गिरीको पक्षमा किन देखिए सर्वोच्चका पूर्वन्यायाधीश ?

A+ A A-

समाजवादी पार्टीकी सांसद सरिता गिरीको काठमाडौको विशालनगरस्थित घरमा केही व्यक्तिले कालो झण्डा लगाई हुलहुज्जत गरेको प्रति सामाजिक सञ्जालमा कडा प्रतिक्रिया आएको छ ।

सर्वोच्च अदालतका पूर्वन्यायाधीश गिरिशचन्द्र लालले लेखेका छन्– कानुनी राज्य र सांसद सरिता गिरीकाे घर घेर्ने र आगोसमेत लगाउने जस्ता कुरा नपच्ने भयो । फरक विचारप्रति सहिष्णुता हुनैपर्छ । सहिष्णुता नभएमा दुर्भाग्यपूर्ण ! यसले धेरै प्रश्न पनि खडा गर्दछ ।

प्रदेश २ का मुख्य न्यायाधिवक्ता दीपेन्द्र झाले संसदमा आफ्नो विचार स्वतन्त्रपूर्वक राखेकै आधारमा सांसद गिरीको घरमा आक्रमण हुनु खेदजनक कार्य भएकाे उल्लेख गर्दै यस्ता हिंसात्मक, आपराधिक र लोकतन्त्रविरोधी कार्यलाई तत्काल रोक्न आग्रह गरेका छन् ।

यो घटनामा संलग्न सम्पूर्ण माथि तत्काल कारवाही हुनुपर्ने माग गर्दै उनले सामाजिक सञ्जालमा लेखेका छन्– संसद फरक विचारहरु राख्नकै लागि बनाइएको हो । भाषा र विचारमाथिको बन्देज स्वीकार्य हुन सक्दैन ।

धर्मेन्द्रकुमार मिश्रले लेखेका छन्– नश्लीय विचारधाराको समाधान भएन भने अमेरिका जस्तो नश्लीय सोचविरुद्ध संघर्ष गर्नुपर्ने बाध्यता सिर्जना हुन सक्छ । अरुण मल्लिकले जसपाले रोस्ट्रम घेरेर भए पनि सरकारलाई कारबाही गर्न बाध्य गर्नुपर्‍याे ।

सुधा झाले लेखेकी छन्– फरक विचारप्रति असहिष्णु हुनु तानाशाही प्रवृत्ति हो । यो घटनाले धेरै कुराहरूतिर संकेत गर्दछ ।

सुजीत यादवले लेखेका छन्– अधिकांश पहाडीहरूलाई सही कुरा पच्दैन र तुरुन्त आफ्नो असली रूप देखाउन सुरु गरिहाल्छ्न ! विचारको विमति हुँदैमा घरमा आक्रमण गर्नु एकदमै निन्दनीय काम हो ।

सांसद गिरीको विरोधमा पनि निकै प्रतिक्रियाहरू पनि सामाजिक सञ्जालमा आएका छन् । नेपाली कांग्रेसका युवानेता केशव ढुंगेलले लेखेका छन्– देशद्रोहीलाई अझ बढी कठोर सजाए दिइनुपर्छ, आमालाई बलात्कार गर्नेलाई त झुन्ड्याउनुपर्छ ।

रुद्र जंगली दाहालको प्रतिक्रिया पनि यस्तै कडा आएको छ । उनले लेखेका छन्– सर्वप्रथम आफ्नै आमालाई बलात्कार गर्नेलाई, के भन्नुहुन्छ कुन्नि, ईश्वर र आफूलाई नढाँट्नुहोला ।

कालापानी, लिपुलेक, लिम्पियाधुरा समेटिएको नयाँ नक्सासहितको निशान छाप राख्न सरकारले ल्याएको संविधान संशोधन विधेयक खारेज गर्न जनता समाजवादी पार्टीकी सांसद सरिता गिरीले संशोधन प्रस्ताव दर्ता गरेकी छिन् । उनले बुधबार संसद् सचिवालयमा संशोधन प्रस्ताव दर्ता गरेपछि देशभरि कडा प्रतिक्रिया आएको छ ।

सरकारी विधेयकमा तथ्य र प्रमाण नपुगेकाले संशोधन गर्नुपरेको उनले उल्लेख गरेकी छन् । संविधानको धारा ९ को उपधारा २ बमोजिम अनुसूची ३ मा राखिएको निसान छाप परिवर्तन गर्ने प्रस्तावसहित सरकारले विधेयक दर्ता गराएको थियो ।

समाजवादी पार्टीले सांसद गिरीलाई उनले संसदमा दर्ता गरेको संविधान संशोधन प्रस्ताव फिर्ता लिन निर्देशन दिएको छ । बुधबार पार्टीका प्रमुख सचेतक उमाशंकर अरगरियाले विज्ञप्ति सार्वजनिक गर्दै संशोधन प्रस्ताव फिर्ता नलिए कारवाही गर्ने चेतावनी दिएका छन् ।

प्रकाशित मिति: बिहीबार, जेठ २९, २०७७ १२:२०