८१ दिनपछि जानकी मन्दिर पूजापाठका लागि खुल्ला

A+ A A-

कोरोना महामारीका कारणले गत ८१ दिनदेखि बन्द रहेको हिन्दुहरूको आस्थाको केन्द्रको रूपमा रहेको जनकपुरधामको जानकी मन्दिर पूजापाठका लागि खोलिएको छ । महामारीको नियन्त्रण तथा रोकथामका लागि घोषणा गरिएको लकडाउन अवधिमा मन्दिरको मूल ढोका बन्द रहको थियो ।

गत चैत्र १५ गतेदेखि जानकी मन्दिरको मूल ढोका बन्द गरिएकोमा अहिले खुल्ला गर्ने काम भएको जानकी मन्दिरका महन्थ रामतपेश्वर दास वैष्णवले जानकारी दिए । पूजामा सोसल डिस्टेन्सलाई ध्यानमा राखिने उनले बताए । लकडाउनकै क्रममा रामनवमी र जानकी नवमी जस्तो उत्सव भएको थियो । मनिदरकै पूजारी मात्रै सो उत्सवमा सहभागि भएका थिए । प्रत्येक महिना कुनै न कुनै उत्सव भइरहन्छ त्यो उत्सवमा पनि विशेष सर्तकर्ता अपनाइने मन्दिरले जनाएको छ । मन्दिर बन्द रहेको बेला धेरै व्यक्ति बाहिर पुगेर नै पूजा गर्ने गर्थे ।

जानकी मन्दिर स्थापना भएको ५ सय वर्षको इतिहासमा पहिलो पटक मूल ढोका ८१ दिनसम्म बन्द गरिएको जानकी मन्दिरका उत्तराधिकारी महन्थ रामरोशन दास वैष्णवले बताए ।

मन्दिरका संस्थापक महन्थ सुरकिशोर दास वैष्णवले स्थापना गरेको जानकी मन्दिर सुरुमा सानो आकारको भए पनि भारतका टिकमगढका महारानी बृषभानु कुमारीले आजभन्दा १ सय २६ वर्षअगाडि तत्कालीन ९ लाख असर्फी मुद्रामा अहिलेको जानकी मन्दिरको विशाल मन्दिरको निर्माण गराएका थिए ।

विश्वका हिन्दुहरूका लागि आस्थाको केन्द्रको रूपमा रहेको जानकी मन्दिर खुले पनि भक्तजनहरू निक्कै कमै मात्रामा पूजा पाठका लागि आउने गरेका छन् । मन्दिरमा आउने भक्तजनहरू प्रायः स्थानीय नै रहेको उत्तराधिकारी महन्थ दासले जानकारी दिए ।

लकडाउन अवधिभरिमा मन्दिरको मूल ढोका बन्द रहे पनि भित्र पूजारी तथा महन्थहरूले परम्परागत रूपमा चल्दै आएको पद्धतिद्वारा नियमित रूपमा पूजापाठ आयोजना गर्दै आएका थिए । मन्दिरका मूल ढोका खुल्ला भए पनि कोरोनाको सङ्क्रमण जारी नै रहेका कारणले भक्तजनहरू निक्कै न्यून मात्रामा दर्शनका लागि पुग्ने गरेका छन् ।

भक्तजनहरू मन्दिरमा पुगे पनि मास्क, सेनिटाईजर तथा व्यक्तिगत दूरी कायम गर्ने गरी मन्दिरमा प्रवेशका लागि उचित व्यवस्थापन गरेको पाइँदैनन् । सचेत भक्तहरू आफैँ दूरी बनाएर पूजापाठ तथा दर्शन गर्ने गरेका छन् ।