संकटमा प्रदेश २ सरकार, सांसद फकाउँदै मुख्यमन्त्री

A+ A A-

लालबाबु राउत नेतृत्वको प्रदेश २ सरकार संकटमा परेको छ । प्रदेश २ मा सरकार ढल्ने चर्चा छ । तत्कालीन समाजवादी पार्टी र राष्ट्रिय जनता पार्टीकै केही सांसद सरकार ढल्ने अवस्थामा रहेकाे बताउँछन् ।

प्रदेश २ को नीति तथा कार्यक्रम पारित हुने आज अन्तिम दिन हो । पारित भएन भने सरकार ढल्ने संविधानका जानकारहरू बताउँछन् ।

सोही बैठकमा राउत नेतृत्वको सरकार रहने वा नरहने भन्ने टुंगो लाग्नेछ । प्रदेश सरकारले संसदबाट नीति तथा कार्यक्रम पारित गराउने तयारी हिजाेदेखि नै गरेकाे थियाे ।

तर, सांसद संख्या नपुगेपछि उक्त एजेन्डा नै ल्याइएन । मुख्यमन्त्री लालबाबु राउतको कामकाजप्रति सांसदहरू असन्तुष्ट छन् ।

मुख्यमन्त्री र कतिपय मन्त्रीहरूबीच पनि राम्रो सम्बन्ध नरहेको बताइन्छ । समाजवादी पार्टी र राष्ट्रिय जनता पार्टीको एकीकरण गरी जनता समाजवादी पार्टी बनेपछि केन्द्रीय नेता अनिलकुमार झा र राजकिशोर यादव निकै असन्तुष्ट देखिएका छन् । उनीहरूका समर्थक सदनमा अनुपस्थित रहने बताइएको छ । ३ जना सांसद अनुपस्थित भए सरकार ढल्ने दाबी असन्तुष्ट पक्षको छ ।

प्रदेशसभामा समाजवादी ३०, नेकपा ३२, राजपा २५, संघीय समाजवादी पार्टी १ र नेपाली कांग्रेसका १९ गरी कुल १ सय ७ सांसद छन् ।

सरकार बचाउन ५४ जनाको आवश्यक्ता पर्छ । समाजवादी पार्टीको ३०, राजपाको २५ र संघीय समाजवादी पार्टीको १ गरी ५६ जनाकाे समर्थनमा सरकार बनेकाे हाे ।

३ जना सांसद मात्रै अनुपस्थित भएमा सरकार संकटमा पर्नेछ । नेपाली कांग्रेस र नेकपा अहिले सरकारको विरोधमा छन् । दुवै दल सरकारको विपक्षमा जाने भएकाले सरकार बचाउन निकै समस्या देखिन्छ ।

नेपाली कांग्रेसका संसदीय दलका नेता रामसरोज यादव मुख्यमन्त्री राउतसँग नजिक रहेको र बजेट मिलेर चलाइरहेको आरोप लाग्दै आएको छ तर कांग्रेसका विपक्षी दलका नेता यादवले अब राउत सरकारलाई कुनै सहयोग नगर्ने शिलापत्रलाई बताए ।

'यो सरकार ट्रयाकमा आउन सक्दैन । जनताविरोधी भएकाले हामी ढाल्न नै प्रयास गर्छाैँ', उनले भने ।

यता, मुख्यमन्त्री राउतले असन्तुष्ट सांसदहरूसँग कुराकानी गरिरहेका छन् ।

प्रकाशित मिति: आइतबार, जेठ ३२, २०७७ १३:२३