विश्वका १० हस्ती, जसले कोरोनाविरुद्ध आफैँले बनाएको नियम तोडे

A+ A A-

कोरोना रोक्न हजुरबुबा, हजुरआमाहरू आफ्ना नाति, नातिनालाई काखमा राखेर खेलाउन पाइरहेका छैनन्, आमाबुबाले आफ्ना सन्तानलाई मायाले अङ्कमाल गर्न पाइरहेका छैनन् । कतिपय मानिस प्रियजनको अन्तिम संस्कारमा जान सकिरहेका छैनन्, साथी र प्रेमीहरू भेट्न पाइरहेका छैनन् ।

लकडाउनको नियमले कोरोना भाइरस (कोभिड- १९) संक्रमण न्यून गर्नका लागि मद्दत त गरेको छ तर यसले मानिसहरूलाई दिएको दुःख पनि कम छैन ।

सामाजिक (भौतिक) दूरीको नियम पालना नगर्नेमाथि धमाधम कारवाही भइरहेको छ । तर, विश्वका केही यस्ता राजनेता, वैज्ञानिक र उच्च पदस्थ व्यक्ति छन्, जसले कोरोनाविरुद्धको नियम तोडिरहेका छन् ।

हेरौँ, विश्वका ती १० हस्ती कोको हुन्, जसले लकडाउन र सामाजिक दूरीको नियम तोडिरहेका छन् ।

डोनाल्ड ट्रम्प, अमेरिकी राष्ट्रपति

कोरोना भाइरस महामारीका कारण संसारमा भएको कुल मृत्युमध्ये ३० प्रतिशत मृत्यु अमेरिकामा मात्र भएको छ ।

अप्रिल पहिलो साता अमेरिकाको रोग रोकथाम तथा नियन्त्रण केन्द्रले कोरोना भाइरसबाट बच्नका लागि सबै अमेरिकीलाई फेस मास्क लगाउन सुझाएको थियो ।

धेरै अमेरिकी नागरिकले यो सुझावअनुसार फेस मास्क लगाउने गरेका छन् । तर, त्यहाँका राष्ट्रपति ट्रम्पले यो सल्लाह मानेका छैनन् । उनी भन्छन्, ‘म यो (मास्क) लगाउन चाहन्नँ ।’

आफू कल्पनामा पनि मास्क लगाउन नसक्ने उनको भनाइ छ । ‘विश्वका नेताहरूलाई स्वागत गर्दा वा उनीहरूलाई सम्बोधन गर्दा मुख ढाक्ने कुरा म सोच्न पनि सक्दिनँ’, ट्रम्पको जिकिर छ ।

तर, अमेरिकाकै मिसिगनलगायतका केही राज्यले सार्वजनिक क्षेत्रमा फेस मास्क लगाउन अनिवार्य गरेका छन् । २१ मेमा राष्ट्रपति ट्रम्पले फोर्ड प्लान्टको भ्रमण गरे, जसले भेन्टिलेटरको निर्माण गरिरहेको थियो ।

कम्पनीका कर्मचारीहरूले मुख मास्कले ढाकेका थिए तर राष्ट्रपति ट्रम्पले मास्क लगाउन अस्वीकार गरे ।

‘तपाईं मास्क लिन किन मान्नुहुन्न ?’ भन्ने पत्रकारको प्रश्नमा उनको जवाफ थियो, ‘मैले मास्क लगाएको थिएँ तर तपाईंहरूको क्यामेराले कैद गर्न भ्याएन । मैले मास्क लगाएको दृश्य कैद गर्ने सौभाग्य म प्रेसलाई दिन चाहन्नँ ।’

उनले आफू मास्क लगाउँदा झन् राम्रो देखिने ठट्यौली जवाफ दिएका थिए । राज्यका एटर्नी जर्नल डाना नेसेल राष्ट्रपतिको यस्तो व्यवहारप्रति खुसी छैनन् । उनी ट्रम्पलाई जिद्दी बच्चासँग तुलना गर्छन्, जो नियम मान्न अस्वीकार गर्छ ।

देशकी प्रथम महिला मेलानिया ट्रम्पले सीडीसीको सुझावमा जोड दिँदै सार्वजनिक क्षेत्रमा फेस मास्क लगाउन भनिन् र सामाजिक सञ्जालमा अफूले पनि मास्क लगाएको फोटो शेयर गरिन् ।

अमेरिकामा कोभिड- १९ बाट हुने मृत्युको संख्या १ लाख नाघिसकेको छ ।

भ्लादिमिर पुटिन, रुसी राष्ट्रपति

रुसका राष्ट्रपति भ्लादिमिर पुटिन काम गर्ने नेताको रूपमा आफ्नो सार्वजनिक छविलाई जोगाइराख्न कडा मिहिनेत गर्छन् ।

२४ मार्चमा कोरोना भाइरसको प्रकोप सुरू भएपछि उनले मस्कोको एउटा अस्पतालको भ्रमण गरे, त्यहाँको तयारीबारे जानकारी लिए ।

उनले अस्पतालको भ्रमण गरिरहेका बेला ह्याजमेट सुट (हेजार्ड्स म्याटेरियल सुट) लगाएका थिए तर चिकित्सकसँग कुरा गर्दा उनले कुनै खालको प्रोटेक्टिभ गियर प्रयोग गरेनन् ।

यसो गर्नु जोखिमपूर्ण हुने चिकित्सकहरू बताउँछन् । उनले त त्यहाँ अस्पतालका प्रमुख डा. डेनिस प्रोत्सेनकोसँग हात पनि मिलाएका थिए । केही दिनपछि डा. प्रोत्सेनको कोरोना पोजिटिभ देखिएको थियो । यसपछि पुटिनको स्वास्थ्यलाई लिएर विभिन्न खालका अड्कलबाजी हुन थाले ।

बल्ल उनले सार्वजनिक रूपमा आफ्नो उपस्थितिलाई कम गर्दै लगे । बैठकको अध्यक्षता पनि उनले घरबाटै गर्न थाले । मे महिनामा उनी २ पटक मात्र सार्वजनिक कार्यक्रममा देखिए ।

राष्ट्रपति पुटिनका प्रवक्ता दमित्री पेस्कोवले पुटिन कहिलेदेखि सार्वजनिक कार्यक्रममा उपस्थित हुन्छन् भन्नेबारे समाचार एजेन्सी रोयटर्सलाई केही बताउन मानेनन् ।

९ जुनसम्म रुसमा ४ लाख ८५ हजार व्यक्तिमा कोरोना संक्रमण पुष्टि भएको छ । अहिलेसम्म रुसमा कोरोनाका कारण मृत्यु हुनेको संख्या ६ हजार १ सय १२ पुगेको छ ।

बेन्जामिन नेतान्याहू, इजरायली प्रधानमन्त्री

इजरायली प्रधानमन्त्री बेन्जामिन नेतान्याहू र राष्ट्रपति रुवेन रिवलिन पनि यसबीचमा आलोचनाका सिकार भएका थिए । जमघट नगर्न, सामाजिक दूरी कायम गर्न आफ्ना नागरिकलाई आग्रह गरेका उनीहरूले यहुदी पर्वमा आफ्ना बच्चाहरूसँग ‘सेलिब्रेसन’ गरेका थिए ।

यहुदी पर्व सुरु हुनुभन्दा केही दिनअघि मात्र नेतान्याहूले देशमा लकडाउन घोषणा गर्दै मानिसहरूलाई भनेका थिए, ‘भीडभाड हुने गरी कुनै खालको भोज आयोजना नगर्नू, सामाजिक दूरी कायम राख्नुहोला ताकि घरका ज्येष्ठ नागरिकलाई संक्रमणबाट बचाउन सकियोस् ।’

तर, केही दिनलगत्तै आफ्नो छोरासँग यहुदी पर्वका दिन भोजको आयोजना गरेको तस्बीर सार्वजनिक भएको थियो । नेतान्याहूको नजिकका मानिसले उनको यस कदमको बचाउ गर्दै उनका छोरा एवनेरले प्रधानमन्त्री निवासमा हरेक बिहान केही घण्टा बिताउने गरेको र उनी नजिकैको अपार्टमेन्टमा बस्ने गरेको बताएका थिए ।

तर, यो सफाइमा इजरायली मिडियाले प्रश्न गरे र संशय व्यक्त गरे । यसैगरी राष्ट्रपति रुवेन रिवलिनले आफ्नी छोरीसँग यस्तै खालको भोज आयोजना गरेको विषयलाई लिएर आलोचित बनेका थिए । यद्यपि, राष्ट्रपतिले यो कुरा सार्वजनिक भएपछि माफी मागेका थिए ।

योगी आदित्यनाथ, भारत उत्तर प्रदेशका मुख्यमन्त्री

भारतका प्रधानमन्त्री नरेन्द्र मोदीले २४ मार्चमा संसारको सबैभन्दा ठूलो लकडाउन घोषणा गरे, जसले १ अर्ब ३५ करोड जनसंख्या भएको देशलाई पूर्ण रूपमा रोकिदियो । पूजा र प्रार्थना स्थल पनि बन्द गरियो ।

लाखौँ प्रवासी मजदुर बेरोजगार भए । कैयौँ मानिस पैदल हिँडेर आफ्नो घरतिर लागे । सयौँ मजदुर बाटोमै मरे ।

उत्तर प्रदेशका मुख्यमन्त्री योगी आदित्यनाथले भने लकडाउन लागू भएको पहिलो दिन नै यसको उल्लङ्घन गरिदिए । अयोध्याको विवादित स्थलमा मन्दिर निर्माणका लागि भएको धार्मिक अनुष्ठानमा भाग लिँदै गरेको उनको तस्बीर सार्वजनिक भयो ।

१ महिनापछि योगी आदित्यनाथका बुबाको मृत्यु हुँदा उनले आफ्नी आमा र परिवारजनलाई लकडाउनको नियमलाई अन्तिम संस्कारको समयमा पालना गर्न सुझाए तर उनी आफैँचाहिँ गएनन् ।

अब्बा क्यारी, नाइजेरिया

नाइजेरियामा कोरोना संक्रमण सरकारमा बसेका ठूला नेतासम्म पुगिसकेको छ । देशका शक्तिशाली चिफ अफ स्टाफ अब्बा क्यारी र बाउची राज्यका गभर्नरमा २६ मार्चमा कोरोना पोजिटिभ पाइएको थियो ।

क्यारी मार्च पहिलो साता जर्मनीबाट फर्किएका थिए । त्यसपछि उनले सत्तारूढ दलको बैठकमा भाग लिएका थिए, जसमा राष्ट्रपति मोहम्मद बुहारी र उपराष्ट्रपति यमी ओसिनबाजो पनि उपस्थित थिए । १६ राज्यका गभर्नर पनि उक्त बैठकमा सहभागी थिए ।

यद्यपि, राष्ट्रपति र उपराष्ट्रपतिको कोरोना रिपोर्ट नेगेटिभ आएको अधिकारीहरूले बताएका छन् ।

केही हप्तापछि १७ अप्रिलमा क्यारीको मृत्यु भएको थियो । यो कोरोनाबाट मृत्युको पहिलो घटना थियो, जहाँ हाई प्रोफाइल व्यक्तिको मृत्यु भयो ।

नाइजेरियामा अहिलेसम्म कोरोनाबाट ३ सय ६१ जनाको मृत्यु भइसकेको छ ।

स्टेला नदाबेनी अब्राहम, दक्षिण अफ्रिका

दक्षिण अफ्रिकाका सञ्चारमन्त्री स्टेला नदाबेनी अब्राहमलाई २ महिनासम्म छुट्टीमा बस्ने र माफी माग्ने सजाय त्यहाँका राष्ट्रपति सिरिल रामापोसाले दिएका थिए । घरमै बस्न दिइएको निर्देशन पालना नगरेकामा उनले यस्तो सजाय पाएका थिए ।

सामाजिक सञ्जालमा शेयर गरिएको तस्बीरबाट थाहा भएको थियो कि सञ्चारमन्त्रीले पूर्वउपमन्त्रीको घरमा अरू ५ व्यक्तिसँग लञ्च गरेका थिए । यसलाई लिएर आलोचना भएपछि उनले माफी मागेका थिए ।

उनले भनेका थिए, ‘म आफ्नो व्यवहारका कारण दुःखी छु, म स्वयंलाई यसप्रति खेद छ । राष्ट्रपति र दक्षिण अफ्रिकाका जनताले मलाई माफ गरिदिने मेरो अपेक्षा छ ।'

राष्ट्रपतिले उनलाई भनेका थिए, ‘कानुनभन्दा माथि कोही हुन सक्दैन ।’

नूर आजमी गजाली, मलेसिया

मलेसियाका उपस्वास्थ्यमन्त्रीमाथि भीडभाड नगर्न गरिएको निर्देशन उल्लङ्घन गरेका कारण जरिमाना गरियो ।

नूर आजमी गजालीले ३ सय २५ डलर जरिमानाका रूपमा दिनुपरेको थियो । एउटा इस्लामी स्कुलमा खाना खाइरहेको तस्बीर सार्वजनिक भएपछि उनलाई यस्तो जरिमाना गरिएको थियो ।

यस्तो तस्बीर सामाजिक सञ्जालमा पोस्ट गरिएको थियो । उनले आफ्नो दोहोरो मापदण्डको आचरणका लागि आलोचना झेल्नुपरेको थियो ।

मलेसियाले कोरोना संक्रमणलाई रोक्नका लागि कडा प्रतिबन्ध र जरिमाना लगाएको छ । अहिलेसम्म हजारौँ मानिस यस्तो नियम उल्लङ्घन गरेकामा दण्डित भएका छन् ।

प्रोफेसर निल फर्ग्युसन, बेलायत

बेलायती प्रधानमन्त्री बोरिस जोन्सन कोरोना संक्रमित भए । उनी केही दिन आईसीयूमा बसेर घर फर्किइसकेका छन् । अस्पताल भर्ना हुनुभन्दा अघिल्लो दिन उनले मानिसहरूको भीडभाड रोक्न कडा प्रतिबन्धहरू घोषणा गरेका थिए । यही कारण कैयौँ मानिसले विवाह र यस्तै अन्य कार्यक्रम रद्द गर्नुपरेको थियो ।

प्रोफेसर निल फर्ग्युसनको सल्लाहमा प्रधानमन्त्री बोरिस जोनसनले बेलायतमा लकडाउनको घोषणा गरेका थिए । तर, पछि निललाई सरकारको वैज्ञानिक मामिला सल्लाहकार समूहबाट हटाइयो ।

एउटा पत्रिकामा रिपोर्ट छापिएका थियो कि लकडाउनका बेला निललाई भेट्न उनको घरमा एउटी महिला आएकी थिइन् । ती महिलासँग निलको सम्बन्ध रहेको बताइन्छ । प्रोफेसर निलले पछि भने, ‘सामाजिक दूरीको नियमलाई कम आँक्नु मेरालागि अफसोसको कुरा हो ।’

यो खबर त्यही दिन आयो, जुन दिन बेलायतले संक्रमितको संख्यामा इटालीलाई उछिनेको थियो । युरोपमा संक्रमणबाट मृत्यु हुनेको संख्या सबैभन्दा बढी बेलायतमै थियो ।

डा. क्यानरिन क्याल्डवुड, स्कटल्याण्ड

प्रोफेसर निल एक्ला विशेषज्ञ होइनन्, जसले लकडाउन उल्लङ्घन गरेको आरोपमा सजायको भागिदार हुनुपर्‍यो ।

यस्तै घटनामा अप्रिलमा स्कटल्याण्डका मुख्य स्वास्थ्य अधिकारी डा. क्यानरिन क्याल्डवुडले आफ्नो पदबाट राजीनामा दिनुपरेको थियो । लकडाउनका बेला आफ्नो अर्को घर गएको भन्दै उनलाई दोषी मानिएको थियो ।

डामिनिक कमिङ्ग्स, बेलायत

बेलायतका प्रधानमन्त्री बोरिस जोनसनका विश्वासपात्र सल्लाहकार डामिनिक कमिङ्ग्स लकडाउनमा आफ्नो लण्डनको घरबाट २ सय ६० माइलको यात्रा तय गरी इङ्ग्ल्याण्डको उत्तरी भेगमा पुगे । यसलाई लिएर प्रधानमन्त्रीले आमनागरिकको आक्रोशको सामना गर्नुपरेको थियो ।

तर, कमिङ्ग्सले कुनै नियम उल्लङ्घन गरेको कुरा अस्वीकार गरे र आफ्नो पद पनि नछाड्ने बताए ।

प्रकाशित मिति: बुधबार, जेठ २८, २०७७ ११:५१