लकडाउनमा मोटरसाइकल तथा स्कुटर किन्नुहोस्, बम्पर छुट पाउनुहोस्

A+ A A-

लकडाउन केही खुकुलो हुन थालिसक्यो । जोर-विजोर गरेर निजी सवारी साधन पनि सडकभरी गुडेका देखिन्छन् । यस्तो अवस्थामा तपाईंलाई अवश्य पनि स्कुटर वा मोटसाइकल अभाव खड्किएको होला ।

कतिपयले त किन्छु भन्दाभन्दै लकडाउन भएर नकिनी बस्नुभएको पनि होला । त्यसो भए तपाईंका लागि यो समाचार पक्कै पनि लाभदायी हुन सक्छ ।

अहिले लकडाउनमा व्यापार नभएको भन्दै अटो व्यवसायीहरूले मोटरसाइकल तथा स्कुटरमा विभिन्न छुटदेखि आकर्षक प्याकेजहरू ल्याइरहेका छन् ।

प्रसिद्ध ब्राण्डले पनि अहिले शून्य रुपैयाँमै स्कुटर उपलब्ध गराउनुका साथै ६ महिनासम्म किस्ता नतिरी ढुक्कले चलाउन पाइने व्यवस्था गरेका छन् । त्यति मात्र होइन, ब्याज, इन्स्योरेन्स खर्च, नामसारी खर्चमा पनि भारी मात्रामा छुट दिँदै आइरहेका छन् ।

कोरोना भाइरसको संक्रमण नहोस् भनेर विभिन्न कम्पनीले अनलाइनबाट होम डेलिभरीको सुविधासमेत दिँदै आएका छन् ।

फरक कम्पनीका फरक अफर

अहिले सबै कम्पनीका स्कुटर तथा मोटरसाइकल बिक्री वितरणमा अटो व्यवसायीहरू आक्रामक रूपमा उत्रिएका छन् । यसका लागि सबै कम्पनीले आफ्ना सवारी साधनमा विभिन्न फरक फरक प्रकारका आकर्षक छुटका प्याकेजहरू धमाधम सार्वजनिक गरिरहेका छन् ।

त्यति मात्र नभएर स्कुटर तथा मोटसाइकलको मूल्यसमेत कम गरेर बिक्री वितरण गरिरहेका छन् ।

हेरौँ, कुन ब्राण्डका स्कुटर तथा मोटरसाइकलमा कति आकर्षक प्याकेज छन् त ?

शून्य डाउन पेमेन्टमा टीभीएस स्कुटर

टीभीएसको एनटर्क रेस एडिसन ब्राण्डको स्कुटर किन्दा तपाईंले पैसा खर्च गर्नै पर्दैन । टीभीएस कम्पनीको नेपालका लागि आधिकारिक बिक्रेता कम्पनी जगदम्बा मोटर्सले शून्य डाउन पेमेन्टमा स्कुटर बिक्री गरिने नयाँ स्किम ल्याएको हो ।

२ लाख ४६ हजार ९ सय रुपैयाँ पर्ने एनटर्क रेस स्कुटर लकडाउनलाई लक्षित गरेर शून्य पेमेन्टमा बिक्री गरियो योजना जगदम्बा मोटर्सले ल्याएको हो ।

यसमा तपाईंले एनटर्क रेसको स्कुटर किन्दा स्कुटरको मूल्य नतिरे पनि स्कुटर नामसारी खर्च, बीमा, कर्जाबापतको सर्भिसको पैसा भने तिर्नुपर्ने हुन्छ । तपाईंले १९ हजार रुपैयाँ तिरेर स्कुुटर लैजान सक्नुहुनेछ ।

कम्पनीका अनुसार यो योजनाअन्तर्गतका ग्राहकले स्कुटर खरिद गरिसकेपछि ४ महिनासम्म जम्मा ९९ रुपैयाँ मात्र तिर्दा हुनेछ । अर्थात् किनेको ४ महिनासम्म तपाईंले किस्ताबापतको ८ हजार ८ सय ३ रुपैयाँ तिर्नुपर्दैन ।

४ महिनापछि भने मासिक किस्ता बुझाउनुपर्ने हुन्छ । यसरी खरिद गरिएको स्कुटरको मूल्य ३ वर्षसम्म बुझाइसक्नुपर्नेछ । कम्पनीले १७ प्रतिशत व्याजदरमा यो योजना ल्याएको हो ।

होण्डाको स्कुटर किन्नुहोस् १ रुपैयाँ तिरेर

नेपालका लागि होण्डाको डिलर स्याकार ट्रेडिङले लकडाउनलाई लक्षित गर्दै १ रुपैयाँमा होण्डाका जुनसुकै स्कुटर तथा मोटरसाइकल खरिद गर्न सकिने नयाँ स्किम ल्याएको छ । यस स्किमअन्तर्गत ग्राहकले १ रुपैयाँ डाउन पेमेन्ट गरेर १ रुपैयाँ ईएमआई मात्र तिर्नुपर्नेछ ।

यसरी किनिएको स्कुटर तथा मोटरसाइकलको कर्जा ३ वर्षभित्र चुक्ता गरिसक्नुपर्नेछ भने त्यसको मासिक ब्याज १६ प्रतिशत रहेको छ ।

त्यस्तै, तपाईंले ४० प्रतिशत डाउन पेमेन्टमा मोटरसाइकल वा स्कुटर खरिद गर्न चाहनुहुन्छ भने ३ महिनासम्म १ रुपैयाँ मात्र किस्ताबापतको रकम तिर्नुपर्नेछ । ३ महिनापछि भने मासिक रूपमा स्कुटरको मूल्यअनुसारको रकम बुझाउनुपर्नेछ ।

यसरी ५० प्रतिशत डाउन पेमेन्ट गरेर खरिद गरे ६ महिनासम्म मासिक १ रुपैयाँ किस्ता, ६० प्रतिशत डाउन पेमेन्ट गरेर खरिद गरे ९ महिनासम्म मासिक १ रुपैयाँ किस्ता र ७० प्रतिशत डाउन पेमेन्ट गरेर खरिद गरे १ वर्षसम्म मासिक १ रुपैयाँ किस्ता तिरे पुग्नेछ।

यति मात्र नभएर होण्डाले २० प्रतिशत मात्र डाउन पेमेन्ट गरेर मोटरसाइकल तथा स्कुटर खरिद गर्न सक्ने व्यवस्थासमेत गरेको छ, जसमा १६ प्रतिशत ब्याज लाग्नेछ भने ३ वर्षसम्मको अवधि रहनेछ ।

अनलाइन बुकिङ गर्नुहोस्, घरमै आउँछ भेस्पा

भेस्पा ब्राण्डका लागि नेपालको आधिकारिक बिक्रेता दुगड ब्रदर एण्ड सन्स मोटर्सले लकडाउनलाई लक्षित गर्दै ग्राहकले घरै बसेर अनलाइन बुक गर्न सक्ने योजना ल्याएको छ । यसअन्तर्गत तपाईंले अनलाइनबाटै बुक गरेको स्कुटर तपाईंको घरसम्म नै बिक्रेताले ल्याइदिनेछन् ।

कोरोनाको संक्रमण पनि नहुने र घरै बसीबसी नयाँ स्कुटर किन्न पाइने हुनाले यो निकै लोकप्रिय हुने कम्पनीको दाबी छ ।

यीबाहेक भेस्पा ब्राण्डका स्कुटर खरिदमा ५ हजार रुपैयाँ नगद छुट, हेलमेट, फुटम्याट जस्ता एक्सेसरिजहरू पनि नि:शुल्क दिनेछ ।

यति मात्र नभएर भेस्पा खरिद गर्न चाहने ग्राहकलाई फाइनान्स तथा एक्स्चेन्ज दुवै प्रकारको सुविधा दिने दुगड ब्रदर एण्ड सन्स मोटर्सले जनाएको छ ।

बजाजका मोटरसाइकल तथा स्कुटरमा १२ हजारसम्म छुट

बजाजका लागि नेपालको आधिकारिक वितरक एचएच बजाजले विभिन्न योजना ल्याएको छ । ग्राहकले बजाजका मोटरसाइकल तथा स्कुटर खरिद गर्दा ५० प्रतिशत रकम डाउन पेमेन्ट गरेको खण्डमा ब्याज मिनाह हुनेछ । अर्थात् शून्य प्रतिशत ब्याजमा नै स्कुटर तथा मोटरसाइकल खरिद गर्न सक्नेछन् ।

यसरी कम्पनीले आफ्ना मोटरसाइकल खरिद गर्दा फुल क्यासमा १२ हजार रुपैयाँ छुटसमेत दिनेछ । त्यति मात्र नभएर २० प्रतिशत डाउन पेमेन्टमै मोटरसाइकल उपलब्ध गराउने योजना यसले ल्याएको छ ।

पैसा नतिरी लैजानुहोस् यमाहाका मोटरसाइकल तथा स्कुटर

यमाहा ब्राण्डका लागि नेपाली बिक्रेता कम्पनी एमडब्लु इन्टरप्राइजेजले लकडाउनलाई लक्षित गर्दै शून्य डाउन पेमेन्टमा मोटरसाइकल तथा स्कुटर खरिद गर्न सक्ने योजना ल्याएको छ ।

यसका लागि ग्राहकले पैसा नतिरी पनि मोटरसाइकल खरिद गर्न सक्नेछन् । यो सित्तैमा नभएर मासिक कर्जाको रूपमा बिक्री वितरण गरिने एमडब्लु इन्टरप्राइजेजले जनाएको छ ।

यस योजनाअन्तर्गत यमाहाका स्कुटर तथा मोटरसाइकल खरिद गर्दा ३ वर्षका लागि १६ प्रतिशत ब्याजमा स्कुटर खरिद गर्न सकिनेछ ।

यदि तपाईंले ५० प्रतिशत डाउन पेमेन्ट गरेर मोटरसाइकल तथा स्कुटर खरिद गर्नुहुन्छ भने पनि शून्य ब्याजदरमा किन्न सक्नुहुनेछ । त्यति मात्र नभएर होण्डाका सबै प्रकारका स्कुटर तथा मोटरसाइकल खरिदमा १० हजार रुपैयाँसम्म छुट पाउने व्यवस्था छ ।

प्रकाशित मिति: सोमबार, असार ८, २०७७ १७:५८