८३ दिनपछि पूर्ण रूपमा खुलेका बैंकहरूले कस्तो सुरक्षा सर्तकता अपनाएका छन् ?

A+ A A-

कोरोना भाइरस (कोभिड–१९) को उच्च जोखिमलाई मध्यनजर गर्दै बन्द भएको बैंक तथा वित्तीय संस्थाहरू करिब ८३ दिनपछि पूर्णरूपमा संचालनमा आएका छन् । कोरोनाको संक्रमणको मध्यान्तरमा १० घण्टासम्म सेवा दिने यी बैंक तथा वित्तीय संस्थाहरूले कसरी जोखिमलाई न्यूनीकरण गर्दै काम गरिरहेका छन् त ?

भीड बढे ग्राहको प्राथामिकता हेरेर फर्काउँछौँ – वाणिज्य बैंक

वाणिज्य बैंकले सामाजिक दूरी कायम गरेर आशिंक रूपमा देशैभरीका शाखाहरू अघिदेखि नै खोलिसकेको छ । सोमबारबाट भने दूरी कायम गरेर थप २ सिफ्टमा कार्यालय सञ्चालन गरिरहेको छ ।

वाणिज्य बैंकका सीईओ किरण श्रेष्ठले सबै क्षेत्रमा २ सिफ्ट सञ्चालन नगरिने बताए । उनले भने, ‘बजारी क्षेत्र र भीडभाड हुने शाखाहरूमा दुई सिफ्ट लागू गरेका छौँ । भर्खरै सरकारी कार्यलय तथा व्यवसायहरू खुलेका छन्, त्यसैले अवस्य पनि निकै भीड हुने संभावाना छ । त्यसैले हरेक शाखाका गेटबाटै अत्याधिक भएका खण्डमा ग्राहकलाई अरू समयमा आउन भनेर फर्काउने गर्नुपर्छ ।’

श्रेष्ठका अनुसार भीडभाड कम गर्नका लागि बिहानको समयमा पनि बैंक सञ्चालन गरे पनि ग्राहक भने दिउँसो नै आउने हुनाले कर्मचारी थप जोखिम परेका छन् । उनले भने ‘बैंकले जोखिमलाई मध्यनजर गर्दै मास्क पञ्जा र स्यानिटाइजर वितरण गरिसकेको छ । ग्राहक सीधै कर्मचारिको नजिक आउन नसक्ने व्यवस्था गरिएकाले स्थिति सहज नै हुने अनुमान गरेका छौँ ।’

खर्च बढ्यो – गरिमा विकास बैंक

यता गरिमा विकास बैंकका सीईओ गोविन्द ढकाल भने बैंकमा सामाजिक दूरी कायम गराउनका लागि सुरक्षा कमिटीलाई थप सजग गराइएको बताए । उनले भने, ‘आजबाट खोल्न त खोलियो, तर यो निकै चुनौतीपूर्ण छ । ३ महिना थलिएका बैंकहरूमा २ सिफ्टमा सञ्चालन गर्दा खर्च उस्तै बढेको छ । कमर्चारी अभाव पनि हुन्छ ।’

ढकालका अनुसार आजबाट सम्पूर्ण सरकारी कार्यालय, यातायात कार्यालयहरू खुला गरिएकोले केहि दिन भीड बढ्ने संभावना रहेको छ । यसका लागि गरिमा विकास बैंकले पनि सामाजिक दूरी कायम गर्दै सेवा दिने व्यवस्था गरेको छ ।

‘लकडाउनको समयमा करिब ७० प्रतिशत जति निम्न वर्ग र मध्यम वर्गका ग्राहक बढी आएका छन्’ उनले भने,‘यसमा कतिपय एटिएम प्रयोग गर्न नजान्ने र चेक नै प्रयोग गर्नुपर्छ भन्ने मानसिकताका मानिस बढी छन् । आजबाट सबै कार्यालय खुला हुँदा अब धितोको र व्यावसायिक प्रयोजनका ग्राहक पनि आउने हुँँदा तुलनात्मक रूपमा भीड त हुन्छ नै । तर २ सिफ्टले केही भीड कम गराउला भन्ने आशा गरेका छौँ ।’

सीईओ ढकालले लकडाउनपश्चात् अनलाईन बैंकिङ प्रयोगकर्ता बढेकाले व्यक्तिगत प्रयोजन र करका लागि आउने ग्राहक खासै धेरै नहुने बताए । उनले अत्यावश्कबाहेक बैंकमा नआउन र आउनै परेको खण्डमा साँझ र बिहान गरेर आउन ग्राहकलाई आग्रहसमेत गरेका छन् ।

अनलाईन बैंकिङ प्रयोगबारे काउन्सेलिङ गरेर पठाइने – प्रभु बैंक

प्रभु बैंकका सीईओ अशोक शेरचनले भने कर्मचारीको स्वास्थ्य नै सबैभन्द ठूलो भएको भन्दै कमर्चारीलाई जोखिम नहुने तवरमा मात्रै बैंक सञ्चालन गरिएको बताए । ‘हामीले कर्मचारी व्यवस्थापन पनि गरिसकेका छौँ । खासमा कतिपय स्थानमा कर्मचारी थोरै हुनाले चाहदाचाहदै पनि २ सिफ्टमा सञ्चालन गर्न सकिएको छैन । यद्यपि बजारी क्षेत्रमा आजबाट २ सिफ्टमा खोलिएको छ’ उनले भने, 'भीड बिहानबाट बढ्दै गएको छ । सामाजिक दूरी कायम गरेर सकिने अवस्थासम्म सबै ग्राहकको काम गरिन्छ । तर, अत्याधिक बढेको खण्डमा भने ग्राहकका प्राथामिकताका आधारमा अन्य समयमा आउनु भनेर फकार्उने निणर्य गरेका छौँ ।'

सीईओ शेरचनले धितो बन्धक र अन्य व्यवसायी प्रयोजनका ग्राहकको मात्रै काम हुने र सानातिनो कारोबार गर्न आउने ग्राहकलाई अनलाइनबाट गर्नका लागि अनलाईन बैंकिङ प्रयोगबारे काउन्सेलिङ गरेर पठाइने बताए । उनले भने, ‘अब कोरोना कहिले जान्छ भन्ने ठेगान छैन, त्यसैले आवश्यक सावधानी अपनाउँदै काम गर्ने बानी बसाल्नु पर्‍यो ।’

मास्क, पञ्जाविना आउने ग्राहकलाई बैंक पस्न दिँदैनौँ – कृषि विकास बैंक

यता कृषि विकास बैंकमा भने उपत्यकामा भन्दा बढी बाहिरका जिल्लाहरूमा चहलपहल बढेको छ । उपत्यकामा पनि वानेश्वर, कोटेश्वर, बालाजु, कलंकी जस्ता बजारी क्षेत्रमा ग्राहकको बाक्लै उपस्थिति रहेको बैंकका सीईओ अनिल उपाध्यायले बताए ।

आजै सरकारी कार्यालय पनि खुलेकाले धितो फुकाउने, बन्धकी राख्ने, बचत झिक्ने र रेमिट्यान्सका लागि आउने ग्राहक बढेको उनले बताए । उनका अनुसार बिहानबाट सञ्चालनमा आएपछि शुरुमा खासै भीडभाड नदेखिए पनि १० बजे पछाडि ग्राहक ह्वात्तै बढेका छन् ।

‘हामीले सकेसम्म सबै ग्राहकको काम गरिरहेका छौँ । कर्मचारीलाई पनि मास्क, समय-समयमा सेनिटाइजरको प्रयोग र पञ्जालाई अनिवार्य गरेका छौँ भने ग्राहकलाई पनि अनिवार्य लगाएर आउन भनेका छौँ’ उनले भने । मास्क पञ्जा नलगाई आउने ग्राहकलाई भने गेटबाट नै फर्काइने सीईओ उपाध्यायले बताए ।

यीबाहेक कोटेश्वर शाखा, वानेश्वर शाखा, गठ्ठाघर शाखा, बजालु, चाबहिललगायतका प्राइमबैंक, नेपाल बैंक, इन्भेष्ट बैंक, मेगा बैंक, मुक्तिनाथ विकास बैंकलगातका बैंकहरूमा पनि अहिले चहलपहल बाक्लिएको छ । चहलपहल बाक्लिएसँगै बैंकहरूले सुरक्षालाई कडा पार्नुको साथै मास्क पञ्जा ग्राहकलाई पनि अनिवार्य गरेका छन् ।

प्रकाशित मिति: सोमबार, असार १, २०७७ १३:४०