शैक्षिक समस्या समाधानका लागि सरकार अझै पर्ख र हेरको रणनीतिमा छ : विज्ञहरू

A+ A A-

कोरोना भाइरस (कोभिड– १९) को महामारीका कारण आइपर्ने चुनौतीहरूको सामना गर्ने विषयमा केन्द्रीय सरकार, प्रदेश सरकार र स्थानीय तहबीच समन्वयकाे कमी भएको औँल्याइएको छ । विशेष गरी सम्बन्धित मन्त्रालयले विद्यमान अवस्थामा शैक्षिक समस्याहरू समाधानका लागि मार्गनिर्देश गर्न नसकेको तथा मन्त्रालयले अझै पर्ख र हेरको रणनीति लिएको आराेप विज्ञहरूले लगाएका छन् ।

मनमोहन मेमोरियल इन्स्टिच्युट अफ हेल्थ साइन्सेज सोल्टीमोडले हालै आयोजना गरेको ‘कोभिड–१९ पान्डेमिक एन्ड पाथवे टु फरवार्ड’ वेबिनारमा सम्बन्धित क्षेत्रका विज्ञहरूले त्यस्तो धारणा राखेका हुन् । कार्यक्रमा नेपालको सन्दर्भमा कोरोना भाइरसका कारण स्वास्थ्य र शिक्षामा पर्ने प्रभावको विषयमा केन्द्रित थियो ।

कार्यक्रममा सहभागी विज्ञहरूले कोरोनाका कारण आइपरेका चुनौतीहरूको सामना गर्न अन्तर्राष्टिय अभ्यासहरूबाट नेपालले के सिक्न सक्छ र के कसरी अगाडि बढ्ने भन्ने विषयमा छलफल भयाे ।

स्वदेश तथा विदेशका स्वास्थ्य तथा शिक्षा क्षेत्रका प्रतिष्ठित व्यक्तित्वहरूको सहभागिता रहेको कार्यक्रममा प्रा. शरद वन्त, प्रा. विद्यानाथ कोइराला, डा. पुष्परमण वाग्ले, प्रा. एडविन, प्रा. पदम सिम्खडा, प्रा. ओम कुर्मी, प्रा. सिमोन रुष्टन र शिक्षा, विज्ञान तथा प्रविधि मन्त्रालयका सहसचिव दीपक शर्मालगायत झण्डै ३ सय जनाको सहभागिता थियो । कार्यक्रममा लकडाउन, रणनीतिक समस्याहरू र सरकारको स्वास्थ्य नीतिका विभिन्न मुद्दाहरूमा छलफल भएको थियो ।

पछिल्लाे समय आएकाे प्रविधिलाई हामीले शैक्षिक र अन्य व्यापारिक गतिविधिहरूमा प्रयोग गर्न सकिने भएकाले त्यसकाे सदुपयाेग गर्न सम्मेलनले सुझाएकाे छ । विद्युतीय र नेटवर्क प्रणालीको स्तर वृद्धि गर्न स्राेतहरू छुट्याउनु तथा व्यवस्थापनतर्फ सरकार लाग्नुपर्ने सुझाव पनि साे सम्मेलनले दिएकाे छ ।

साथै, विद्यार्थीहरूको शैक्षिक वर्ष नगुम्ने गरी नियमित गर्नुपर्नेमा सम्मेलनले जाेड दिएकाे छ । विदेशबाट फर्केकाे जनशक्तिलाई छोटो अवधिको व्यावसायिक तालिम दिएर भए पनि देशको विकासमा लगाउनका लागि ठाेस कार्यनीति सरकारबाट बनाउनुपर्नेमा सम्मेलनले जाेड दिएकाे छ ।

प्रकाशित मिति: बुधबार, जेठ २८, २०७७ १२:३२