सिक्री र औँठी बेचेर पसलको भाडा

A+ A A-

दुई हप्ताअगाडि एकाबिहानै प्रफुल्लित मुद्रामा निस्किएका राम पौडेलको खुसी २ हप्ता पनि टिक्न सकेन । ३ महिनासम्म घरमा थुनिएका उनी सरकारले लकडाउन खुकुलो गर्नासाथ पसल खोल्न न्यूरोड पुगेका थिए ।

पसल त उनले खोले तर पसलमा बिहानै मानिसको घुुइँचो देखेर अत्तालिए । तर अत्तालिए पनि परिवारमा भोलि के खाने भन्ने अवस्थालाई सम्झिँदै डराउँदै भए पनि व्यवसाय सुचारु गरेका उनी अहिले पसलमा भएको सरसामान पनि भक्तपुरस्थित डेरामा लगेर थन्क्याएका छन् ।

केही समयअगाडि उनकै समाचार लेखिरहँदा 'डराईडराई खोलेको छु, अब सावधानी अपनाएर भए पनि पसल खोल्छु' भनेका उनी एक हप्ता पुग्न नपाउँदै व्यवसाय नै छोड्न बाध्य भएका हुन् ।

राम अमिलो मन बनाउँदै सुनाउँछन्, ‘अबचाहिँ बाँचिन्छ भनेर पसल खोल्न गएको, सुरुसुरुमा त भीडभाड नै भयो । डराउँदै भए पनि बेचिरहेँ । तर, विस्तारै मान्छेहरू आउन छाडे,’ उनले भने, ‘अब त दिनभरि कुरिरहँदा पनि कोही ग्राहक आउँदैनन् । पैसा उठाउन घरबेटी भने दिनदिनै आउँछन् ।’

‘हजुर भोलि दिन्छु भन्दै कति फर्काउने, एउटा सामान बिक्री भएको छैन,’ निन्याउरो स्वरमा उनी लकडाउनले वर्वाद भएको उनको व्यवसायको यर्थाथता बताउँछन् ।

यो पनि पढ्नुहोस्

'ग्राहक आउँदा तर्सिन्छु, नआउँदा पिरोलिन्छु...'

उनी बैंकबाट कर्जा लिएरै भए पनि पसलको भाडा तिर्ने सोचले बैंक नपुगेका पनि होइनन् । तर, बैंकले बन्द व्यवसायलाई कर्जा दिन नसक्ने भन्दै फकाएपछि भने पसल बन्द गर्ने सोचमा पुगेका रहेछन् ।

राम विगत ८ वर्षदेखि न्यूरोडमा सानो फेन्सी स्टोर चलाएर बस्थे । महिनाको ४५ हजार रुपैयाँ भाडा तिरेर पनि उनको कमाइले ४ जना परिवार राम्रैसँग चलिरहेको थियो ।

तर, कोरोनाको त्रासले विगत ३ महिनादेखि निरन्तर लकडाउन भइरहँदा व्यवसाय ठप्प भयो ।

पसलबाट आएको फाइदाले गर्जो टार्दै आएका राम ३ महिनासम्म बन्द हुँदा पसलको भाडासमेत तिर्न सक्ने अवस्थामा छैनन् । १ लाख ३५ हजार भएको छ पसलको भाडा मात्रै ।

‘व्यापार भएको भए पनि तिर्न सकिन्थ्यो, बन्द कोठाको १ लाख ३५ हजार तिर्न पैसा कहाँबाट ल्याऊँ ?,’ उनले भने, ‘१ हप्तासम्म पनि ग्राहक नआएपछि आफूसँग भएको सिक्री र औँठी बेचेर भाडा तिरेँ । अनि पसलका सामान ल्याएर कोठामा थुपारेको छु ।’

७ वर्षदेखि राम्रैसँग चलिरहेको व्यापार लकडाउनले चौपट पार्‍याे भन्दै गुनासो गर्नुको विकल्प अरु केही छैन, अहिले उनीसँग ।

त्यसैले अचेल रामलाई आफूले गरेकाे व्यवसायभन्दा बरु कुनै संस्थामा जागिर खाएको भए वेश हुन्थ्यो भन्ने लाग्न थालेको छ । राम भन्छन्, ‘बरु जागिर खाएको भए कमसेकम जोडेको सुन त बेच्नु पर्दैन थियो ।’

राम त प्रतिनिधिपात्र मात्रै हुन् । उपत्यकाका न्यूरोड, ठमेल, बालाजु, बानेश्वर, चाबहिल, बौद्ध क्षेत्रमा लकडाउन खुकुलो हुनासाथ खुलेका पसलहरू व्यापार नहुँदा धमाधम बन्द भइरहेका छन् ।

सरकारले ल्याएको कर्जा सुविधा पनि बैंकहरूले ठूला व्यवसायीहरूलाई मात्रै दिने गरेको भन्दै मध्यम वर्गका व्यवसायीहरू अहिले व्यवसायबाट धमाधम पलायन भइरहेका छन् ।

प्रकाशित मिति: बुधबार, असार १०, २०७७ १६:००