेपछि सिल गरिएको थियो । गत बिहीबारदेखि १२ असारसम्म गाउँपालिका सिल गरिएको हो । गत बिहीबार एकै दिन गन्यापधुरा गाउँपालिकामा ५८ जनामा कोरोना पोजिटिभ देखिएपछि गाउँपालिका सिल गरिएको गन्यापधुरा गाउँपालिकाका अध्यक्ष नवलबहादुर मल्लले जानकारी दिए ।

सिल गरिएको अवधिमा स्वास्थ्य सेवा बाहेकका सम्पूर्ण कार्यालय, बैंक र पसलसमेत शुक्रबारसम्म बन्द रहने र आवश्यक काम बाहेकको अवस्थामा घरबाहिर कसैलाई ननिस्कन पनि सर्वसाधारणलाई गाउँपालिकाले आग्रह गरेको छ ।

बैतडीको पाटन र दशरथचन्द पनि सिल

कोरोना संक्रमित बढ्न थालेपछि बैतडीको पाटन नगरपालिका भित्रका बजार क्षेत्रलाई गत आइतबारदेखि सिल गरिएको छ । सर्वपक्षीय बैठकले नगरका बजारक्षेत्र सिल गर्ने निर्णय गरेको हो ।

कोरोनाका बिरामी बढ्दै गएपछि संक्रमणको जोखिम बढ्ने भएकाले बजार क्षेत्र सिल गर्ने निर्णय भएको नगरपालिकाका प्रमुख केशवबहादुर चन्दले जानकारी दिए । लकडाउन खुकुलो भएसँगै बजारमा भीडभाड बढेकाले कोरोनाको जोखिम न्यूनीकरण गर्न उक्त कदम चालिएको हो ।

‘नागरिकको जीवन रक्षाका लागि यो कदम उठाइएको हो,’ मेयर चन्दले भने, ‘नगरपालिकाको पाटन, मानिकाखान, खोड्पेलगायतका बजार क्षेत्र १५ असारसम्म सिल गरिएका हुन् । निर्णय उल्लंघन गरेमा जरिमाना गरिने छ ।’

नगरपालिकाभित्रका बैंक तथा वित्तीय संस्थालाई आइतबार, सोमबार र बिहीबार बिहान १० देखि दिउँसो १ बजेसम्म मात्रै खोल्न नगरपालिकाले आग्रह गरेको छ ।

यस्तै, कोरोना सङक्रमित बढ्दै गएपछि बैतडीको दशरथचन्द नगरपालिका पनि सिल गरिएको छ ।

नगरभित्र कोरोना संक्रमण फैलिँदै गएको भन्दै नगरपालिकाले आजदेखि १६ असारसम्म सिल गर्ने निर्णय गरेको नगरपालिकाका प्रमुख नरेन्द्र सिंह थापाले जानकारी दिए ।

उनका अनुसार अत्यावश्यक खाद्यान्नका मालवाहक, दूधका ट्यांकर, एम्बुलेन्सलगायतका साधन भने सञ्चालन हुनेछन् । स्थानीय प्रशासन ऐन २०२८ को ६९३० क र सङ्क्रामक रोग ऐन दफा २० बमोजिम नगरभित्र अत्यावश्यक सेवाबाहेक अन्य सेवामा पूर्ण रोक लगाइएको हो ।

सामाजिक दूरी कायम गर्दै औषधि पसल खोल्न पाइने, जन्ती र व्रतबन्धमा १५ जनासम्म सम्मिलित हुन पाइने सूचनामा उल्लेख गरिएकोे छ । यस्तै, नगरपालिकाभित्रका बैङ्क तथा वित्तीय संस्था हप्ताको ३ दिन आइतबार, मंगलबार र बिहीबार खोल्न सकिनेछ ।

कैलालीको गोदावरी पनि सिल

कैलालीको गोदावरी नगरपालिकामा कोरोना संक्रमण फैलिँदै गएपछि नगरक्षेत्र सिल गरिएको छ । कोरोनाका बिरामी थपिँदै भएपछि गोदावरी नगरक्षेत्र अनिश्चितकालका लागि सिल गरिएको नगरप्रमुख हरिसिंह साउदले जानकारी दिए ।

नगरक्षेत्र पूर्ण रूपमा बन्द गर्न स्थानीय सरकार र उद्योग वाणिज्य संघबीच सहमति भइसकेको समेत उनले बताए । अत्तरिया बजार क्षेत्र पनि पूर्ण सिल गरिएको छ । संक्रमण बढ्दै गएका कारण भीडभाडले जोखिम बढ्ने भन्दै अत्यावश्यक बाहेकका सेवाहरू बन्द गर्न अनुरोध गरिएको उनले जानकारी दिए ।

कैलालीको गौरीगंगा नगरपालिका पनि अर्को सूचना जारी नहुन्जेलसम्मका लागि सिल गरिएको छ । कोरोना रिपोर्ट ढिलो आउने र संक्रमित व्यक्ति बजारबजार डुल्ने क्रम नरोकिएपछि पालिकाहरू सिल गरिएका हुन् ।

१० दिनमा थपिए झण्डै १३ सय संक्रमित

सुदूरपश्चिम प्रदेशमा असार लागेपछि कोरोना संक्रमितको संख्या ह्वात्तै बढेको छ । असारको १० दिनमा मात्रै यहाँ १ हजार २ सय ८५ जना संक्रमित थपिएका छन् ।

३२ जेठसम्म सुदूरपश्चिममा संक्रमितको संख्या २ सय ६४ रहेकोमा असारको १० दिनमा थप १ हजार २ सय ८५ जनामा संक्रमण पुष्टि भएसँगै संक्रमितको संख्या बढेर १ हजार ५ सय ४९ पुगेको छ ।

प्रकाशित मिति: बिहीबार, असार ११, २०७७ ११:०७