हत्या र आत्महत्याको विरोधमा प्रहरी चौकीमा ढुंगामुढा, अश्रुग्यास प्रहार

A+ A A-

धनुषाको सबैलामा फरक-फरक घटना कारण तनाव उत्पन्न भएको छ ।

घटनाबाट आक्रोशित बनेका स्थानीयले प्रहरी चौकीमा ढुंगामुढा गर्दा प्रहरी चौकीमा राखिएको प्रहरी भ्यानको सिसा फुटेको छ । स्थितिलाई नियन्त्रणमा लिन प्रहरीले केही राउण्ड अश्रुग्याससमेत प्रहार गरेको छ ।

प्रहरी हिरासतमा रहेको १ जना व्यक्ति शौचालयमा झुन्डिएको अवस्थामा फेला परेपछि तथा सबैलामा नै १ जनाको गोली प्रहारबाट हत्या भएपछि स्थानीय आक्रोशित भएका हुन् ।

इलाका प्रहरी कार्यालय सबैलाको हिरासतमा रहेका सबैला नगरपालिका-१२ बरकुर्बाका २३ वर्षीय शम्भु सदा मुसहरको शव शौचलायमा झुन्डिएको अवस्थामा फेला परेको जिल्ला प्रहरी कार्यालय धनुषाका प्रहरी नायब उपरीक्षक रामेश्वर कार्कीले बताए । जेठ १२ गते ट्याक्टर दुर्घटनामा १ जनाको मृत्यु भएपछि उनलाई पक्राउ गरी कारबाही गरिएको थियो ।

उता सबैला नगरपालिका वडा नम्बर ७ लबटोलीका २५ वर्षीय हारून मण्डलको हत्या गरिएको अवस्थामा शव बरामद भएको छ । घरनजिकै उनलाई छातीमा गोली प्रहार गरी हत्या गरिएको अवस्थामा शव बरामद भएको प्रहरी नायब उपरीक्षक कार्कीले बताएका छन् ।

मृत युवकको घरभन्दा सय मिटर पर पोखरीको डिलमा कञ्चटमा गोली प्रहार भएको जिल्ला प्रहरी कार्यालय धनुषाका प्रहरी नायव उपरीक्षक कार्कीले जानकारी दिए । उनले भने, ‘गोली हानिएको भनी प्रहरीको प्रारम्भिक अनुसन्धान छ, थप विवरण पोष्टमार्टमपछि मात्र भन्न सकिन्छ ।’

बुधबार बिहान करिब साढे ५ बजेको समयमा घर नजिकै पोखरीको डिलमा स्थानीय जयकिशोर मण्डलका छोराको शव भेटेपछि स्थानीयले ईलाका प्रहरी कार्यालय सबैलामा जानकारी गराएका थिए । प्रहरीको टोली पुगेर शवको मुचुकल्कासहित पोष्टमार्टमका लागि जनकपुरधामस्थित प्रादेशिक अस्पताल पठाइएको जिल्ला प्रहरी कार्यालय धनुषाले जनाएको छ ।

घटनास्थलमा प्रहरी उपरीक्षक रमेश कुमार बस्नेत खटिएका छन् । दुवै घटनाको छानबिन अहिले जारी नै रहेको कारण थप कुरा अनुसन्धानपछि मात्रै खुल्ने उनले बताए ।

प्रकाशित मिति: बुधबार, जेठ २८, २०७७ १२:२०