छिट्टै दैनिक १० हजार व्यक्तिको कोरोना परीक्षण गछौँ : उपप्रधानमन्त्री पोखरेल

छिट्टै दैनिक १० हजार व्यक्तिको कोरोना परीक्षण गछौँ : उपप्रधानमन्त्री पोखरेल

फाइल तस्वीर

A+ A A-

उपप्रधान, रक्षामन्त्री तथा कोरोना भाइरस कोभिड १९ क्राइसीस म्यानेजमेन्ट सेन्टर (सीसीएमसी) निर्देशक समितिका संयोजक ईश्वर पोखरेलले छिट्टै कोरोनाको परीक्षण दैनिक १० हजार पुर्‍याउने बताएका छन् ।

सीसीएमसीले नेपालमा भदौसम्म नेपालमा कोरोना संक्रमितको संख्या बढ्ने अनुमान गरेको छ । अहिलेको अवस्थामा नै फैलियो भने पिकमा पुग्न भदौ पूरा लाग्न सक्ने अनुमान गरिएको पोखरेलले बताए ।

‘अहिले लकडाउन पूरै खुलेको छैन । केही खुकुलो बनाएर जनजीवनलाई सहज बनाउने काम गरीएको हो’, उनले भने, ‘कोरोना सक्रमण घटिरहेको छैन । बरु बढी नै रहेको छ । अहिलेको परिस्थिति रहेमा भदौसम्ममा धेरै संख्यामा कोरोना संक्रमित थपिने छन् ।’

अन्य देशको तुलनामा नेपालमा कोरोना भाइरस नियन्त्रणमा नै रहेको उपप्रधानमन्त्री पोखरेलको भनाइ थियो । उनले भन, ‘अहिलेसम्म दैनिक ६ हजारको कोरोना परीक्षण भइरहेको छ । अब छिट्टैै १० हजार पुगाउँदै छौँ । परीक्षणको दायरा बढेपछि यसको रोकथाम गर्न पनि सहज हुने छ ।’

नेपालमा अहिले भइरहेको कोरोना परीक्षण दक्षिण एसियाली देशहरूमा उच्च रहेको उनले दाबी गरे । आजसम्म नेपालमा १ लाख ४९ हजार ७ सय व्यक्तिमा पीसीआर परीक्षण भएको छ । त्यस्तै, २ लाख ३४ हजारको हाराहारीमा आरडीटी परीक्षण गरिएको छ ।

उपप्रधानमन्त्री पोखरेलले भने, ‘सुरुको कोरोना सक्रमणको परिक्षण गर्न हङकङ पठाएका थियौँ । त्यो अवस्थाबाट काम सुरु गरेका हामीले अहिले देशभरीमा २४ स्थानबाट परीक्षण भइरहेको छ । यसको दायरा अझै बढाउँदै छौँ । यसमा अझ मापदण्ड पुगेका निजी क्षेत्रलाई पनि सहभागी गराउँदै छौँ ।’

मन्त्रिपरिषद्को बैठकबाट नै कोराना भाइरसको पीसीआर परिक्षण गर्न निजी क्षेत्रलाई पनि दिने भनिएको छ । तर, स्वाबको संकलन भने सरकारी चिकित्सकहरूले नै गर्ने र परीक्षण निजीले गर्ने उनले बताए ।

उपप्रधानमन्त्री पोखरेलले भने, ‘स्वाब संकलनको अनेक मापदण्ड छन् । निजीलाई यो काम दिन सकिँदैन । अहिले सरकारी चिकित्सकहरूले नै स्वाब संकल गर्ने हो । परीक्षण गर्न मात्र निजीले पाउँछन् ।’

निजीले परिक्षण गरेवाफत प्रतिस्वाबको ५ हजार ५ सय रुपैयाँ दिने निर्णय गरिसकेको छ । सीसीएमसीले अब देशभरीका क्वारेन्टाइनको स्तर सुधार्नतर्फ पनि ध्यान केन्द्रीत गर्ने उनले बताए । अनुभव नहुँदा सुरुसुरुमा केही कमीकमजोरी हुँदा क्वारेन्टाइनको अवस्था सोचे जस्तो राम्रो हुन नसकेको उनले बताए ।

एकै पटक भारतबाट घर फर्कंने नेपालको संख्या ह्वात्तै बढेकाले एक पटक निकै अलमलमा परेको उनले बताए । उपप्रधानमन्त्री पोखरेलले स्वास्थ्य मन्त्रालयले मापदण्ड बनाएको भएपनि त्यसअनुसार काम गर्न गाह्रो भएको स्वीकार गरे । ‘बाहिरबाट आएका मानिसलाई जहाँ राखियो । त्यसलाई नै क्वारेन्टाइन भनियो । जहाँ व्यवस्थापकीय कमजोरी देखियो’, उनले भने ।

अहिलेसम्म भारतबाट नेपाल आउनेको संख्या ७ लाख रहेको उनले बताए । ‘यतिका मानिसको एकै पटक व्यवस्थापन गर्दा केही कमजोर पक्कै भएको हो । अहिले त यसमा केन्द्र, प्रदेश र स्थानीय तह लागि परेका छन् । सुधार छिट्टै दैनिक १० व्यक्तिको कोरोना परीक्षण गछौँ’, उपप्रधानमन्त्री पोखरेलले भने ।

तेस्रो मुलकबाट नागरिक ल्याउने भनिए पनि केही देशमा कठिनाइ आएको उनले बताए । सम्बन्धित देशका दूतावास, परराष्ट्रमन्त्राल र संस्कृति तथा पर्यटन मन्त्रालयबीच छलफल भएर छिट्टै तेस्रो मुलकमा अलपत्र नेपाललीलाई स्वदेश ल्याइने उनले बताए ।

अब चिकित्सा सामग्री पनि स्वास्थ्य मन्त्रालयले नै खरिद गर्ने उनले जानकारी दिए । बीचमा नेपाली सेनालाई स्वास्थ्य सामग्री खरिदको जिम्मा दिएको भएपनि अबबाट सम्बन्धित मन्त्रालयले नै खरिद गर्ने उनले बताए ।

सुरुमा सामग्री खरिदमा समस्या भएपनि अब अवस्था विस्तारै सहज भएको उपप्रधानमन्त्री पोखरेलको भनाई छ ।

प्रकाशित मिति: बुधबार, असार ३, २०७७ २१:५५