प्रदेश २ मा थपिए १०७ संक्रमित, १७ जना डिस्चार्ज

A+ A A-

प्रदेश २ मा पछिल्लो २४ घण्टामा ६ महिला र १ सय १ जना पुरुषगरी कुल १ सय ७ जना व्यक्तिहरुमा कोरोना संक्रमणको पुष्टि भएको छ । समाजिक विकास मन्त्रालयका अनुसार महोत्तरीका १, सर्लाहीका ११, रौतहटका ९० र पर्साका ५ जनामा संक्रमण पुष्टि भएको हो ।

सर्लाही जिल्लाको बसबरिया गाउँपालिकाका ३५ वर्षिय पुरुष, चकरघट्टा गाउँपालिकाका ११ वर्षीय बालकसहित २८ वर्षिय पुरुष, सर्लाही जिल्लाकै इश्वरपुर नगरपालिकाका २५ र ५२ वर्षीय पुरुष, सोही नगरपालिकाकी ५ वर्षीया बालिका, विष्णु गाउँपालिकका उमेर खुल्न नसकेका २ जना पुरुष र सर्लाही जिल्लाकै स्थान खुल्न नसकेका १९ र ४० वर्षीय पुरुषमा समेत कोरोना संक्रमणको पुष्टि राष्ट्रिय जनस्वास्थ्य प्रयोगशाला टेकु काठमाडौंले गरेको छ ।

रौतहटको ईशनाथ नगरपालिकास्थित श्री जनता माध्यमिक विद्यालयको क्वारेन्टाइनमा रहेका १२ र १५ वर्षका २ जना बालक, सोही क्वारेन्टाइनमा रहेका १९ देखि ४७ सम्मका २१ जना पुरुष, परोहा नगरपालिकास्थित लौकाहा माध्यमिक विद्यालयको क्वारेन्टाइनमा रहेका ९ र १५ वर्षीया वालिका, १ देखि १८ वर्षसम्मका ९ जना पुरुष, १९ देखि ५० वर्षसम्मका ३९ जना पुरुष, गोनाइ नगरपालिकाका १६, २०, २५, २९ र ४० वर्षका पुरुष, राजपुर नगरपालिकाका १ देखि १८ बर्ष उमेर समूहका ५ जना पुरुष र १९ देखि ५५ वर्षसम्मका ७ जना पुरुषमा कोरोना संक्रमण पुष्टि भएको छ ।

पर्सा जिल्लास्थित वीरगञ्ज उपमहानगरपालिका ५ का १९ वर्षीय पुरुष र ३४ वर्षीय महिला, सखुवा पर्सौनी डेढ, ३ वर्षीयका बालक र ३० वर्षीय महिलामा कोरोना संक्रमण पुष्टि भएको छ । त्यस्तै महोत्तरी जिल्लाका २३ वर्षीय पुरुषमा समेत संक्रमणको पुष्टि भएको छ ।

यस प्रदेशमा शनिबारसम्म ३१ हजार ३ सय १ जना व्यक्तिको थ्रोट स्वाब परिक्षण गरिएकोमा १ हजार ९ सय १३ जना संक्रमित भएका छन् भने १४ हजार ८ सय ३० जनाको नेगेटिभ नतिजा आएको छ । त्यस्तै १४ हजार ५ सय ५८ जनाको नतिजा आउन बाँकी रहेको छ ।

आरडीटी तर्फ अहिलेसम्म १४ हजार ८ सय २५ जनाको परीक्षण गरिएकोमा ७ सय १ जनाको रिपोर्ट पोजेटिभ आएको छ भने १४ हजार १ सय २४ जनाको रिपोर्ट नेगेटिभ आएको स्वास्थ्य निर्देशनालयका वरिष्ठ जनस्वास्थ्य प्रशासक विजय कुमार झाले बताए । यस प्रदेशमा शनिबार मात्र ३ सय ७९ जनाको स्वाब संकलन र ३ सय १४ जनाको आरडीटी परिक्षण गरिएको छ ।

प्रदेशमा संक्रमित १ हजार ९ सय १३ मध्ये सबैभन्दा बढी रौतहटका ६ सय ७० जना रहेका छन् । त्यस्तै, ४ सय ८२ जना सर्लाहीका,१ सय ८८ जना महोत्तरीका,१ सय ५९ जना धनुषाका,१ सय २७ जना पर्साका, १ सय २९ जना सप्तरीका,८५ जना बाराका र ७३ जना सिरहाका व्यक्ति छन् ।

प्रदेश २ को आठवटै जिल्लाका विभिन्न ठाउँहरुमा निर्माण गरिएको ३२ हजार ३ सय ७ बेड क्षमताको ४ सय २८ वटा क्वारेन्टाइनमा अहिले १७ हजार ९ सय ८१ जनालाई राखिएको छ भने ९ हजार ८४ जनालाई होम क्वारेन्टाइनमा पठाइएको छ ।

प्रदेशका आठवटै जिल्लाको विभिन्न ठाउँहरुमा सञ्चालनमा रहेको १ हजार ४ सय ११ बेड क्षमताको आइसोलेशनमा ८ सय ३४ जना बिरामीलाई भर्ना गरिएको वरिष्ठ जनस्वास्थ्य प्रशासक झाले जानकारी दिए ।

१७ जना डिस्चार्ज

पछिल्लो चौबिस घण्टामा प्रदेश २ मा १७ जना पुरुष कोरोना संक्रमितहरु उपचारपश्चात डिस्चार्ज भएका छन् । जसअनुसार बाराको कलैया अस्पतालअन्तर्गत रहेको कोभिड-१९ विशेष अस्पतालमा उपचार गराइरहेका बारा जिल्ला कोहल्भी नगरपालिकाका १२ वर्षीय बालक उपचारपश्चात डिस्चार्ज भएका हुन् । महागढीमाई नगरपालिका २८ र ३२ वर्षीय, विश्रामपुर गाउँपालिकाका ३० वर्षीय २ जना पुरुष डिस्चार्ज भएका छन् ।

यसैगरी गण्डक अस्पताल वीरगञ्जको आइसोलेसन कक्षबाट ५ जना, धनुषा जिल्लास्थित प्रादेशिक अस्पताल जनकपुरअन्तर्गत लक्ष्मीनिया गाउँपालिकामा रहेको वि.पि. मेमोरियल पोलिटेक्निकल ईन्स्टिच्यूटको आइसोलेसन कक्षबाट ३ जना र महोत्तरी जिल्लास्थित जलेश्वर अस्पतालअन्तर्गतको कोभिड विशेष अस्पतालबाट ४ जना संक्रमितहरु उपचार पश्चात स्वस्थ्य भई डिस्चार्ज भएका छन् । पछिल्लो चौविस घण्टामा डिस्चार्ज भएका १७ जना सहित यस प्रदेशका ४ सय ३७ जना कोरोना संक्रमितहरू उपचार पश्चात डिस्चार्ज भइसकेका छन् ।

प्रकाशित मिति: शनिबार, जेठ ३१, २०७७ १८:४९