ध्यान जाओस्, राजनीति स्वार्थपूर्ति गर्न बनाइएको थलो होइन

A+ A A-

- मायाराम जैशी (टीकापुर, कैलाली)

सोझो देशका सोझा जनता हामी, हामीले आखिर हाम्रो देशका नेताहरू पनि सोझा, इमानदार छन् भनेर खुलेर भन्ने दिन कहिले आउला ? सुनिन्छ, यो देशमा यति विकास भयो, यसरी अगाडि बढ्दै छ । तर, हाम्रो देशमा जहिले पनि समस्या उत्पन्न भएको र देशले उभोगति होइन उधोगति लिइरहेको देखिन्छ ।

अब भने सरकारले केही पाठ सिक्न जरुरी छ । बाहिरी देशको विकासदर देखाएर, राजनीतिक माहोल देखाएर, कामलाई होइन दुखी गरिबका समस्यालाई देखाएर, सधैँ आफ्नो स्वार्थपूर्तिको लागि राजनीति गरेको झैँ देखिन्छ । खई कुन व्यक्तिले भनेको पाइन्छ कि हामीले जिताएको नेताले राम्रो काम गरेको छ । खई कसले भनेको छ, नेताको कामले मरहामी खुसी छु भनेर ।

यहाँ जति जोगी आए पनि कानै चिरेका भनेको झैँ भएको छ । जुन पार्टीको व्यक्ति आए पनि विकास भन्नु चाहिँ त्यही एकादेशको कथा भने झैँ भएको देखिन्छ । साँच्चै यहाँ उच्च ओहोदामा बस्ने महान् व्यक्तिले नै गल्ती के हो, सत्य के हो भन्ने नबुझी आफ्नो मनपरि काम गर्ने परिपाटी देख्दा अचम्म लाग्छ ।

हामीले सुन्दै आएका छौँ, देशको सिमाना यति मिचियो उति मिचिँदै छ, यति भ्रष्टाचार भयो, उता मान्छेले मान्छेलाई मार्‍यो, त्यहाँ बलात्कार भयो सधैँ समस्यामाथि नै समस्या बढ्दै गएको देखिन्छ । तर, कहिले सुन्न पाएका छैनौँ, यसले यति भ्रष्टाचार गरेर यसलाई यस्तो सजाय दिइँदैछ, अनि बलात्कार गर्नेलाई समातेर यस्तो कडा सजाय दिइयो । साँच्चै, कताकता यो देशमा अपराध गर्नेलाई सजायभन्दा पनि प्रोत्साहित या प्राथमिकता दिएको झैँ लाग्छ ।

सुन्दा अचम्म लाग्छ, देश लकडाउनमा छ, झन्डै तीन महिना पुग्दैछ, यतिबेला पनि विभिन्न नकारात्मक समाचार सुनिन्छ । कोरोना भाइरस संक्रमण तीव्ररूपमा बढिरहेका बेला दक्ष जनशत्ति खटाएर परीक्षण गर्नुपर्नेमा नेताहरू नै भ्रष्टाचारमा मुछिएको समाचार सुनिन्छ । आखिर किन यहाँ यति अनियमितता र अव्यवस्थित छ, सहयोग गर्नुपर्ने समयमा समस्या बुझ्नुपर्ने ठाउँमा आफ्नो मनलाग्दी हर्कत गर्नु कतिसम्मको जायज छ यो कुरा बुझ्न जरुरी छ ।

चुनाबताका नेता घर-घरमा पुगेर भोट पाउन आफ्ना कार्यकर्ता होस् या आफैँ गई अशक्त, अपाङ्गता भएकालाई ह्वील चेयरमा होस् या आफ्नो सवारी साधनमा ओसारपसार गरि चुनाब जित्न खोज्नेले खई यति बेला आफ्नो जनतालाई सम्झेको, सहयोग गरेको । सबैले बुझ्न जरुरी छ सधैँ आफ्नो स्वार्थपूर्तिको लागि मात्रै होइन कि यहाँ देशरक्षाको लागि, जनताको सेवाको लागि, राजनीति गर्ने राजनीतिक व्यक्तित्वको के अभाव भएको हो ।

फेरि पनि ध्यान जाओस् राजनीति आफ्नो स्वार्थपूर्ति आफ्नो मनपरि गर्नलाई बनाइएको थलो होइन समग्र देश अनि जनताको रक्षा र देशको विकास अनि जनताका समस्यामाथि निकास गर्नमा ध्यान दिन राजनीति गर्न आवश्यक देखिन्छ ।

प्रकाशित मिति: शनिबार, असार १३, २०७७ १२:०२