बजेटको आकार घटाउँदै बागमती सरकार

A+ A A-

बागमती प्रदेश सरकारले आगामी आर्थिक वर्ष २०७७/०७८ को बजेट सोमबार ल्याउँदै छ । भोलि १ असारमा प्रदेशको आर्थिक मामिला तथा योजना मन्त्री कैलाश ढुंगेलले आगामी आवको बजेट प्रस्तुत गर्ने छन् ।

आगामी आवको बजेट चालू आवको भन्दा घटेर आउने मन्त्रालयले जानकारी दिएको छ । कोरोनाका कारण अर्थतन्त्रमा पर्ने प्रभावको मूल्यांकन गर्दै बजेट तयार गरेको मन्त्री ढुङ्गेलले बताए ।

बागमती प्रदेशले आगामी आवमा ४४ अर्ब हाराहारीको बजेट ल्याउने तयारी गरेको छ । सरकारले चालू आवमा ४७ अर्ब ६० करोड ७८ लाख रुपैयाँ बजेट ल्याएको थियो ।

कोरोना भाइरसको महामारीले पारेको असरको कारण गतवर्षको भन्दा आकार घटाएर बजेट प्रस्तुत हुने मन्त्रालयले जनाएको छ ।

बजेटको तयारीमा जुटेको प्रदेश सरकारले यसअघि बजेटको आकार बढाएर ५० अर्बको ल्याउने तयारी गरेको थियो । तर, कोरोनाका कारण अर्थतन्त्रमा पर्ने प्रभावको मूल्यांकन गर्दै बजेटको आकार घटाएर ल्याउन लागिएको मन्त्रालय स्रोतले जानकारी दिएको छ ।

लकडाउनका कारण भौतिक पूर्वाधार तथा अन्य क्षेत्रमा अपेक्षकृत रुपमा काम हुन सकेको छैन् । चालू वर्ष बढीमा ५० प्रतिशतसम्म खर्च हुने अनुमान प्रदेश सरकारको छ । चालू आवको बजेट खर्चको अवस्था निराशाजनक छ ।

मन्त्री ढुंगेलले स्वास्थ्य, शिक्षा, रोजगारी, कृषि र भौतिक पूर्वाधार निर्माणलाई प्राथमिकता दिएर आगामी वर्षको बजेट तयार पारिएको जानकारी दिए ।

बजेटमा प्रदेशका ६६ वटै निर्वाचन क्षेत्र र एकसय १९ वटै स्थानीय तहलाई लाभ हुने प्रकृतिको विशेष कार्यक्रम समावेश गरिएको मन्त्री ढुंगेलको दावी छ ।

बजेटले कृषि र वनमा आधारित उत्पादनका क्षेत्रहरु, घरेलु कच्चा पदार्थमा आधारित उद्योगहरु, बाख्रा व्यवसाय, दूध व्यवसाय, माछापालन जस्ता रोजगारी सिर्जना गर्ने र उत्पादनमा वृद्धि हुने क्षेत्रहरूमा ध्यान दिएको मन्त्रालयले जनाएको छ ।

प्रकाशित मिति: आइतबार, जेठ ३२, २०७७ २१:०२