सरकारविरुद्व प्रदेश २ का विभिन्न जिल्लामा प्रदर्शन (तस्वीरसहित)

A+ A A-

कोरोना महामारीका बीच पनि सरकार भ्रष्टाचारमा लिप्त रहेको भन्दै प्रदेश २ का विभिन्न स्थानमा सरकारविरुद्व युवाहरूले प्रदर्शन गरेका छन् ।

सरकारले लकडाउनकाबीच कर बुझाउन भनेको, स्वास्थ्य सामग्री खरिदमा कोरोना महामारीबीच भ्रष्टाचार तथा कमिसन उठाउन व्यस्त रहेको, नेताहरू अहिले पनि विलासी जीवनमै मस्त रहेको लगायत आरोप लगाउँदै यहाँका युवाले प्रदेशको विभिन्न स्थानमा सरकाविरुद्व प्रदर्शन गरेका हुन् ।

युवाहरूले सामाजिक दूरी कायम गर्दै प्ले कार्डमा नारा लेखेर सरकार विरुद्व प्रदर्शन गरेका छन् । जनकपुरधामको जनक चोकमा जम्मा भएका यूवा तीन वटै तहका सरकारविरूद्व प्रदर्शन गरेका छन् । युवाहरूले ‘जनतालाई छैन सरकारको आशा, सरकारलाई चाहियो जनताको लाश’, ‘कार्पेट हैन सोच बदलौँ’, ‘पैसा छैन गोजीमा सरकार करको खोजी’मा लगायतका नारा लेखिएको प्लेकार्ड बोकेका थिए ।

सरकारले लकडाउन लगाएको ८० दिनपछि पनि क्वारेन्टाइन तथा आइसोलेसन व्यवस्थापन, गरिब मजदुर वर्गका लागि राहतको व्यवस्थापन लगायतमा सरकार असफल रहे पनि भ्रष्टाचारमै सरकार लिप्त रहेकोले आफूहरू सरकारविरूद्व प्रदर्शनमा गर्न बाध्य भएको युवा सुशिल कर्णले बताए । ‘सरकारले अति गरिसक्यो अब यो सरकारको अन्त्य निश्चित छ’ अर्का युवा सरोज कुमार मिश्रले भने, ‘सरकारलाई सही बाटोमा ल्याउनका लागि जनकपुरधामका युवा तथा युवा व्यवसायी प्रदर्शनमा उतरेका हौँ ।’

यता नेपाली कांग्रेसका कार्यकर्ता महोत्तरीको जलेश्वरमा आधा घण्टा सरकारविरूद्व मौन धर्नामा बसेका छन् । देशमा रहेका तीनै तहका सरकारले कोरोनाबाट नागरिकलाई जोगाउनका लागि ठोस निती अवलम्बन नगरेको भन्दै बिहीबार बिहान उनीहरूले जलेश्वरमा धर्ना दिएका हुन् ।

भिटठामोड जनकपुर सडकखण्ड अन्र्तगत पर्ने जलेश्वरको शंकर चौकमा स्थानीय वजरंग नेपालीको नेतृत्वमा धर्नामा बसेकाले हातहातमा प्याले कार्ड बोकेका थिए । कोरोना महामारीको समयमा सरकारले व्यवस्थापनमा चुकेको भन्दै सरकारको विरोधमा युवा मौन धर्नामा बसेका थिए ।

बारामासमेत सरकारविरूद्व प्रदर्शन भएको छ । कम्तीमा १ घर १ पीसीआर टेस्टको माग गर्दै युवाले सरकारविरूद्व प्रदर्शन गरेका छन् । युवाले बाराको फेटा गाँउपालिका-१ मा भलुही चोकमा विभिन्न नारासहितको प्लेकार्ड लिएर प्रदर्शन गरेका छन् । त्यस्तै वीरगंजमा पनि सरकारविरुद्ध युवाले प्रदर्शन गरेका छन् ।