सुदूरपश्चिम प्रदेश : प्रतिपक्षी भन्छ, ‘बजेट बलात्कृत भयो’

बजेट प्रस्तुत गर्दै प्रदेशका आर्थिक मामिला तथा योजना मन्त्री झपट बोहरा

A+ A A-

सुदूरपश्चिम प्रदेश सरकारले सोमबार आगामी आर्थिक वर्षका लागि ३३ अर्ब ३८ करोड १३ लाख ४८ हजार रुपैयाँबराबरको बजेट सार्वजनिक गरेको छ । प्रदेश सरकारले सोमबार ल्याएको पूर्ण बजेटका विषयमा विभिन्न टिकाटिप्पणी सुरु भएका छन् ।

कसैले बजेट उत्कृष्ट रहेको बताएका छन् भने कोही बजेटप्रति सन्तुष्ट नरहेको बताउँछन् । सुदूरपश्चिम प्रदेशको प्रमुख प्रतिपक्षी दल नेपाली कांग्रेसले प्रदेश सरकारले ल्याएको बजेट विगतकै निरन्तरता भएको बताएका छ । कांग्रेसका सांसदले मुख्यमन्त्री र अर्थमन्त्रीबाट बजेट बलात्कृत भएको आरोप लगाएका छन् ।

सुदूरपश्चिमका नागरिकले जुन अपेक्षा राखेको थियो त्यस्तो नआएकाले आफूले यस बजेटलाई विगतकै निरन्तरता र वर्तमान प्रतिको उदासीनताका बीचमा आएको बजेटका रूपमा लिएको नेपाली कांग्रेसका सांसद कर्ण मल्लले बताए । ‘बजेट निराशाजनक भयो । कसैलाई काखा कसैलाई पाखा गरेर आयो । न्यायोचित ढंगले आउनुपर्थ्यो, आएन,’ उनले भने, ‘यो बजेट छारो हाल्ने ढंगले ल्याएको बजेट हो ।’

कोरोनाको महामारी फैलिएको छ यसको रोकथाम कसरी गर्ने, भोकमरीको चिन्ता छ, यसबाट नागरिकलाई कसरी बचाउने, बेरोजगारीको धेरै ठूलो कहाली लाग्दो अवस्था हाम्रो अगाडि कालो बादल जस्तो देखिएको छ, यी तीन कुराबाट सुदूरपश्चिमलाई कसरी माथि ल्याउने भन्ने कुरामा बजेट केन्द्रित हुनुपर्ने भए पनि त्यस्तो नभएको उनको भनाइ छ ।

‘कालापानी, लिपुलेक र लिम्पियाधुरासहितको विवादित भूमिबाट सेना हटाउने संकल्प प्रस्ताव सुदूरपश्चिमको संसदबाट पहिलोपटक सर्वसम्मतबाट पास भयो,’ उनले भने, ‘तीन कुरामा बढी जोड दिनुहोस्, हामी ताली बजाएर स्वागत गर्छौं भनेर प्रदेशका मुख्यमन्त्री र अर्थमन्त्रीलाई भनेका थियौँ । तर, त्यसो भएन । बजेट बलात्कृत भयो ।’

‘म हिँड्छु, मेरो प्रदेश हिँड्छ’ ‘युवाको जवानी प्रदेशको लगानी’ जस्ता कविले कविता पढेको जस्ता नारा बनाएर बजेट ल्याएको कांग्रेसका प्रमुख सचेतक गोविन्द बोहराले बताए । कांग्रेसले राखेको धारण बजेटमा समावेश नभएको उनको भनाइ छ । कोरोना महामारी नियन्त्रण गर्न बजेट आउनुपर्ने भए पनि नआएको उनले बताए ।

‘जनताको पक्षमा बजेट आउनुपर्ने हाम्रो माग थियो । तर, आएन । प्रदेश सरकारले उपलब्धिमूलक कार्य विगतमा पनि गरेन् र अहिले पनि गर्दैन,’ उनले भने, ‘विगतको बजेट खर्च गर्न नसकेर त्यत्तिकै जाँदै छ । अझ प्रदेश सरकारले बजेट बढाएको छ । बजेट खर्च गर्न नसक्ने सरकार अपाङ्ग भइसक्यो। पूर्ण रूपमा 'फेल' भइसक्यो ।’

सत्तापक्षीय सांसदको बचाउ

प्रतिपक्षी दलका सांसदहरू आगामी आर्थिक वर्षका लागि प्रदेश सरकारले ल्याएको बजेटबाट सन्तुष्ट हुने अवस्था नरहेको बताए पनि सत्तारूढ दलका सांसदहरूले भने बजेट उत्कृष्ट रहेको बताएका छन् ।

सत्तारूढ दल नेपाल कम्युनिस्ट पार्टी (नेकपा)का सांसद कुन्ती जोशीले बजेट उत्कृष्ट रहेको बताइन् । ‘बजेटले सबै क्षेत्र र विषयलाई समेटेको छ’ उनले भने, ‘अहिले महामारीको रूपमा देखा परेको कोरोना लक्षित बजेट आएको छ ।’

विगतका केही कुरालाई नियमितता दिनुपर्ने भएकोले निरन्तरता दिएको उनको भनाइ छ । समग्र रूपमा बजेट राम्रो रहेको उनले बताइन् । ‘नीतिगत रूपमा ठीक छ । तर, यसको कार्यान्यन आवश्यक छ,’ उनले भनिन्।

सत्तारूढ दल नेपाल कम्युनिस्ट पार्टी नेकपाका प्रमुख सचेतक तारालामा तामाङले हिजोको बजेट हेर्दा धेरै उत्साहित र धेरै हतोस्साहित हुने किसिमको नरहेको बताए ।

‘बजेट यो महामारीको समयमा आएको छ । चुनौती धेरै छन् । त्यसैले कार्यान्यन चुनौतीपूर्ण छ,’ उनले भने, ‘यो जनताको आशाको बीचमा आएको बजेट हो । कार्यान्यनमा सरकार गम्भीर बन्नुपर्ने जरुरी छ ।’

प्रकाशित मिति: मंगलबार, असार २, २०७७ ११:५८