'नेपोटिज्म'को चर्चा चल्दै गर्दा पलको प्रश्न- 'के तपाईंले समयमा पारिश्रमिक पाउनुभएको छ ?'

'नेपोटिज्म'को चर्चा चल्दै गर्दा पलको प्रश्न- 'के तपाईंले समयमा पारिश्रमिक पाउनुभएको छ ?'

A+ A A-

अहिले नेपाली चलचित्र क्षेत्रमा नातावाद तथा गुटबन्दीको चर्चा चलिरहेको छ । बलिउड अभिनेता सुशान्त सिंह राजपुतको मृत्युपछि बलिउडमा सुरु भएको याे बहस अहिले नेपाली चलचित्रमा पनि चलिरहेको छ ।

यस विषयमा धेरैले आफ्नो तर्क-वितर्क गरिरहेका छन् । कतिपयले नेपाली चलचित्र क्षेत्रमा नेपोटिज्म नभएको धारणा व्यक्त गरिरहेका छन् भने कतिपयले नेपाली चलचित्र क्षेत्र पनि यस कुराबाट अछुतो नरहेको आरोप लगाइरहेका छन् ।

यस्तैमा, नायक पल शाहले भने अहिले फरक प्रश्न खडा गरेका छन् । सामाजिक सञ्जालमा उनले एक स्टाटस लेख्दै केही प्रश्न गरेका छन् । उनले लेखेका छन्, 'चलचित्र क्षेत्रमा नातावाद, कृपावाद, गुटबन्दी, डिप्रेसन र आत्महत्याको कुरा उठिरहँदा मलाई केही फरक प्रश्न गर्न मन लाग्यो ।'

पलले सामाजिक सञ्जालमा सोधेका प्रश्नहरू जस्ताको त्यस्तै

- के तपाईंले परिश्रम गरेअनुसार समयमा आफूले पाउनुपर्ने पारिश्रमिक पाइराख्नुभएको छ ?
- के तपाईंले आफूले गरेको चलचित्रको पैसा पाउन वर्षौं वर्षसम्म निर्देशक, निर्मातासँग दुई हात जोड्नुपरेको छ ?
- यो चलचित्र गरेर आएको पैसाले अर्को ठाउँबाट ल्याएको ऋण तिरौँला भन्ने सोच गरेको कलाकारलाई त्यही चलचित्रको पैसा पाउन वर्षौं वर्ष कुर्नुपर्दा त्यो कलाकारको दिमागमा के असर पर्ला ?
- आफ्नो चलचित्रको सम्झौताअनुसार निर्मातासँग पारिश्रमिक माग्दा 'यो हाम्रो चलचित्रले सोचेको जस्तो व्यापार गरेन, त्यसैले यो पैसा अहिले दिन सक्दिनँ म । यदि ५० प्रतिशत छुट गरिदिने भए गर, नभए पछि विस्तारै दिऊँला भनेर २-३ वर्ष झुलाउँदा त्यो कलाकारको मन मस्तिस्कमा कस्तो सोच आऊला ?

पलले थपेका छन्- 'र, त्यही पैसा दिन झुलाउने निर्माताले नेपाली चलचित्र क्षेत्रलाई बचाउनुपर्छ । एकले अर्कोलाई साथ दिएर अगाडि बढ्नुपर्छ भन्छन् ।' पलले अब सबैले यस विषयमा पनि सोच्नुपर्ने बताएका छन् । यस विषयमा सम्बन्धित निकायहरूले पनि ध्यान दिनुपर्ने पलले लेखेका छन् ।

पलले उठाएका यी प्रश्न काल्पनिक होइनन् । आफैँले भोग्नुपरेको र महसुस गरेर नै यो लेख्न परेको पल बताउँछन् । शिलापत्रसँगको गफमा उनले भने, 'यो लेख्नैपर्ने विषय भएर मैले लेखेको हुँ । यी जति पनि प्रश्न छन्, ती सबै म आफैँले भोग्नुपरेको छ ।'

प्रकाशित मिति: सोमबार, असार ८, २०७७ १७:०७