११ महिनामा पुँजीगत खर्च ३० प्रतिशत मात्र, राजस्व सङ्कलन ५० प्रतिशत नाघ्याे

A+ A A-

चालू आर्थिक वर्षको ११ महिनामा ३० प्रतिशत पुँजीगत खर्च (विकास खर्च) भएको छ । महालेखा नियन्त्रककाे कार्यालयको यही जेठ २७ गतेसम्मको तथ्यांकअनुसार पुँजीगत खर्चमा कुल अनुमानित खर्चको ३०.१६ प्रतिशत खर्च भएको देखिएको छ ।

सरकारले चालू आर्थिक वर्षमा विकास निर्माणका लागि पुँजीगत खर्चतर्फ ४ खर्ब ८ अर्ब ५९ करोडको बजेट छुट्याएकाेमा हालसम्म १ खर्ब २३ अर्ब ५ करोड ५ लाख बजेट खर्च भएको देखिन्छ । चालू खर्च (तलबभत्ता आदि) भने ६७ प्रतिशत भएको छ । चालूतर्फ ९ खर्ब ५७ अर्ब १० करोड रुपैयाँ खर्च गर्ने लक्ष्य लिइएकाेमा मङ्गलबारसम्म ६७.१८ प्रतिशत अर्थात् ६ खर्ब ४२ अर्ब ९३ करोड ९४ लाख रुपैयाँ खर्च भएको मनिकाको तथ्याङ्कले देखाएको छ ।

१ खर्ब ६७ अर्ब ८५ करोड ९८ लाख बजेट वित्तीय व्यवस्था (सार्वजनिक संस्थानमार्फत पुँजी निर्माणमा हुने खर्चका लागि दिइने बजेट) तर्फ खर्च गर्ने लक्ष्य लिइएकाेमा हालसम्म ८३ अर्ब ८६ करोड ८३ लाख (४९.९६ प्रतिशत) खर्च भएको छ ।

चालू आर्थिक वर्षमा सरकारले १५ खर्ब ३२ अर्ब ९६ करोड ७१ लाख कुल बजेट छुट्याएकाेमा ११ महिनाकाे अवधिमा चालू, पुँजीगत र वित्तीय व्यवस्थापन गरी ५५.४४ प्रतिशत अर्थात् ८ खर्ब ४९ अर्ब ८५ करोड ८१ लाख खर्च भएको हो । गत माघकाे अन्तिम साता चालू आवको अर्धवार्षिक समीक्षामा अर्थमन्त्री डा. युवराज खतिवडाले संशोधित बजेटको आकार १३ खर्ब ८५ अर्ब ९६ करोड ३६ लाखमा ल्याएका थिए । सो समीक्षामा कुल बजेटको ९०.४ प्रतिशत खर्च हुने अनुमान गरिएको थियो ।

राजस्व ५७ प्रतिशत

चालू आर्थिक वर्षमा सरकारको राजस्व सङ्कलनको अवस्था ५० प्रतिशत नाघेको छ । ११ महिनाकाे अवधिमा लक्ष्यको ५७.४३ प्रतिशत आम्दानी भएको मनिकाले देखाएको छ । ११ खर्ब १२ अर्ब ३३ करोडको वार्षिक लक्ष्यमा हालसम्म ६ खर्ब ३८ अर्ब ६१ करोड ३२ लाख रुपैयाँ राजस्व संकलन भएको छ ।

यसैगरी, कर आम्दानीतर्फ ५७.५६ प्रतिशत उपलब्धि भएको छ । १० खर्ब ९ अर्ब १६ करोड १८ लाख रुपैयाँकाे लक्ष्य रहेकामा ५ खर्ब ८० अर्ब ८८ करोड ६३ लाख रुपैयाँ आम्दानी भएको छ । यस्तै, गैरकर आम्दानी भने ५६.१२ प्रतिशत भएको छ ।

पूर्वअर्थसचिव रामेश्वर खनालले सरकारी संयन्त्रको संस्थागत क्षमतामा कमी हुँदा लक्ष्यअनुसार विकास खर्चमा कमी भएको बताए । 'बजेट खर्च नहुनुमा अर्थ मन्त्रालय र अर्थमन्त्रीको मात्र जिम्मेवारी हुँदैन, सबै मन्त्रालय र मन्त्रीज्यूहरूले जिम्मेवारीका साथ नेतृत्व दिएमा विकास खर्चमा प्रगति हुन्छ', उनले भने । उनका अनुसार सरकारले नीति मात्र बनाएर खर्च नबढ्ने भएकाले काम गर्ने परम्परालाई समेत परिवर्तन गरी खर्च नीतिलाई स्पष्ट बनाएमा लक्ष्यअनुसार बजेट खर्चमा वृद्धि हुनेछ ।

प्रकाशित मिति: बुधबार, जेठ २८, २०७७ १६:११