आन्तरिक मूल्याङ्कनलाई मान्यता दिने भएपछि एसईईको तयारीमा रहेका विद्यार्थीमा निराशा

आन्तरिक मूल्याङ्कनलाई मान्यता दिने भएपछि एसईईको तयारीमा रहेका विद्यार्थीमा निराशा

A+ A A-

कोरोना महाकारीका कारण यसवर्ष एसईई परीक्षा नहुने भएपछि विद्यार्थीहरू समस्यामा परेका छन् ।

पढाइ सकेर परीक्षाको अन्तिम तयारीमा रहेका बेला गरिएको लकडाउनका कारण मारमा परेका उनीहरू अब परीक्षा नै नहुने भनेपछि समस्यामा परेका हुन् ।

सरकारले यस वर्ष एसईई परीक्षा विद्यालयको आन्तरिक मूल्याङ्कनका आधारमा गर्ने जनाएपछि विद्यार्थीहरूमा निराशा बढेको छ ।

गत ६ चैतदेखि सञ्चालन हुने भनिएको एसईई परीक्षा कोरोना भाइरसको महामारीका कारण स्थगित भई अहिले विद्यालयको आन्तरिक मूल्यांकनका आधारमा नतिजा निकाल्ने तयारी भइरहेको छ ।

परीक्षाको अन्तिम कसरतमा रहेका विद्यार्थीहरू परीक्षा हुने भनिएको समयभन्दा १ दिनअगाडि मात्र स्थगित भएपछि समस्यामा परेका थिए । परीक्षाको पर्खाइमा रहेका विद्यार्थीहरू अब भने सरकारले विद्यालयको आन्तरिक मूल्यांकनका आधारबाट एसईईको मूल्याङ्कन हुने जनाएपछि उनीहरू निराश बनेका छन् ।

एसईईको तयारीमा रहेकी धनगढीकी जमुना साउद भन्छिन, ‘भोलि परीक्षा तोकिएको थियो तर चैत ५ गते स्थगित भयो, एकाएक परीक्षा स्थगित भएपछि हामी परीक्षा हुने कि नहुने भनेर तनावमा थियौँ तर अहिले सरकारले परीक्षा नहुने र विद्यालयको आन्तरिक मूल्याङ्नबाट नतिजा निकाल्ने तयारी गरेपछि झनै चिन्तामा छौँ ।’

उनले भनिन्, ‘टेस्ट परीक्षाको बेला जस्तो नतिजा आए पनि अन्त्यमा एसईईको बेला त राम्रै नतिजा आउने गरी अध्ययन गरेका हुन्छौँ, तर अब परीक्षा नै नहुने भएपछि नतिजा कस्तो आउने हो भन्ने चिन्ता भइरहेको छ ।’

यता विद्यालयहरूले पनि सरकारले यस्तो निर्णय गर्नुपूर्व प्याब्सन/एन प्याब्सन संघसंस्था तथा विद्यालय र यससँग सम्बन्धित सरोकारवालाहरूसँग छलफल नै नगरिएको बताएका छन् ।

एसइई परीक्षाको मोडालिटी कस्तो बनाउने, अंक कसरी प्रदान गर्ने, ग्रेट सिट कसरी व्यवस्थापन गर्ने भन्नेबारेमा अन्याेल बढेको विद्यालयले बताएका छन् ।

शारदा माध्यमिक विद्यालय धनगढीका प्रधानाध्यापक तेजबहादुर सिंहले भने, ‘राष्ट्रिय परीक्षा बोर्डले कुनै गृहकार्य नगर्ने, शिक्षा विज्ञान तथा प्रविधि मन्त्रालयले पनि सरोकावालाहरूसँग कुनै छलफल गरेको भेटिएन, एकै चोटि मन्त्रिपरिषद्ले विद्यालयको आन्तरिक मुल्याङ्कनबाट नतिजा निकाल्ने निर्णय हुनु दुःखद हो, यसले गर्दा समस्या हुन सक्छ ।’

उनले थपे, ‘सरकारले यस्तो निर्णय गर्नुपूर्व सरोकारवालाहरूसँग छलफल गर्नुपर्थ्यो, तर त्यो भएन, यसले गर्दा नतिजा निकाल्नै समस्या हुने र विद्यार्थीमा पनि मानसिक असर पर्न सक्ने उनले भनाइ छ ।’

स्थगित भएको एसईई परीक्षा के कसरी सञ्चालन गर्ने भन्नेबारेमा कार्यविधि आइसकेकाले ढिलाइ भएको शिक्षा विकास तथा समन्वय इकाई कैलालीका प्रमुख वैकुण्ठ सुवेदीले बताए ।

मन्त्रिपरिषद्को निर्णयले विद्यालयको आन्तरिक मूल्याङ्कनका आधारमा परीक्षाको ग्रेट वृद्धिको सिट उपलब्ध गराउने निर्णय भएको उनले जानकारी दिए ।

जतिसक्दो छिटो कार्यविधि र स्पष्ट निर्देशन आएपछि त्यसैअनुसार ग्रेट सिट केन्द्रमा पठाइने इकाई प्रमुख सुवेदीको भनाइ छ ।

एसईई परीक्षा हुने/नहुने अन्याेलबीच सरकारले २८ जेठमा एसइईका लागि विद्यालयको आन्तरिक मूल्याङकनबाट राष्ट्रिय परीक्षा बोर्डले प्रमाणपत्र जारी गर्ने निर्णय गरेको थियो ।

निर्णय गर्नु ठीक भए पनि मूल्याङ्कनका आधारमा प्रमाणपत्र जारी गर्ने कार्यले समस्या निम्तिने विद्यार्थीको भनाइ छ । माध्यमिक शिक्षा परीक्षा एसईईका लागि विद्यालयको आन्तरिक मूल्याङ्कनबाट विद्यार्थीलाई नम्बर दिँदा र ग्रेट वृद्धिमा सोचेजस्तो नतिजा नआउने विद्यार्थीको दु:खेसो छ ।

कैलाली जिल्लाका २ सय ७२ ओटा विद्यालयका १६ हजार बढी विद्यार्थीहरू एसईई परीक्षाको तयारीमा थिए ।

प्रकाशित मिति: आइतबार, असार ७, २०७७ १३:१८