डडेल्धुरामा क्वारेन्टाइनबाट घर फर्केका ५८ जनामा कोरोना पुष्टि

A+ A A-

डडेल्धुरामा क्वारेन्टाइनबाट घर गएका ५८ जनामा कोरोना पोजिटिभ देखिएको छ । जिल्लाको गन्यापधुरा गाउँपालिकाले क्वारेन्टाइनबाट घर पठाएकामध्ये ५८ जनामा कोरोना पोजिटिभ देखिएको हो ।

गाउँपालिकाले कोरोना परीक्षणका लागि क्वारेन्टाइनमा रहेका व्यक्तिहरूको स्वाब संकलन गरी १ हप्ताअघि घर पठाएको थियो । कोरोना परीक्षणको रिपोर्ट नआउँदै घर पठाएका गन्यापधुरा गाउँपालिकाका ५८ जना संक्रमण भएको रिपोर्ट बिहीबार आएको हो ।

क्वारेन्टाइनमा राखेको १४ दिनसम्म कसैमा पनि कोरोना लक्षण नदेखिएको र स्वाब परीक्षणको रिपोर्ट ढिला भएकोले घर पठाइएको गन्यापधुरा स्वास्थ्य शाखा प्रमुख बासुदेव नौन्यालले बताए ।

उनका अनुसार रिपोर्ट आउने समयसम्म होम क्वारेन्टाइनमा बस्नु बनेर घर पठाइएको हो । स्वास्थ्य कार्यालयका अनुसार बिहीबार डडेल्धुराका ८३ जनामा कोरोना रोग संक्रमण भएको पुष्टि भएको छ ।

गन्यापधुरा गाउँपालिकाका ५८, परशुराम नगरपालिकाका २१ र अजयमेरु गाउँपालिकाका ४ जनामा कोरोना संक्रमण देखिएको शाखा प्रमुख नौन्यालले जानकारी दिए ।

राष्ट्रिय जनस्वास्थ्य प्रयोगशाला टेकुमा गरिएको परीक्षणमा गन्यापधुरा गाउँपालिका-३ का १९ जना, वडा नं. ४ का १५, वडा नं. ५ का १ र वडा नं. २ का २३ जनामा कोरोना पोजिटिभ देखिएको छ ।

त्यस्तै, अजयमेरु गाउँपालिका-१ का १ र वडा नं. २ का ३ जनामा पनि कोरोना पुष्टि भएको छ । जिल्लाकै परशुराम नगरपालिका-३ का १, वडा नं. ४ का २, वडा नं. ५ का १०, वडा नं. ६ का १ र वडा नं. ७ का ८ जनामा पनि कोरोना नतिजा पोजिटिभ आएको छ ।

कोरोना पुष्टि भएका अजयमेरु गाउँपालिकाका ४ जना क्वारेन्टाइनमै रहेका अजयमेरु स्वास्थ्य शाखा प्रमुख हिक्मतबहादुर कठायले जानकारी दिए ।

परशुराम नगरपालिकाका कोरोना पुष्टि भएका २२ जनामध्ये अधिकांश संक्रमित भने क्वारेन्टाइनबाट घर गइसकेको परशुराम नगरपालिका स्वास्थ्य शाखा प्रमुख हिक्मत धामीले बताए । उनका अनुसार परिगाउँ क्षेत्रका व्यक्तिहरू क्वारेन्टाइनबाट घर फर्किएका हुन् ।

प्रकाशित मिति: बिहीबार, असार ४, २०७७ १९:४१