अलैँची र चिया बोकेका २० मालबाहक ट्रक मेची पुलमै थन्किए

A+ A A-

भारतको पश्चिम बङ्गाल सरकारले नेपालबाट निर्यात गर्न लागिएको चिया र अलैँची बोकेका मालबाहक सवारी साधन प्रवेशमा रोक लगाएपछि मेची पुलमै थन्किएका छन् ।

भातको पश्चिम बङ्गाल प्रहरीले प्रवेश नदिँदा नेपालबाट उत्पादित कृषिजन्य वस्तु चिया र अलैँची बोकेर गएका मालबाहक ट्रक ४ दिनयता मेची पुलमा थन्किएका हुन् । भारतले २ महिनाअघिबाटै नेपालमा उत्पादित सामान निर्यातमा रोक लगाएको भए पनि नेपालले यस पटक पठाउने प्रयास गरेको हो ।

तर, पश्चिम बङ्गाल सरकारले भने भारत प्रवेशमा रोक लगाएपछि मालबाहक ट्रक बिहीबारदेखि मेची पुलमा रोकिएको मेची भन्सार कार्यालय काँकडभिट्टाका प्रमुख ध्रुवराज विश्वकर्माले बताए । उनले भारत प्रवेशमा रोक लगाएपछि चिया बोकेका १२ र अलैँची बोकेका ८ वटा ट्रक मेची पुलमै रोकिएको जानकारी दिए ।

गत चैतमा १ महिना नाकाबन्दी गरेको पश्चिम बङ्गाल सरकारले वैशाख अन्तिमबाट एकतर्फी खोलेको थियो । सामान आयात मात्र दिएको पश्चिम बङ्गालले अझैसम्म नेपालबाट वस्तु अघोषित रूपमा निर्यात गर्न दिएको छैन ।

पश्चिम बङ्गालका प्रहरीले माथिको आदेश भन्दै नेपालबाट गएका सवारीलाई प्रवेश नदिने गरेको भन्सार प्रमुख विश्वकर्माले जानकारी दिए । ‘भारतको भन्सारसँग कुरा गर्दा मालबाहक सवारी प्रवेश रोक्ने हामीलाई त्यस्तो आदेश आएको छैन, मालबाहक सवारी आएको खण्डमा जाँचपास गरेर जान दिन्छौँ भन्नछन्’, उनले भने, ‘तर, पश्चिम बङ्गाल प्रहरीले भने ट्रकहरू उता जान दिएको छैन ।’

भन्सार कार्यालयका प्रमुख विश्वकर्माका अनुसार १५ दिनअघि जाँचपास सकेर २५ वटा मालबाहक ट्रक भन्सारको यार्डमा राखिएको र व्यवसायीको आग्रहपछि बिहीबार भारत पठाउने तयारी गरिएको थियो । तर, पश्चिम बङ्गाल सरकारले प्रवेश नदिएपछि मेची पुलमा नेपालतर्फको भागमा ट्रकहरू रोकिएका हुन् ।

भन्सार प्रमुख विश्वकर्माले त्यहाँ पठाइएकामध्ये बङ्गलादेश जाने १ ट्रक अम्लिसो र दिल्ली जाने २ ट्रक अलैँचीलाई भने प्रवेश दिएको बताए । पश्चिम बङ्गाल सरकारले नेपालबाट पठाएको १ ट्रक अम्म्रिसो बङ्गलादेश पठाउन अनुमति दिएसँगै ३ महिनापछि नेपाली उत्पादन बङ्गलादेशमा निर्यात भएको छ ।

भन्सार प्रमुख विश्वकर्माका अनुसार लकडाउनपछि बङ्गलादेशसँग आयात र निर्यात हुन पाएको थिएन ।

प्रकाशित मिति: आइतबार, असार ७, २०७७ १६:१४