ब्याजमा छुट पाउनु भएन ? यसरी गर्नुस् उजुरी

A+ A A-

कोरोनाका कारण लकडाउनले व्यवसाय ठप्प भएर बैंकको किस्ता तिर्न सक्नुभएको छैन भने पक्कै पनि राष्ट्र बैंकको ब्याज छुटको निणर्यले तपाईंलाई राहत दिएको छ होला । राष्ट्र बैंकले वैशाखदेखि बैंकको मासिक ब्याजमा २ प्रतिशले छुट दिन सबै बैंकहरूलाई निर्देशन दिइसकेको छ ।

यसर्थ कोरोनाबाट पीडित व्यवसायीलाई थोरै भए पनि राहत महसुस भइरहेको होला । तर, अहिले छुटबाट राहत पाइयो भन्नेहरूभन्दा धेरै छुट नै पाइएन भन्नेहरू बढ्दै गएका छन् । राष्ट्र बैंकले स्पष्ट रूपमा कोरोनाबाट पीडित भएका व्यवसायीहरूलाई ब्याजमा २ प्रतिशत छुट दिन अनिवार्य गरेको छ । तर, अझै कार्यान्वयनमा भने बैंकहरू तातिएका छैनन् ।

यसरी कोरोनापीडित भएको प्रमाण हुँदाहुँदै पनि तपाईंले मासिक किस्ता तिर्न जाँदा बैंकले छुट दिन मानेन र सबै ब्याज भुक्तानी गर्दै हुुनुहुन्छ भने तपाईं आफैँ ठगिँदै हुनुहुन्छ ।

छुट पाउनका लागि तपाईंले अब सोझै राष्ट्र बैंकको बैंक तथा वित्तीय नियमन विभागको गुनासो इकाइमा गएर छुट नदिएको कुरा राख्न सक्नुहुनेछ । यसरी गुनासो राख्दा तपाईंले आफ्नो व्यवसायको प्रकार, कर्जाको प्रकृति, पाउनुपर्ने छुट र बैंकको नाम उल्लेख गर्नुपर्ने हुन्छ ।

यसरी तपाईंले बैंकका विरुद्ध गुनासो राष्ट्र बैंकमा बुझाउँदा तपाईंको नाम भने गोप्य नै रहनेछ । तपाईंको गुनासोको अध्ययन गरेर बैंकले कारबाहीको प्रक्रिया सुरु गर्नेछ ।

बैंकले यसरी कोरोनापीडित व्यवसायी भएको प्रमाण हुँदाहुँदै पनि ब्याजमा छुट नदिए निवेदन दिन राष्ट्र बैंकले व्यवसायीलाई आग्रह गर्दै आएको छ ।

राष्ट्र बैंकका प्रवक्ता गुणाकर भट्टले लकडाउनको समयमा गुनासोहरू बढ्दै गएको बताएका छन् । ‘अहिले छुटको विषयलाई लिएर गुनासोहरू पनि बढ्दै गएका छन्, हामीले गुनासो सम्बाेधन गरेर आवश्यक कारबाही पनि गरिरहेका छौँ,’ उनले भने, ‘कोरोनाबाट पीडित भएका व्यवसायीहरूलाई राष्ट्र बैंकको निर्देशनअनुसार सबै बैंकले ब्याजमा २ प्रतिशत छुट दिनुपर्छ । यदि पाउनुभएको छैन भने राष्ट्र बैंकको बैँक तथा वित्तीय नियमनको गुनासो इकाइमा आएर निवेदन दिनुस् । त्यसको काराबाही हुन्छ ।’

अहिले कोरोनापीडित ऋणी व्यवसायीहरूमा सबैभन्दा ठूलो चुनौतीको रूपमा उभिएको छ । ब्याजमा छुट नपाउनु । राष्ट्र बैंकले छुट छ भन्छ बैंकहरू दिँदैनन् । यस्तो अवस्थामा तपाईंले गुनासो इकाइको भरपूर प्रयोग गर्न सक्नुहुनेछ ।

प्रकाशित मिति: बुधबार, जेठ २८, २०७७ १४:१६