चितवन मेडिकल कलेजले दियो आइसोलेसनका लागि १० वटा शय्या

A+ A A-

चितवन मेडिकल कलेजले माडी नगरपालिकामा स्थापना गरिएको आइसोलेसनका लागि १० थान शय्या उपलब्ध गराएको छ । कलेजले ७ लाख रुपैयाँबराबरका ती शय्या नगरपालिकालाई हस्तान्तरण गरेको हो ।

नगरपालिका प्रमुख ठाकुर ढकालका अनुसार कलेजले उपलब्ध गराएका शय्या आइसोलेसनमा राखिएको छ । कलेजले स्वास्थ्य उपचारमा आवश्यक सहयोगको आश्वासनसमेत दिएको उनले जानकारी दिए । हाल माडीको आइसोलेसनमा सात जना कोरोना सङ्क्रमित छन् । क्वारेन्टाइनमा २५६ जना छन् ।
सङ्क्रमण देखिएपछि आफ्नै आइसोलेसनमा राखेर उपचार गर्ने माडी जिल्लाको एक मात्र नगरपालिका हो ।

आइसोलेसन बन्नुअघि र पछि समस्या देखिएपछि ७ जनालाई भरतपुर अस्पताल पठाइएको थियो । ढकालले अब दुई शय्याको भेन्टिलेटरसहित सघन उपचार कक्ष पनि माडीमा नै स्थापना गरिने बताए ।

चितवन मेडिकल कलेजका अध्यक्ष एवं प्रबन्ध निर्देशक प्रा.डा. हरिशचन्द्र न्यौपानेले कोरोनाको सङ्क्रमण देखिएपछि विभिन्न ठाउँमा सहयोग गरिएको बताए । भरतपुर कोरोना विशेष (अस्थायी) अस्पतालमा २० शय्या पछि फिर्ता गर्ने गरी कलेजले दिएको छ । यसैगरी, फिर्ता नगर्ने गरी माडीसँगै भरतपुर महानगरपालिका– ५ मा १० शय्या उपलब्ध गराइएको उनले जानकारी दिए ।

भरतपुर कोभिड–१९ प्रयोगशाला स्थापना गर्दा सोही मेडिकल कलेजका पाँच जना चिकित्सक प्राविधिकले सहयोग गरेका थिए । न्यौपानेका अनुसार अहिले पनि दुई जना त्यहीँ कार्यरत छन् । कलेजले निजीक्षेत्रबाट पीसीआर परीक्षणका लागि ५ करोड रुपैयाँ खर्च गरेर प्रयोगशाला तयार गरेको छ । न्यौपानेले सरकारले चलाउन चाहेमा प्रयोगशाला दिने भन्दै स्वास्थ्य मन्त्रालयलाई पत्राचार गरेको समेत जानकारी दिए ।

स्वास्थ्य सामग्री सहयोग

विराट नेपाल मेडिकल ट्रस्टले स्वास्थ्य कार्यालय चितवनलाई ३ लाख रुपैयाँबराबरको स्वास्थ्य सामग्री हस्तान्तरण गरेको छ । ट्रस्टका क्षेत्रीय कार्यालय प्रमुख पुष्करराज पौडेलले कार्यालयका प्रमुख दीपक तिवारीलाई ती सामग्री बिहीबार हस्तान्तरण गरेका हुन् ।

सो अवसरमा कोरोनाको रोकथाम नियन्त्रण तथा उपचारका क्रममा अग्रपङ्क्तिमा रहेका स्वास्थ्यकर्मी र संलग्न अन्य व्यक्तिका लागि उपयोगी हुने ७० व्यक्तिगत सुरक्षा सामग्री, केएन ९५ मास्क ७० थान, स्यानिटाइजर ६० थान, पञ्जा ६० थान, एप्रोन १५ थान र बुट १५ थान उपलब्ध गराइएको थियो ।

पौडेलले पहिलो चरणमा ती सामग्री उपलब्ध गराइएको बताउँदै दोस्रो चरणमा जिल्लाका सबै पालिकाका स्वास्थ्य संस्थाबाट उपचार सेवा लिइरहेका क्षयरोगबाट प्रत्यक्ष वा अप्रत्यक्ष रूपमा प्रभावित ३०० परिवारलाई खाद्य राहत सामग्री वितरण गरिने बताए ।

स्वास्थ्य कार्यालय प्रमुख तिवारीले संस्थाको सहयोगले उच्च जोखिममा काम गरिरहेका स्वास्थ्यकर्मीलाई धेरथोर सहयोग पुग्ने बताए । ट्रस्टले नेपालमा क्षयरोग नियन्त्रण कार्यक्रममा सहयोग गर्दै आइरहेको छ ।

संस्थाले हाल जिल्लामा राष्ट्रिय क्षयरोग नियन्त्रण केन्द्र, प्रादेशिक स्वास्थ्य निर्देशनालय, स्वास्थ्य कार्यालय तथा स्थानीय तहसँग समन्वय गरी निक साइमन्स फाउण्डेसनको आर्थिक सहयोगमा इप्याक्ट टीभी परियोजना सञ्चालन गर्दै आइरहेको छ । रासस

प्रकाशित मिति: शुक्रबार, असार ५, २०७७ १४:४६