चोरीको रकम फेरि प्रहरीले नै चोरेको आशंका, प्रदेश प्रमुखले थाले अनुसन्धान

कैलाली जिल्ला प्रहरी प्रमुख एसपी आभूषण तिमिल्सिना

A+ A A-

भारतको राजस्थानबाट पैसा चोरेर भागेका बैतडी दशरथचन्द नगरपालिका–४ का निरजबहादुर चन्दलाई कैलाली प्रहरीले पक्राउ गरेर पनि आवश्यक अनुसन्धान नगरी पैसा लिएर छाडेको विषयलाई लिएर सुदूरपश्चिम प्रदेश प्रहरी कार्यालयले छानबिन गर्ने भएको छ ।

‘कैलाली प्रहरीले चन्दलाई पक्राउ गरेर पनि आवश्यक अनुसन्धानबिनै पूरा पैसा फिर्ता नदिई छोडेको विषय हामीलाई पनि आएको छ । त्यस विषयमा अनुसन्धान गर्ने तयारीमा छौं,’ सुदूरपश्चिम प्रदेश प्रमुख प्रहरी नायब महानिरीक्षक (डीआईजी) सुरज केसीले भने ।

‘यस विषयमा आवश्यक परे छानबिन समिति नै बनाएर अनुसन्धान हुन्छ,’ केसीले थपे । कैलाली प्रहरी प्रमुख प्रहरी उपरीक्षक (एसपी) आभूषण तिमिल्सिना भने यस विषयमा प्रेस रिलिज गरेको भन्दै बोल्न नहुने बताए ।

चन्दलाई कैलाली प्रहरीले ५ चैतमा अत्तरियाबाट चोरी गरेर ल्याएको पैसासहित पक्राउ गरेको थियो । कैलाली प्रहरीले उनलाई पक्राउ गर्ने बेला उनीसँग २३ लाख ३८ हजार नेपाली रुपैयाँ रहेको चन्दले शिलापत्रलाई बताए ।

‘अत्तरियाबाट मलाई चैत ५ मा पक्राउ गर्ने बेला २३ लाख ३८ हजार थियो । पाँच दिन कैलाली जिल्ला प्रहरी कार्याज्ञलयमा राखेर कैलाली प्रहरीले नचिनेको मान्छेको रहोबरमा छाड्यो तर त्यही नचिनेको मान्छेले १३ लाख लियो । मलाई ९ लाख ३८ हजार मात्र दिए,’ चन्दले भने । प्रहरीले कुनै व्यक्तिलाई पक्राउ गरेपछि थुनामुक्त गर्दा आफन्तको जिम्मा लगाउँछ ।

भारतीय दूतावासको चासो

भारतको राजस्थानबाट पैसा चोरेर ल्याएको नेपालीबारे नेपालस्थित भारतीय दूतावासले चासो देखाएपछि कैलाली प्रहरीले १० चैतमा छाडेको चन्दालाई फेरि बैतडी प्रहरीले १७ चैतमा बैतडी (उनकै घर) बाट पक्राउ गरेको थियो । प्रहरी स्रोतका अनुसार दूतावासका केही कर्मचारी चन्दको घर बैतडी नै पुगेको थियो ।

बैतडी प्रहरीले पक्राउ गर्ने बेला उनको घरबाट १ लाख ५० हजार मात्र बरामद गरेको बैतडी प्रहरीले जनाएको छ । उनले बैतडी प्रहरीमा समेत कैलाली प्रहरीले पक्राउ गरेपछि १३ लाख त्यही लिएको बयान दिएका थिए । १३ लाखबाहेक उनले बाँकी पैसा खर्च गरेको र त्यसमध्ये केही रकम फिर्ता गरेको बताए ।

प्रकाशित मिति: शुक्रबार, चैत २२, २०७५ ०३:४०