मिलन भन्छन्- 'अरुलाई प्रोत्साहित गर्न चलचित्र बनाउन लागेँ'

A+ A A-

लकडाउनकै समय निर्देशक मिलन चाम्स नयाँ चलचित्रको तयारीमा जुटेका छन् । उनी अहिले चलचित्र छायाङ्कनका लागि लोकेसनको खोजीमा निस्किएका छन् । सामाजिक सञ्जालमा केही तस्वीरहरू पोस्ट गर्दै उनले आफू लोकेसनको खोजीमा निस्किएको जानकारी दिएका हुन् ।

कोरोनाका त्रासमा अहिले जोकोही निर्माता तथा निर्देशकहरू चलचित्र बनाउन डराइरहेका छन् । घोषित चलचित्रहरू पनि पछाडि हटिरहेका छन् भने निर्माणको तयारीमा रहेका चलचित्रहरू पनि अन्योलमा छन् । तर, मिलनले भने यही संकटको समयमा नै चलचित्र निर्माण गर्ने साहस देखाएका छन् ।

मिलन संकटको समय अन्य चलचित्रकर्मीहरूलाई हत्तोसाहित हुन नदिन चलचित्र निर्माण गर्न लागेको बताउँछन् । शिलापत्रसँगको कुराकानीमा उनले भने, 'अहिले जोकोही निर्माता पनि चलचित्र निर्माण गर्न डराउनुभएको छ । हत्तोसाहित हुनुभएको छ । उहाँहरूलाई नै प्रोत्साहित गर्न र चलचित्र क्षेत्रलाई चलायमान देखाउन मैले चलचित्र निर्माण गर्न लागेको हुँ ।'

मिलनका अनुसार लकडाउनको समाप्तिसँगै चलचित्रको छायाङ्कन सुरु हुनेछ । उनले भने, 'अहिले हामी चलचित्रको स्क्रिप्ट तयार गर्दै छौँ । लकडाउनपछि छायाङ्कन सुरु गरिहाल्ने सोचले लोकेसनको खोजीमा निस्किएको हुँ ।'

युद्धको कथामा निर्माण हुन लागेको यस चलचित्रको कथा मिलन आफैँले तयार गरेका हुन् । चलचित्रको पटकथा मिलन र उनका सहायक निर्देशक गिरिराज घिमिरेले तयार गरिरहेका छन् ।

चलचित्रमा सम्पूर्ण नयाँ कलाकारलाई अवसर दिने मिलनले बताए । उनले भने, 'हामी यस चलचित्रमा सबै नयाँ कलाकारलाई अवसर दिनेछौँ । हामीले अडिसन गरेर कलाकारको छनोट गर्ने तयारी गरिरहेका छौँ ।'

प्रकाशित मिति: मंगलबार, असार ९, २०७७ १२:२३