पीसीआर मेसिन खरिद गर्ने होडबाजीमा सुदूरपश्चिमका स्थानीय तह

फाइल तस्वीर

A+ A A-

सुदूरपश्चिमका स्थानीय तह कोरोना परीक्षण गर्ने पीसीआर मेसिन खरिदका लागि अग्रसर देखिएका छन् । कोरोना संक्रमितको संख्या बढेसँगै यहाँका अधिकांश स्थानीय तह पीसीआर मेसिन खरिद गर्न अग्रसर देखिएका हुन् ।

सुदूरपश्चिमा भारतबाट आएर क्वारेन्टाइनमा बसेका धेरै नागरिकमा कोरोनाको संक्रमण देखिएको छ । कोरोना संक्रमित भेटिएपछि संक्रमितको सम्पर्कमा आएका व्यक्तिहरूको अनिवार्य स्वाब संकलन गर्नुपर्ने हुन्छ । तर, सुदूरपश्चिममा स्वाब संकलन गरेर धनगढी पठाए पनि रिपोर्ट आउन भने हप्तौं लाग्ने गरेको छ ।

हाल धनगढी प्रयोगशालामा रहेको पीसीआर मेसिनमार्फत् दैनिक २ सयदेखि २ सय २० जनाको मात्रै परीक्षण हुने गरेकोमा रिपोर्ट आउँन हप्तौं लाग्ने गरेको छ । सुदूरपश्चिमको प्रादेशिक प्रयोगशाला धनगढीमा १ मात्रै पीसीआर मेसिनको भर पर्दा रिपोर्ट आउन हप्तौं कुर्नुपर्दा संक्रमण फैलिने खतरा बढेको छ ।

विश्वव्यापीरूपमा फैलिरहेको कोरोनाका संक्रमित सुदूरपश्चिममा दिनहुँ बढिरहेको समयमा धनगढीमा रहेको प्रयोगशालामा भने परीक्षण सुस्त भएपछि यहाँका नागरिकले परीक्षणको दायरा फराकिलो हुनुपर्ने माग गरिरहेका छन् ।

सुदूरपश्चिमको ७ पहाडी जिल्लाको केन्द्रमा रहेको डडेल्धुराको अमरगढी नगरपालिका पनि पीसीआर मेसिन खरिदका लागि अग्रसर देखिएको छ । डडेल्धुरामा मेसिन खरिदका लागि अहिले सहयोग संकलन पनि जुटिरहेको छ ।

पीसीआर मेसिनका लागि अमरगढी नगरपालिकाले २० लाख रुपैयाँ दिने घोषणा गरिसकेको नगरप्रमुख विशेश्वरप्रसाद ओझाले बताए । अमरगढीले अग्रसरता देखाएपछि डडेल्धुराका अन्य स्थानीय तहले पनि पीसीआर मेसिनका लागि आफ्नो भागमा पर्ने रकम दिने बताएका छन् ।

उता जिल्ला विपद् व्यवस्थापन समिति बझाङको बैठकले कोराना भाइरसको भरपर्दो चेकचाँच विधि पीसीआर मेसिन खरिद गर्ने निर्णय गरिसकेको छ । जिल्ला समन्वय समितिका प्रमुख खडकबहादुर खड्काको अध्यक्षतामा बसेको बैठकले कोरोना संक्रमणपछि जिल्लामा भएका १ सय ९० वटा क्वारेन्टाइन र क्वारेन्टाइनमा बसेकाहरूको अवस्थाका विषयमा समीक्षा गर्दै पीसीआर मेसिन खरिद गर्ने निर्णय गरेको हो ।

बझाङका क्वारेन्टाइन भारतबाट फर्किएकाले भरिन थालेपछि पीसीआर मेसिन खरिद गर्ने तयारी भएको छविस पाथेभरा गाउँपालिकाका अध्यक्ष अक्कल धामीले बताए । सुदूरपश्चिममा १ मात्र मेसिन हुँदा रिपोर्ट ढीला आउने समस्याले ग्रामीण क्षेत्रमा कोरोनाको जोखिम बढेकोले सो निणर्य गरेको उनको भनाइ छ ।

अध्यक्ष धामीका अनुसार मेसिन खरिदका लागि नगरपालिकाले १५ लाख र गाँउपालिकाले १० तथा जिल्ला समन्वय समितिले १५ लाख दिने निर्णय गरिएको छ । यस्तै कोरोना सङ्क्रमणको जोखिम बढेको र परीक्षण सुस्त भएको भन्दै दार्चुलाका स्थानीय तहले पीसीआर मेसिन खरिद गर्ने निर्णय गरेका छन् ।

गत बिहिबार जिल्ला सङ्कट व्यवस्थापन केन्द्र (सिसीएमसी) को बैठकले पीसीआर मेसिन खरिद गर्ने प्रक्रिया अघि बढाउने निर्णय गरेको जिल्ला प्रशासनले जनाएको छ ।

जिल्ला समन्वय समिति र ९ वटै स्थानीय तहका प्रमुखहरूको उपस्थितिमा बसेको सिसीएमसी बैठकमा जिल्लामा जति सक्दो छिटो कोरोना परीक्षण प्रयोगशाला स्थापना गर्ने गरी काम अघि बढाउने सहमति भएको छ ।

धनगढीमा रहेको १ मात्र प्रयोगशालाको भर पर्दा पीसीआर रिपोर्ट आउन हप्तौं समय लाग्ने देखिएपछि मेसिन खरिद गर्ने निर्णय गरिएको अपिहिमाल गाउँपालिका अध्यक्ष धर्मानन्द मन्यालले जानकारी दिए ।

मेसिन खरिदका लागि दार्चुलाका ९ वटै स्थानीय तहले समान रकम ब्यहोर्ने सहमति भएको छ । पीसीआर मेसिन खरिदको लागि प्रयोगशाला स्थापनाको अध्ययन गर्न जिल्ला समन्वय समिति प्रमुख करबिरबहादुर कार्कीको संयोजकत्वमा ६ सदस्यीय समिति गठन गरिएको छ ।

यता, बैतडीका स्थानीय तहरूले पनि जिल्लामै प्रयोगशाला स्थापनाका लागि प्रदेश सरकारसँग आग्रह गरेका छन् ।

जिल्ला विपद् व्यवस्थापन समितिको शुक्रबार बसेको बैठकले कोरोना परीक्षणको दायरा बढाउनका लागि प्रयोगशाला स्थापना अनिवार्य भएकाले प्रदेश सरकारले यसअघि गरेको निर्णय कार्यान्वयन गर्न अनुरोध गरिएको प्रमुख जिल्ला अधिकारी मोहनराज जोशीले जानकारी दिए ।

प्रयोगशाला स्थापनाका लागि आवश्यक समन्वय गर्न जिल्ला समन्वय समितिका प्रमुख सिद्धराज भट्टको संयोजकत्वमा ११ सदस्यीय समिति समेत गठन गरिएको छ । समितिले प्रयोगशाला स्थापनाका लागि प्रदेश सरकारसँग आवश्यक समन्वय र सहकार्य गर्ने प्रमुख जिल्ला अधिकारी जोशीले जानकारी दिए ।

समिति स्वास्थ्य कार्यालय, जिल्ला प्रशासन कार्यालय, स्थानीय तह, राजनीतिक दलका पदाधिकारीहरू समेत सदस्यका रूपमा रहेका छन् । सुदूरपश्चिम प्रदेश सरकारले बैतडीमा प्रयोगशाला स्थापना गर्ने भनेर गएको वैशाखमा सम्भाव्यता अध्ययन भइसकेको भएपनि अहिलेसम्म काम अघि बढ्न सकेको छैन् ।

कञ्चनपुरको भीमदत्त नगरपालिकाले पनि पीसीआर मेसिन खरिदका लागि पहल गरेको छ । मङ्गलबार भीमदत्त नगरपालिका कोभिड-१९ रोकथाम तथा नियन्त्रण सम्बन्ध निर्देशक एव समन्वय समितिको बैठकले मेसिन अतिआवश्यक रहेको भन्दै खरिद गर्ने निर्णय गरेको थियो ।

भीमदत्त नगरपालिकाका नगरप्रमुख सुरेन्द्र विष्टले सङ्क्रमणको उच्च जोखिमसँग संकटसँग लड्न पीसीआर मेशिन आवश्यकता रहेको भन्दै खरिद प्रक्रिया अघि बढाइएको बताए ।

प्रदेश सरकार भन्छ, ‘हात्ती किन्न सजिलो छ पाल्न गाह्रो’

सुदूरपश्चिम प्रदेशका सामाजिक विकास मन्त्रालयका स्वास्थ्य महाशाखा प्रमुख नरेन्द्रसिंह कार्कीले सुदूरपश्चिमका स्थानीय सरकारले गरेको कार्य सराहनीय भएपनि प्रदेश सरकारसँग सहकार्य गरेर अगाडि बढ्नु पर्ने बताएका छन् ।

प्रदेश सरकारले थप ३ वटा पीसीआर मेसिन ल्याउँदै गरेको उनको भनाइ छ । स्थानीय सरकारले गरेको कार्य राम्रो छ । तर, पीसीआर मेसिन खरिद गर्नु मात्रै सबै कुरा होइन् । जनशक्ति व्यवस्थापनमा पनि जोड दिनु पर्ने उनको भनाइ छ ।

‘स्थानीय सरकारले नागरिकप्रति देखाएको कृतज्ञता सकारात्मक छ । पीसीआर मेसिन खरिद मात्रै सब थोक होइन ।’ उनले भने, ‘हात्ती किन्न सजिलो छ पाल्न गाह्रो’ त्यसैले यतातिर पनि ध्यान दिन जरुरी छ ।’

सुदूरपश्चिममा करिब १९ सय बढीको परीक्षण बाँकी

सुदूरपश्चिम प्रदेशमा झण्डै १९ सय जनाको परीक्षण हुन बाँकी रहेको छ । प्रदेश स्वास्थ्य निर्देशनालयल डोटीका अनुसार शनिबारसम्म संकलन भएका १ हजार ८ सय ८६ नमुनाको परीक्षण हुन बाँकी रहेको हो ।

प्रदेशमा एउटा मात्र प्रयोगशाला हुँदा ढिलाई भइरहेको हो । प्रदेश सरकारले धनगढी सहित डोटी र बैतडीमा सञ्चालनमा ल्याउने भनिएको प्रयोगशालाका लागि उपकरण खरिदको प्रक्रिया थालिएको जनाएको छ भने संघीय सरकारले सुदूरपश्चिमका लागि थप ३ वटा पीसीआर मेसिन पठाउने चर्चा चलेपनि अहिलेसम्म आएको छैन् ।

धनगढी प्रयोगशालाबाट अहिले दैनिक झण्डै २ सय ५० नमुना परीक्षण भइरहेको छ । तर, रिपोर्ट पोजिटिभ देखिए पुनः परीक्षण गर्नुपर्ने भएकाले त्यो अनुपातमा समेत परीक्षण गर्न नसकिने प्रयोगशालाले बताउँदै आएको छ ।

अहिले विभिन्न जिल्लाबाट संकलित नमुनालाई प्रदेश जनस्वास्थ्य प्रयोगशालामा राखिएको छ । सुदूरपश्चिममा हाल सम्म ८ हजार ६ सय ७८ जनाको कोरोना परीक्षण गरिएको छ । उनीमध्ये २ सय ५२ जनामा संक्रमण पुष्टि भएको छ भने ३ जना संक्रमित प्रदेश बाहिरका प्रयोगशालामा परीक्षण गर्दा भेटिएका थिए ।

सुदूरपश्चिमका २२ सय बढी क्वारेन्टानबाट घर फर्किए

सुदूरपश्चिममा भारत तथा कोरोना प्रभावित क्षेत्रबाट फर्किएर अनिवार्य क्वारेन्टानमा बसेका २ हजार २ सय बढीलाई घर फर्काइएको छ । प्रदेश स्वास्थ्य निर्देशनालय डोटीको तथ्यांक अनुसार प्रदेशका विभिन्न जिल्लामा क्वारेन्टानमा बसेका २ हजार २ सय ७८ जना घर फर्किएका हुन् ।

यसअघि शुक्रबारसम्म प्रदेशभरीका १ हजार ९ सय १८ क्वारेन्टानमा ६१ हजार ७ सय १० जना राखिएकोमा २ हजार २ सय ७८ जनालाई घर फर्काइएसँगै ५९ हजार ४ सय ३२ जना रहेका छन् । जसमा ४९ हजार ४ सय ८५ जना पुरुष र ९ हजार ९ सय ४७ महिला रहेका छन् ।

१४ दिने अनिवार्य क्वारेन्टाइन अवधि पुगेकाहरूको कोरोना रिपोर्ट नेगेटिभ आएपछि उनीहरूलाई घर फर्काइएको स्वास्थ्य निर्देशनालयले जनाएको छ ।

प्रकाशित मिति: आइतबार, जेठ ३२, २०७७ ११:०२