कृषि विकास बैंकमा पनि अब अनलाइनबाटै शून्य मौज्दातमा खाता खाेल्न सकिने

A+ A A-

पछिल्लो समय कृषि विकास बैंक आफ्ना विभिन्न सेवाहरूमा विविधीकरण गर्दै व्यवसाय विस्तार गर्ने कार्यमा आक्रामक रूपमा प्रस्तुत भएको छ ।

बैंकले प्रमुख कार्यकारी अधिकृत (सीईओ) मा अनिलकुमार उपाध्याय पाएसँगै प्रविधिमा जोड दिई ग्राहकहरूलाई आकर्षित गर्न थालेको छ । साथै, बैंकका सबैजसो सेवाहरूमा सूचना प्रविधिको प्रयोग भइरहेको छ ।

प्रविधिको विकाससँगै ग्राहकलाई प्रदान गर्ने सेवा सुविधामा सरलीकरण गर्न र बैंकले प्रदान गर्ने सेवालाई समयसापेक्ष र ग्राहकमैत्री बनाउँदै बैंकिङ कारोबारको दायरा फराकिलो बनाउन विद्युतीय उपकरणको प्रयोग गरी अनलाइनबाटै खाता खोल्ने प्रणाली सुरु गरेको छ ।

उक्त प्रणालीको गत शुक्रबार बैंक सञ्चालक समितिका अध्यक्ष लक्ष्मी प्रपन्न निरौला र सीईओ अनिलकुमार उपाध्यायले संयुक्त रूपमा उद्घाटन गरेका छन् ।

सरकारी बैंकहरूमा अनलाइनबाट खाता खोल्ने सुविधा दिने पहिलो कृषि विकास बैंक पहिलो बैंक बन्न सफल भएको छ ।

कार्यक्रममा बैंकका उप–महाप्रबन्धकहरू प्रताप सुवेदी, यज्ञप्रकाश न्यौपाने, दीर्घबहादुर अर्याल र धु्रवचन्द्र गौतमलगायत विभागीय प्रमुखहरू एवं बजार तथा शाखा व्यवस्थापन विभागका कर्मचारीहरूको उपस्थिति थियो ।

बैंकले अनलाइनबाट खाता खोल्ने सुविधा ल्याएसँगै देश/विदेशमा रहेका नेपालीहरूले अब शून्य मौज्दातमा यस बैंकमा आफ्नो खाता खोल्न सक्ने भएका छन् । यसबाट स्वदेश तथा विदेशमा रहेका नागरिकले आफ्नै घर/कार्यालयमा बसेर बैंक खाता खोल्न सक्ने व्यवस्थाको सुरुवात गरेको बैंकले जनाएको छ ।

बैंकले विकास गरेको प्रविधि अन्य बैंकले प्रयोग गरेको भन्दा अत्याधुनिक र सरल रहेको एवं खाता खोल्नका लागि बैंकको वेबसाइटमा आवश्यक लिङ्क तयार गरी राखिएको हुँदा उक्त लिङ्कमा गई खाता खोल्न सकिने बैंकको बजार तथा शाखा व्यवस्थापन विभागका विभागीय प्रमुख अजयकुमार रिमालले बताए ।

प्रकाशित मिति: सोमबार, असार ८, २०७७ १७:०१