सुशान्तको आत्महत्याले नेपालमा सुरु गर्‍यो 'नेपोटिजम'को बहस

A+ A A-

आइतबार बलिउड अभिनेता सुशान्त सिंह राजपुतले आत्महत्या गरे । उनको आत्महत्याको कारण डिप्रेसन थियो । डिप्रेसनको कारण भने बलिउडकर्मीहरू नै भएको धेरैको आरोप छ ।

बलिउडमा भएको 'नेपोटिजम' अर्थात् आफन्तलाई मात्र मौका दिने कुराले सुशान्त डिप्रेसनमा पुगेका थिए । राम्रो काम गर्दागर्दै पनि उनलाई बलिउडका केही प्रतिष्ठित निर्माण कम्पनीले ब्याण्ड नै गरेका थिए, जसका कारण उनी डिप्रेसनमा गएको धेरैको आरोप छ ।

सुशान्तको मृत्युपछि नेपालमा पनि यस विषयमा बहस सुरु भएको छ । धेरैले 'नेपोटिजम'को विषयमा बोलेका छन् ।

नायिका वर्षा शिवाकोटीले त नेपाली चलचित्र क्षेत्रमा भएको नातावादका कारण आफू पनि डिप्रेसनमा गएको फेसबुक स्टाटसमा नै लेखेकी छन् । यहाँ क्षमताको भन्दा पनि नतावाद, समूह बनाउने, प्रेमका कारण चलचित्रमा काम गराउने प्रवृत्ति रहेको वर्षाको गुनासो छ ।

त्यस्तै, नायिका नम्रता सापकोटाले ‘परिवारवाद’ नेपाली चलचित्र क्षेत्रमा हावी भएको उल्लेख गरेकी छन् । यहाँ कलाकारितालाई भन्दा पनि आफ्नालाई बढी साथ दिने चलन रहेको उनको आरोप छ ।

चलचित्र निर्माता तथा कलाकार दीपकराज गिरी भने नेपालमा 'नेपोटिजम'भन्दा पनि 'नेप्टोजम' र 'चेप्टोजम' हावी भइरहेको बताउँछन् । उनले फेसबुक स्टाटसमा लेखेका छन्, 'भारतमा परिवारवादको कुरा उठेसँगै नेपालमा पनि सुरु भएछ । हाम्रोमा परिवारवाद होइन, नोप्टोजम र चेप्टोजमको समस्या छ । गलत मान्छेहरू यही दाउरोमा भात पकाउँछन् ।’

नायक सुशील श्रेष्ठ पनि चलचित्र क्षेत्रमा नेपोटिजम नभएको दाबी गर्छन् । परिवारवादबाट आएका कलाकारहरू को कति सफल भएका छन् भन्ने प्रश्न उठाउँदै राम्रो काम गर्ने कलाकार सधैँ सफल भइरहेको उनले गुनासो गरेका छन् ।

नायक आमेश भण्डारीले राम्रो कलाकारले चलचित्र नपाएर डिप्रेसनमा जान नपरोस् भन्दै स्टाटस लेखेका छन् । यहाँ 'ग्रुपिजम' हुने र आफ्नो मान्छेलाई काम दिने चलन रहेको उनको भनाइ छ । सक्षम कलाकार काम र पैसाको अभावले डिप्रेसनमा गएर मर्नुपर्ने अवस्था नबनाउन आमेशले अनुरोध गरेका छन् ।

नेपोटिजमको विषयमा निर्माता सन्तोष सेन, हल सञ्चालक तथा निर्माता प्रदीपकुमार उदयलगायतले पनि बोलेका छन् । उनीहरूले पनि यहाँ परिवारवादका कारण कोही पनि सफल नभएको बताएका छन् ।

प्रकाशित मिति: बुधबार, असार ३, २०७७ १५:०७