सुदूरका क्वारेनटाइनबाट परीक्षणविनै घर पठाइँदै, समुदायमा सङ्क्रमण फैलिने खतरा

सुदूरका क्वारेनटाइनबाट परीक्षणविनै घर पठाइँदै, समुदायमा सङ्क्रमण फैलिने खतरा

A+ A A-

सुदूरपश्चिम प्रदेशमा भारतबाट फर्केका नागरिकलाई कोरोना भाइरस संक्रमण भए/नभएको परीक्षणविनै घर पठाउन थालिएको छ । प्रदेशमा किट अभाव रहेकोले क्वारेनटाइनबाट परीक्षणविनै पठाइने सुदूरपश्चिम प्रदेश स्वास्थ्य निर्देशनालयले जनाएको छ ।

निर्देशनालयले एक सूचना जारी गर्दै प्रदेशमा एक मात्र प्रयोगशाला रहेको र उक्त प्रयोगशालामा दैनिक २ सय ५० जनाको मात्रै पीसीआर परीक्षण सम्भव भएकाले सीधै घर पठाउन लागिएको जनाएको छ । तिनको परीक्षण गर्न आरडीटी किटसमेत अभाव भएको स्वास्थ्य निर्देशक डाक्टर गुणराज अवस्थीले बताए ।

१४ दिन क्वारेनटाइनमा बसेकामा कुनै लक्षण नदेखिए मापदण्डअनुसार होम क्वारेनटाइनमा पठाउन सूचनामा भनिएको छ । आरडीटी पोजेटिभ आएका क्वारेनटाइनमा रहेकामा कुनै पनि लक्षण नदेखिए रिपोर्ट नआउँदासम्म होम आइसोलेसनमा पठाउने र रिपोर्ट नेगेटिभ आए होम क्वारेनटाइनमा बस्न लगाउने स्वास्थ्य निर्देशक अवस्थीले बताए ।

कतै विरोध, कतै समर्थन

स्वास्थ्य निर्देशनालयको यो निर्णयको कुनै स्थानीय तहहरूले स्वागत गरेका छन् भने कुनै स्थानीय तहले भने विरोध जनाएका छन् । कैलालीको घोडाघोडी नगरपालिकाका मेयर ममताप्रसाद चौधरीले १४ दिनसम्म क्वारेनटाइनमा बस्दा कुनै लक्षण नदेखिएमा घर पठाउन सक्ने मापदण्डका आधारमा नागरिकलाई १४ दिन क्वारेनटाइनमा राखेर घर पठाइरहेको बताए ।

निर्देशनालयले गरेको निर्णय स्वागत योग्य रहेको उनले बताए । १४ दिनसम्म पनि क्वारेनटाइनमा रहँदा कुनै लक्षण नदेखिएपछि घर पठाउँदा त्यसले जोखिम ननिम्ताउने उनको भनाइ छ ।

तर, यता धनगढी उपमहानगरपालिकाका मेयर नृप वडले भने १४ दिन क्वारेनटाइनमा राखेर परीक्षणविनै घर पठाउनु गलत भएको बताए । स्वास्थ्य निर्देशनालयले यस्तो निर्णय गरे पनि धनगढी उपमहानगरपालिकाको हकमा भने परीक्षणपछि मात्रै क्वारेनटाइनबाट नागरिकलाई घर पठाइने बताए ।

समुदायमा सङ्क्रमण फैलिने खतरा

कोरोना परीक्षणविना नै नागरिकलाई क्वारेनटाइनबाट घर पठाइन थालेपछि यसले समुदायमा कोरोनाको सङ्क्रमण फैलिने खतरा बढेको छ । एकातिर सङ्क्रमितलाई पूर्णरूपमा निको नहुँदै अस्पतालले डिस्चार्ज गरिरहेका छन् भने क्वारेनटाइनबाट पनि परीक्षणविना नै नागरिकलाई धमाधम घर पठाइन लागेपछि समुदायमा निकै जोखिम बढेको घोडाघोडी नगरपालिका १ का सुरज विष्टले बताए । उनले भने, 'अहिले सुदूरपश्चिम प्रदेशमा लापरबाही देखिएको छ यसले केही दिनभित्र ठूलो जोखिम निम्ताउने निश्चित छ ।’

प्रदेशमा सङ्क्रमण फैलिँदै गएको अवस्थामा यस्तो गर्न नहुने भन्दै उनले भविष्यमा निम्तिने जोखिमको व्यवस्थापनका लागि अहिलेबाटै तयारी भइरहनुपर्ने उनको भनाइ छ ।

होम आइसोलेसन र होम क्वारेनटाइनमा बसेका व्यक्तिमा कोरोना लक्षण देखापरे स्थानीय तहमा निर्माण गरिएका आइसोलेसनमा राखिने र स्थानीय स्तरमा उपलब्ध स्वास्थ्यकर्मीले उपचार गर्ने र थप उपचार गर्नुपरे जिल्ला तथा माथिल्लो अस्पतालमा पठाउने सूचनामा उल्लेख छ । भारतबाट फर्केर प्रदेशमा ९ वटै जिल्लामा गरी हाल ६६ हजार व्यक्ति क्वारेनटाइनमा छन् ।

प्रकाशित मिति: शनिबार, जेठ ३१, २०७७ १३:२८