लकडाउनले घरघरमै सैलुन

A+ A A-

डा. विनिता शिवाली ठाकुरले शुक्रबार श्रीमान् डा. सज्जनको कपाल काटेकी छिन् । लकडाउनले बजारमा सैलुन बन्द भएपछि उनले घरमै श्रीमानको कपाल काटिदिएकी हुन् ।

पेसाले ठाकुर दम्पत्ति चिकित्सक हुन् । ‘सुरूमा श्रीमतीले कपाल काटिदिन्छु भनेर सल्लाह दिँदा कस्तो काट्छिन् लाग्थ्यो’, उनले भने, ‘तर उनले राम्रै कपाल काटिन् ।’

लकडाउनका कारण देशभरीका सैलुन बन्द छन् । सैलुन बन्द भएपछि अधिकांशले घरमै कपाल काटिरहेका छन् । घरमा कपाल काट्दा पैसाको बचत र कोरोनाबाट जोगिन सजिलो भएको छ ।

सञ्चारकर्मी स्नेहा झाले पनि आफ्ना श्रीमान् पूर्णेन्दू झाको कपाल काटेको फोटो सामाजिक सञ्जालमा राखेपछि धेरै व्यक्तिले राम्रो प्रतिक्रिया दिएका छन् । पूर्णेन्दूले मूड र लुक दुबैै परिवर्तन गर्न घरमै कपाल कटाएको बताए । स्नेहाको फोटोमाथि सञ्चारकर्मी शैलेन्द्र महतोले लेखेका छन्, ‘जब घरमै नाई छन् भने सैलुनको के काम ? यो शिक्षा सबैको श्रीमतीले लिनुपर्छ ।’

सामाजिक सञ्जालमा महिलाले श्रीमान् र छोराछोरीको कपाल काटेको तस्वीर धेरै देखिए पनि श्रीमानले श्रीमतीको कपाल मिलाइदिएको देखिएको छैन । ‘के गर्ने पुरुषको कपाल नमिले पनि हुन्छ तर महिलाको नमिल्यो भने ब्युटीपार्लर लग्नै पर्छ यो बाध्यताले पुरुषले यो जोखिम मोल्द्यन नचाएका होलान्,’ एक गैरसरकारी संस्थामा काम गर्ने सञ्जय शाहले भन्छन् ।

लकडाउनले एकातिर घरमै सैलुनको प्रयोग भइरहेको छ भने अर्कोतर्फ नाइहरूको पेसा नै संकटमा परेको छ । दर्जनौं नाइहरू काम नपाएर घरमै बस्न बाध्य भएका छन् । जनकपुरधामका चर्चित सैलसुन व्यवसायी रामअशिष ठाकुरले लकडाउनपछि एकदिन पनि सैलुन नखोलेको वताए । ‘बजारमा पसल खुल्न थालेका छन् । तर, सैलुनमा कोही आउन चाहँदैनन्’ उनले दुःखेसो पोखे ।

अहिले केही ग्राहकले मोबाइलबाट कुन कैंचीले कपाल काट्ने गरिन्छ ? कैंची कहाँ पाइन्छ ? जस्ता सल्लाह लिने गरेका अर्का नाई व्यवसायी मदन ठाकुरले बताए । ‘केही पहिलासम्म दाह्री, जुँगा पनि सैलुनमै गएर सबै बनाउथे तर धेरै जसोले सेफ्टीरेजर किनेर घरमै बनाउन थालेका छन्’, राजनीतिकर्मी राजीव झा भन्छन्, ‘अहिलेको समयमा नाई कहाँ गएरभन्दा दाह्रीजुँगा घरमै बनाउँदासजिलो र राम्रो लाग्ने गरेको छ ।’

जनकपुरधाममा महंगोमहंगो सैलुन सञ्चालनमा छन् । ग्राहकलाई आकर्षित गर्न सैलुनमा एसी लगाउनुका साथै वेल डेकुरेटसम्म गरिएको छ । महंगो भाडा तिरेर चोकमा सैलुन खोलिएका छन् । तर, लम्बिदै गरेको लकडाउनले व्यवसाय नै ध्वस्त भएको सैलुन व्यवसायी बताउँछन् ।

तर, राम युवा कमिटी जनकपुरधामका पूर्व उपाध्यक्ष परमेश्वर साह भने व्यवसायीले अहिले नै चिन्तित हुनुपर्ने अवस्था नआएको बताउँछन् । ‘विकल्प नभएर मात्रै घरमा सबैले कपाल काटिरहेका छन्’, उनले भने, ‘लकडाउन खुलेपछि सबै मानिस फेरि सैलुनमै जान थाल्छन् ।’

कोरोना महामारी छिट्टै अन्त्य नहुने भएकाले स्वास्थ्यका दृष्टिले पनि व्यक्तिगत सरसफाइका कार्य आफै सिक्नेतिर सोच्नुपर्ने बेला आइसकेको जनकपुरधामका वरिष्ठ बाल रोग विशेषज्ञ डा. बलराम मिश्राले बताए ।

घरमै पुगेर कपाल काट्दै

दोलखाको सदरमुकाम चरिकोटमा सैलुन खोलेका गौरीशंकर ठाकुर अहिले ग्राहकको घरमै गएर कपाल काट्न थालेका छन् ।

कोरोना भाइरसको संक्रमणको सम्भावित जोखिमलाई मध्यनजर गर्दै सैलुनमा कोही कपाल कटाउन नआएपछि ठाकुरले दैनिक टोल/टोलमा पुगेर कपाल काट्न थालेका हुन् ।

सर्लाही लालबन्दी घर भएका ठाकुरले लकडाउन सुरू भएको ४ दिनबाटै यस्तो कामको सुरूवात गरेका हुन । सुरूमा घर जान नपाएर चिन्तित भएका ठाकुर घर गएपछि क्वारेन्टाइनमा राखिदिने डरले सदरमुकाम चरिकोटमा नै बसेर जिविकोपार्जन गरिरहेका छन् । लकडाउनपछि ४० जनाको दाह्री, कपाल काटेर ठाकुरले ६ हजार रूपैयाँ कमाएका छन् ।

ठाकुर मात्र होइनन् उनी जस्ता ५ जना युवाहरू चरिकोटमा दैनिक प्रत्येक घरमा पुगेर आफूले चिनेको मान्छेको कपाल, दाह्री काट्न थालेका छन् । कपाल काट्दै हिँड्ने ५ मध्ये २ जना भारत विहारका र ३ जना सर्लाहीका रहेका हुन् । गाउँघरमा जाँदा विदेशबाट आएको मानिस पनि हुनसक्ने भएकाले चरिकोट आसपास नै चिने जानेको मान्छेको मात्र कपाल, दाह्री काटिरहेको अर्का व्यवसायी हरिशंकर ठाकुरले बताए ।

दोलखामा शैलुन व्यवसाय गर्दै आएका १५ जना भने आआफ्नो गृहजिल्ला फर्किसकेको छन् । पसल बन्द भएर दाह्री, कपाल काट्न नपाएका स्थानीयीले पनि घरघरमा आएर सेवा दिएपछि सहजता महसुस गरेका छन् ।

प्रकाशित मिति: शुक्रबार, जेठ ३०, २०७७ १०:२७