प्रदेश २ मा पछिल्लो २४ घण्टामा थपिए २९ जना कोरोना संक्रमित, ८२ जनाकाे डिस्चार्ज

प्रदेश २ मा पछिल्लो २४ घण्टामा थपिए २९ जना कोरोना संक्रमित, ८२ जनाकाे डिस्चार्ज

A+ A A-

पछिल्लो २४ घण्टामा प्रदेश २ मा २९ जना कोरोना संक्रमित थपिएका छन् । जसमध्ये महोत्तरीमा ४, बारामा ७ र रौतहट जिल्लामा १८ जनामा कोरोना संक्रमण पुष्टि भएको हो ।

सरकारले नियमित रूपमा सञ्चालन गर्दै आएको मिडिया ब्रिफिङमा स्वास्थ्य निर्देशनालय प्रदेश नम्बर २ का वरिष्ठ जनस्वास्थ्यविद् विजयकुमार झाले साे जानकारी दिएका हुन् ।

जनस्वास्थ्यविद् झाका अनुसार महोत्तरी जिल्लाको गौशाला नगरपालिका– २ का २१ वर्षीय पुरुषमा कोरोना संक्रमण पुष्टि भएको छ । त्यसैगरी महोत्तरी जिल्लाकै मनरवा सिसवा नगरपालिका– ८ का ५० वर्षीय पुरुष र सोही नगरपालिका– १० का २२ र ३० वर्षीय पुरुषमा कोरोना संक्रमण पुष्टि भएको छ ।

त्यसैगरी, बारा जिल्लाको सिमरौनगढ नगरपालिकाका १७ वर्षीय किशोरसहित १९ देखि ४० वर्ष उमेर समूहका ७ जना पुरुषहरूमा कोरोना संक्रमण पुष्टि भएको छ । रौतहट जिल्लाको परोहा नगरपालिकाका १ देखि १८ वर्ष उमेर समूहका ७ जना किशोरमा कोरोना संक्रमण पुष्टि भएको छ । सोही नगरपालिकाका ४५ वर्षीय पुरुषसहित १९ देखि ४० वर्ष उमेर समूहका ८ जना पुरुषमा समेत कोरोना संक्रमण पुष्टि भएको छ ।

रौतहट जिल्लाकै गढीमाई नगरपालिकाका ११ वर्षीय बालकसहित २० र २५ वर्षका पुरुषमा कोरोना संक्रमण पुष्टि भएको छ ।

काेराेना जित्ने ६५ जना

पछिल्लो २४ घण्टामा यस प्रदेशमा ४ महिला र ६१ पुरुष गरी जम्मा ६५ जना कोरोना भाइरस संक्रमितहरू उपचारपश्चात् डिस्चार्ज भएका छन् । उनीहरू रौतहट जिल्लाको गरुडा नगरपालिकामा रहेको नेपाल प्रहरी विद्यालयमा सञ्चालित आइसोलेसन कक्षबाट बुधबार डिस्चार्ज भएका हुन् ।

डिस्चार्ज हुनेहरूमा रौतहट जिल्लाको इशनाथ नगरपालिकाका ३ महिला र ३७ जना पुरुष छन् । त्यस्तै, रौतहट जिल्लाकै बौधिमाई नगरपालिकाका ३ जना, मौलापुर नगरपालिकाका ४ जना, कठहरिया नगरपालिकाका ३ जना, देवाही गोनाही नगरपालिकाका १० जना पुरुष डिस्चार्ज भएका छन् ।

त्यसैगरी रौतहट जिल्लाकै राजदेवी नगरपालिकाबाट १ महिला र २ पुरुषसमेत डिस्चार्ज भएका छन् ।

भर्खरै प्राप्त विवरणअनुसार रौतहट जिल्ला गौर नगरपालिकास्थित गौर नर्सिङ इन्टिच्युटको आइसोलेसन कक्षमा उपचार गराइरहेका ४ महिला र १३ पुरुष गरी कुल १७ जनाले काेराेनालाई जितेर डिस्चार्ज भएका छन् ।

यसरी पछिल्लो २४ घण्टामा डिस्चार्ज भएका ८२ जनासहित यस प्रदेशका ३ सय ८१ जना कोरोना संक्रमितहरू उपचारपश्चात् डिस्चार्ज भइसकेका छन् ।

त्यसैगरी पीसीआर परीक्षणमार्फत संक्रमण प्रमाणित भएका सप्तरी जिल्ला गजेन्द्र नारायण सिंह सगरमाथा अस्पतालअन्तर्गत रहेको राजविराजस्थित साईकृष्ण कोभिड– १९ अस्पतालको आइसोलेसन कक्षमा ७ महिला र ९४ जना पुरुष गरी कुल १ सय १ जना कोरोना संक्रमितको उपचार भइरहेको छ ।

सिरहा जिल्ला अस्पतालअन्तर्गत रहेको महेन्द्र गेनाई कोभिड विशेष अस्पतालको आइसोलसन कक्षमा १६ जना पुरुष र २ जना महिला गरी कुल १८ कोरोना संक्रमितहरूको उपचार भइरहेको छ । सिरहा जिल्लाकै सिरहा नगरपालिकास्थित सिरहा कोभिड विशेष अस्पतालको आइसोलेसन कक्षमा २६ जना कोरोना संक्रमित पुरुषहरूको उपचार भइरहेको छ ।

त्यसैगरी, धनुषा जिल्लास्थित प्रादेशिक अस्पताल जनकपुरअन्तर्गत लक्ष्मीनिया गाउँपालिकामा रहेको बीपी मेमोरियल पोलिटेक्निकल इन्टिच्युटको आइसोलेसन कक्षमा १ महिला र ६८ पुरुष गरी कुल ६९ जना कोरोना संक्रमितको उपचार भइरहेको छ ।

महोत्तरी जिल्लाको जलेश्वर अस्पतालअन्तर्गतको कोभिड विशेष अस्पतालको आइसोलसन कक्षमा ३ महिला र ८२ पुरुष गरी कुल ८५ जना कोरोना संक्रमितहरूको उपचार भइरहेको छ ।

सर्लाही जिल्ला अस्पतालअन्तर्गत मंलगवामा रहेको अल्पामाई रामनारायण यादव नर्सिङ कलेजको आइसोलेसन कक्षमा १ सय ३३ पुरुष र ९ महिला गरी कुल १ सय ४२ जना कोरोना संक्रमितकोे उपचार भइरहेको छ । सर्लाही जिल्लाकै फरहदवा स्वास्थ्य चौकीको आइसोलेसन कक्षमा १ महिला र ८ पुरुष गरी कुल ९ जना कोरोना संक्रमितको उपचार भइरहेको छ ।

रौतहट जिल्लास्थित चपुर अस्पतालमा २ महिला र २८ पुरुष गरी ३० जना कोरोना संक्रमितको उपचार भइरहेको छ । रौतहट जिल्लाकै राजपुर फरहदवामा रहेको प्राथमिक स्वास्थ्य केन्द्रको आइसोलेसन कक्षमा २५ पुरुष र देवाही गोनाही नगरपालिकास्थित जय किसन उच्चमाध्यमिक विद्यालयको आइसोलेसनमा २ महिला र ९५ पुरुष गरी कुल ९७ जना कोरोना संक्रमितको उपचार भइरहेको छ । रौतहड जिल्लाकै गरुडा नगरपालिकामा रहेको नेपाल प्रहरी विद्यालयमा १० जना पुरुष कोरोना संक्रमितहरूको उपचार भइरहेको छ ।

बारा जिल्लाको कलैया अस्पतालको आइसोलेसन कक्षमा ३ महिला र ३० पुरुष गरी कुल ३३ जना कोरोना संक्रमितहरूको उपचार भइरहेको छ । पर्सा जिल्लामा नारायणी अस्पतालअन्तर्गत रहेको कोभिड– १९ विशेष अस्पताल गण्डक अस्पतालमा ३३ पुरुष र ६ महिला गरी कुल ३९ जना कोरोना संक्रमितको उपचार भइरहेको छ ।

त्यसैगरी, सिरहा जिल्ला सिरहा नगरपालिकास्थित सिरहा कोभिड विशेष अस्पतालमा १३ र प्रादेशिक अस्पताल जनकपुरअन्तर्गत रहेको कोभिड– १९ विशेष अस्पतालमा ४ गरी कुल १७ जना कोरोना आशंकित बिरामीको उपचार भइरहेको छ ।

प्रकाशित मिति: बिहीबार, जेठ २९, २०७७ १६:४०