संक्रमित स्टाफ नर्स भन्छिन्, ‘म समाजसँग डराएँ, काेराेना मसँग'

प्रतीकात्मक तस्वीर

A+ A A-

सुदूरपश्चिममा दिन प्रतिदिन कोरोनाका बिरामी बढ्दै जान थालेका छन् । यस प्रदेशमा क्वारेन्टाइनबाटै सुरक्षाकर्मी, स्वास्थ्यकर्मी र भान्सेसम्ममा संक्रमण फैलिएको छ ।

सुदूरपश्चिमको ७ पहाडी जिल्लाको केन्द्रमा रहेको डडेल्धुरामा पनि मंगलबारसम्म ३९ जनामा कोराना संक्रमण पुष्टि भएको छ । जसमध्ये एक ३३ वर्षीया स्वास्थ्यकर्मी पनि छन् । उनी विगत ११ वर्षदेखि चिकित्सा क्षेत्रमा स्टाफ नर्सकाे रूपमा कार्यरत छन् ।

सानैदेखि स्वास्थ्यकर्मी बनेर बिरामीको उपचार गर्ने हेतुले उनले एसएलसी हालको एसईई पढाइ सकेपछि स्टाफ नर्सको पढाइ सुरु गरिन् । २०६४ सालमा स्टाफ नर्सको पढाइ सकेर उनी सिधै यो पेसातर्फ अग्रसर भइन् ।

पढाइ सकेर ११ वर्ष जागिर गरिसकेकी उनलाई जीवनकालमा महामारीको रूपमा संसारमा यस्तो रोग आएर लाखौँको ज्यान लिन्छ भन्ने विश्वाससमेत थिएन । अझ, कोरोना महामारीका कारण मानिसको ज्यान गयो भनेर रेडियो, टेलिभिजन तथा पत्रपत्रिकामा पढ्दा सुन्दा अचम्म लाग्थ्यो ।

डडेल्धुरा अस्पतालमा कार्यरत उनका सहकर्मी साथीहरूले ‘कोरोना संक्रमित कस्ता होलान् है’ भनेर कुरा गर्दा ‘कस्ता होलान् र ? हामीजस्तै होलान्’ भनेर सम्झाउने उनमा पनि कोरोनाका संक्रमित हेर्ने खुल्दुली नभएको भने होइन ।

डडेल्धुराको परशुराम नगरपालिका–१० का २८ वर्षीयमा पहिलो पटक कोरोना संक्रमण पुष्टि भएपछि त उनी छक्क परिन् । कोरोनाका बिरामी हेर्ने मात्रै होइन, उनी आफैँमा कोरोना भाइरसको संक्रमण देखिपछि उनी झन् छक्क परिन् ।

उनकाे पीसीआर रिपाेर्ट पाेजिटिभ आए पनि कोरोना भाइरसकाे लक्षण भने देखिएकाे छैन । त्यसैले कोरोना छ भन्दा उनी आफैँ छक्क परिन् । कोरोनाको लक्षण नभएकाले उनी घरकै कोठामा आनन्दका साथ बसिरहेकी छन् । फ्रन्टलाइनर भनिने स्वास्थ्यकर्मीमध्येकी एक उनी कोरोनाले कतिबेला आक्रमण गरेको रहेछ भनेर आफैँलाई पत्ताे नभएको बताउँछिन् ।

‘बेलाबेला समाचारमा सुन्दा कस्तो होला कोरोना भनेर साच्ने गर्थें,’ उनले भनिन्, ‘अहिले आएर आफैँ कोरोनासँग लडिरहेकी छु ।’

अस्पतालबाटै कोरोना भाइरस सरेको आशंका

अस्पतालको वार्डमा कार्यरत उनलाई अस्पतालबाटै कोरोना भाइरस सरेको हो कि भन्ने शंका लागेको छ । सबै स्वास्थ्य सुरक्षा सामग्री प्रयोग गर्दागर्दै पनि २३ जेठमा टाउको र घाँटी दुखेपछि उनले कोरोना भाइरस परीक्षणका लागि स्वाब दिएकी थिइन् ।

उसो त डडेल्धुरा अस्पतालमा कार्यरत कर्मचारीको मेडिकलमा काम गर्ने एक स्वास्थ्यकर्मी, त्यसैगरी डडेल्धुरा अस्पतालमा सेवा लिन आएकी एक सुत्केरी र बिरामी भएर अस्पताल पुगेका डडेल्धुराका पहिलो संक्रमितको सम्पर्कमा आइयो कि भनेर पनि उनले परीक्षणका लागि नमुना दिएकी थिइन् ।

‘२३ गतेतिर टाउको दुख्ने, घाँटी दुख्ने भएको थियो र अस्पतालको सम्पर्कमा आएकाहरूमा कोरोना देखिएपछि मैले पनि स्वाब दिएकी थिएँ,’ उनले भनिन् ।

स्वाब दिएकै दिनबाट बिदामा बसेकी उनको रिपोर्ट पोजिटिभ एक हप्तापछि शनिबार आयो । ‘म घरमै थिएँ, अस्पतालका मेुसु जगदिश विष्ट सरले मलाई कोरोना भएको जानकारी गराउनुभयो,’ उनले भनिन्, ‘सुरुमा त डर लाग्यो तर, लक्षण नदेखिएकाले उहाँले घरमै सेल्फ आइसोलेसनमा बस्न भनेपछि अलि ढुक्क भएँ ।’

श्रीमानको साथ पाउँदा खुसी

डडेल्धुरा अस्पतालमा विगत ४ वर्षदेखि कार्यरत उनी श्रीमान् र छोरासँगै सदरमुकामको कीर्तिपुरमा बस्ने गर्थिन् । तर, कोरोना महामारी आएपछि छोरालाई घर पठाएकाले अहिले उनी श्रीमानसँग बस्दै छिन् ।

दिनमा पटकपटक तातोपानी पिउने गरेको बताउने उनी टेलिभिजन हेरेर र इन्टरनेट चलाएर समय कटाउँछिन् । ‘श्रीमानले स्याहार गरिरहनुभएको छ । बेलाबेला तातोपानी र खानेकुरा बनाइरहनुहुन्छ,’ उनले भनिन्, ‘यसको संक्रमण भएमा आत्मबल बढाउने कोही चाहिने रहेछ । मलाई डर त फिटिक्कै लागेको छैन ।’

उनको नजरमा आत्मबल र रोगप्रतिरोधात्मक क्षमता नै कोरोनाको औषधि हो । उनी भन्छिन, ‘सबैजना कोरोना भुत हो भनेजसरी डराइरहन्छन् । तर, यो केही हाेइन रहेछ। डराउनुपर्ने केही छैन । आफ्नो आत्मबल बढाई खानपिनमा ध्यान दिई रोग प्रतिरोधात्मक क्षमता बढाइयो भने यो केही हाेइन ।’

‘कोरोना सामान्य रोग हो’ उनी भन्छिन्, ‘जो डर गया वो मर गयाः डरके आगे जित हे’ तर, अहिले कोरोनालाई सहजै जित्ने आँट गरेकी उनी सबैलाई मनोबल उच्च राख्न आग्रह गर्छिन् ।

कोरोनाभन्दा समाजको डर

कोरोनाका कारण देशभर लकडाउन भई सबै काम ठप्प भएका बेला ज्यानै जोखिममा राखेर बिरामीको सेवामा खटिएकी उनलाई समाजको हेर्ने दृष्टिकोणबाट भने डर लाग्छ । घरमा सासूलाई जानकारी नगराएको बताउने उनी रोगले भन्दा मानिसले हेर्ने नजरबाट कोरोनाले बढी असर गर्ने बताउँछिन् ।

उनले थपिन्, 'काेराेना संक्रमण भएपछि सुरुमा समाजले कुन दृष्टिले हेर्ला भनेर म डराएँ, अहिले मदेखि काेराेना डराएकाे छ । शायद मैले कोरोना जितिसके होला ।’

‘कोरोना संक्रमितलाई फरक नजरले हेर्छन्, जसले गर्दा उसको मनोबल घट्छ र उसलाई धरै असर गर्छ,’ उनले भनिन्, कोरोना लागेका मानिस कस्ता हुन्छन् भनेर सबै जना चासो राख्छन् । उसको बारेमा जान्न खोज्छन् । त्यसले संक्रमितलाई कमजोर बनाउँछ ।' तसर्थ समाजले उसलाई पनि समान व्यवहार गर्‍याे भने कोरोना जित्न सहज हुन्छ ।’

प्रकाशित मिति: बुधबार, असार ३, २०७७ १४:००