मलेसियाबाट कुन दिन कुन एयरलाइन्सको उडान ? को-कोलाई पहिलाे प्राथमिकता ?

A+ A A-

मलेसियाबाट विभिन्न ४ उडानमार्फत् नेपाली ल्याउन मलेसिया स्थित नेपाली राजदूतावासले सूचना जारी गरेको छ । विश्वव्यापीरूपमा फैलिएको कोरोना संक्रमणका जोखिमकाबीच नेपाल सरकारले समस्यामा परेका नेपालीलाई स्वदेश फर्काउने निर्णय गरेसँगै नेपालीलाई ल्याइने भएको हो ।

दूतावासले सूचनामा उल्लेख गरेको छ, ‘कोभिड–१९ को विश्वव्यापी संक्रमणबाट उत्पन्न असहज परिस्थितिमा स्वदेश आउनैपर्ने अवस्थामा रेका नेपाली नागरिकलाई स्वदेश आउन सहजीकरण गर्ने सम्बन्धि आदेश, २०७७ बमोजिम मलेसियामा अलपत्र अवस्थामा रहेका नेपाली नागरिकलाई नेपाल फर्काउनको लागि नेपाल सरकारले क्वालालाम्पुरबाट काठमाडौंको लागि पहिलो चरणमा ४ वटा उडानको तय गरेको छ ।’

पहिलो चरणमा ४ वटा उडान

१५ जुन २०२० ( नेपाल एयरलाइन्सको A320 विमान

१८ जुन २०२० ( हिमालयन एयरलाइन्सको A320 विमान

२० जुन २०२० ( नेपाल एयरलाइन्सको A330 विमान

२१ जुन २०२० ( हिमालयन एयरलाइन्सको A320 विमान

टिकट मूल्य २२२० रिंगिट, स्वास्थ्य परीक्षण अनिवार्य

दूतावासले जारी गरेको सूचनाअनुसार टिकट मूल्य ५२० अमेरिकी डलर अर्थात् मलेसियन रिंगिट २ हजार २२० तोकिएको छ । साथै, विमानमा फर्कन चाहने नेपालीहरुसँग पछिल्लो ७ दिनको कोभिड-१९ संक्रमण भएको एकिन हुने स्वास्थ्य परिक्षण गरेको रिपोर्ट अनिवार्य हुनुपर्नेछ । दूतावासले ध्यानाकर्षण गराउदै सूचनामा उल्लेख गरेको छ, ‘समयमै टिकट खरिद नगरेमा प्राथमिकता अनुसार पछीका यात्रूलाई टिकट खरिद गर्ने अवसर प्राप्त हुनेछ ।’

दूतावासले जारी गरेको सूचनाअनुसार दुतावासको फेसबुक र वेवसाइटमा जारी गरिएको फारमको आधारमा नेपाल ल्याइनेको प्राथमिकता निर्धारण गरिने उल्लेख छ । साथै, प्राथमिकतामा परेकाहरुको सूची दूतावासले प्रकाशन गर्नेछ । त्यहि सूचीमा परेका नामहरुले सम्बन्धित एयरलाइन्ससँग टिकट खरिद गर्नुपर्नेछ ।

दूतावासले सूचनाको बुँदा नम्बर ७ मा उल्लेख गरेको छ । मलेसियाको कानुनअनुसार अवैधानिक भई बसेका व्यक्तिको लागि मलेसिया सरकारले आममाफीको कार्यक्रम नगरेकाले त्यस्ता व्यक्ति हाल यी उडानमार्फत् नेपाल फिर्ता हुन सक्ने छैनन् ।

दूतावासका अनुसार सुत्केरी, गर्भवती र बिरामी महिला, सिकिस्त विरामी परेका पुरुष, अध्ययन समाप्त भएका विद्यार्थी र व्यापारिक तथा पर्यटक भिषामारही भिषा समाप्त भएका, रोजगारी भिषामा रही भिषा अवधि समाप्त भएका, कोभिडको कारण रोजगारी गुमाएका सहित विभिन्न ९ प्रकारका समस्यामा परेका व्यक्तिलाई निर्धारित विमानमार्फत् नेपाल फिर्ता हुन प्राथमिकता दिइनेछ ।

प्रकाशित मिति: बिहीबार, जेठ २९, २०७७ ०९:४३