क्वारेन्टाइनमा बसेका बझाङीको प्रश्न : सर्पको त्रास बढ्यो, कोरोना रिपोर्ट खोई ?

क्वारेन्टाइनमा बसेका बझाङीको प्रश्न : सर्पको त्रास बढ्यो, कोरोना रिपोर्ट खोई ?

A+ A A-

नमुना स्वाब संकलन गरिएको १६ दिनसम्म पनि पीसीआर रिपोर्ट नआउँदा बझाङको क्वारेन्टाइनमा बसेकाहरू आक्रोशित भएका छन् ।

थलारा गाउँपालिका-२ का विभिन्न क्वारेन्टाइनमा बसिरहेकाहरूको नमुना स्वाब संकलन गरिएको २ हप्तामा पनि पीसीआर रिपोर्ट नआउँदा उनीहरू आक्रोशित बनेका हुन् । भारतको नयाँ दिल्लीबाट ९ जेठमा बझाङमा आएका उनीहरूले क्वारेन्टाइनमा महिना दिनसम्म थुनिँदा असहज भएको बताएका छन् ।

२ हप्ताअघि आरडीटी परीक्षण गर्दा उनीहरूमा पोजिटिभ देखिएपछि नमुना स्वाब संकलन गरिएको वडाध्यक्ष हेम खड्काले बताए । ‘नमुना स्वाब संकलन गरेको २ हप्ता बितिसक्यो रिपोर्ट नआउँदा मप्रति आक्रोश देखाउन थालेका छन्,’ उनले भने, ‘अबको २ दिनभित्र रिपोर्ट नआए सिधैं घर जान्छौँ भनेर मलाई चेतावनी आएको छ । सरकारको लापरबाहीले स्थानीय तहका जनप्रतिनिधिलाई असहज भएको छ ।’

थलारा-२ का शारदा मावि, खापर आधारभूत विद्यालय र जनप्रिय आधारभूत विद्यालयमा राखिएका ८ जनाको २ हप्ताअघि नमुना स्वाब संकलन गरिएको थियो । रिपोर्ट नतिजाको पर्खाइमा बसिरहेका उनीहरूले क्वारेन्टाइनमा व्यवस्थापन नभएकाले दिन बिताउन असहज भएको बताएका छन् ।

‘रिपोर्टको पर्खाइले तनावमा पारिसक्यो । क्वारेन्टाइन व्यवस्थित छैन । बर्खाको समय हुँदा विद्यालयको छाना चुहिन थालेको छ,’ शारदा माविको क्वारेन्टाइनमा बसिरहेका भजन विकले भने, ‘सर्प कोठाभित्रै छिर्न थालेका छन् । १ हप्ताभित्र हामीले ४ वटा सर्प कोठाभित्रै मारिसक्यौँ । कुन दिन सर्पले डसेर मरिन्छ । पानी पर्दा भेल बगेर कोठामै पुग्ने गरेको छ । कसरी बस्नु अब ? २ दिनभित्र रिपोर्ट नआए घर जान्छौँ ।’

थलारा गाउँपालिका-२ मा मात्रै ४१ जना क्वारेन्टाइनमा बसिरहेका छन् । खानामा पनि रसायनयुक्त बजारको चामल र भटमासको दाल मात्रै खाँदाखाँदा दिक्क लागेको शारदा क्वारेन्टाइनमा बसिरहेका अर्का स्थानीय महावीर खड्काले बताए । उनले भने, ‘घरमा असारे कामको चटारो छ । रिपोर्ट आए त ढुक्क हुन्थ्यौँ । अरु रोग त केही छैन जस्तो लाग्छ । तर, सोच्दासोच्दै मानसिक विरामी भइसक्यौँ ।’

क्वारेन्टाइन व्यवस्थापन गर्न नसकेको वडाध्यक्ष हेम खड्काले स्वीकार गरे । उनले लकडाउन अवधिभर गाउँपालिकाले ५ हजार बढीको व्यवस्थापन गरेकाले रकम सकिएको र अहिले क्वारेन्टाइनमा बसेकाहरूलाई खाना र लुगाकपडा घरबाटै मगाउन लगाएको बताए ।

स्वास्थ्य कार्यालय बझाङले सार्वजनिक गरेको आइतबारको तथ्यांकअनुसार अझै पनि थलारा गाउँपालिकामा ३ सय ९ जना क्वारेन्टाइनमा बसिरहेका छन् ।

त्यस्तै, बझाङका अन्य स्थानीय तहका क्वारेन्टाइनमा बसिरहेकाहरू पनि समयमै रिपोर्ट नआउँदा आक्रोशित भएका छन् । सुदूरपश्चिममा एउटा मात्रै पीसीआर मेसिन भएकाले स्वाबको चाङ लाग्ने गरेको छ ।

हाल बझाङमा पीसीआर परीक्षणका लागि नमुना स्वाब संकलन गरिएको व्यक्तिको संख्या ९ सय ६९ जना पुगेको छ भने ३ सय ९३ जनाको मात्रै नतिजा प्राप्त भएको छ । अझै ५ सय ७६ नमुनाको नतिजा आउन बाँकी छ ।

बझाङ जिल्लाभित्रै अहिले १७ जना कोराना संक्रमित देखिएका छन् । जिल्लाबाहिर संक्रमितको संख्या ४ जना रहेको छ । अहिलेसम्म जिल्लामा २ जना कोरोना जितेर घर फर्किसकेका छन् ।

प्रकाशित मिति: सोमबार, असार ८, २०७७ १०:४०